Read Zeme Naga GETOABELEU 80 Bible Online

GETOABELEU 80 - Zeme Naga bible

GETOABELEU 80

¹Ning kun ’ndualie gai lau, Hei Israelme gu melireîpeu gau, melidung je gum ze nang Josepbe je nguatatpeu gau! Nang kerubme peireige heguang hang kai’ndipeu, lerba gai lau

²Ephraim, Benjamin zai Manassebe suage zeu! Ning gu tâtewchibe gecheulumbup kai lu anui je tew’nringpat kai ra wang lau!

³Anui je tei’nsapchu gai dai lau, Hei Hera gau; peize ning ju lerba gai lau, dezai anui ringpat le ra hangge zeu!

⁴Hei, baudime gu Tingwang gau, ’ndaitie ge ning gu ziemmename ne kakellumbe kuâ peireige ning râta gai ra rei lau?

⁵Nang ne penui je hemikdui gu tingku ne kei bei de lei, zai penui je hemikdui kaipuigit kai lu ze sak ra pei bei de lei.

⁶Anui je anui kiningme ne ka’nggime hang nang ne tew gai bei de lei; zai anui teureime penui karai ruage ka’nnui de lei.

⁷Anui je tei’nsapchu gai dai lau, Hei baudime Rapeu gau; peize ning ju lerba gai lau, dezai anui ringpat le ra hangge zeu!

⁸Nang ne Ijip gene grepchîria keî kat teiwang gai bei de lei; nang ne heramzatme je guatua nan ze, chize tau gai bei de lei.

⁹Nang ne chipau keî gene kedei tew’nchi gai bei de lei; chize pemateringhi-’nchuk lu ze heram ze hiampuiting bam de lei.

¹⁰Kedeiloa ramme ze pe gu kezui ne sungnamgit bam lei, chi kedarching bang kedibe ramme je du pe keî ramme zene chûmgit ’ndi de lei;

¹¹pe keî ramme ze sungkling riâ getuapatchang di de lei, zai peheu buapatsuâbe ramme zene ’nggeuki riâ getuapatchang di de lei.

¹²Chidaze ’ndaitew ze pe gu keriengdi ramme nang tewkau ’ndi lau? ’Mpuîki ge tatka’ngguakme leine ne perachî ramme raî gu zeî lau?

¹³Hênamkang gene tingkia ramme ne chize niakka’nsia de lei, zai bekâm ge tatruabe zat leine ne chize teu ze bam de lei.

¹⁴’Nreiwang dai lau, Hei baudime gu Hera gau, tinggîm ’mbene piekeu ze ngau gai ni lau; aipau grepchîria hangge tinggeu gai lau!

¹⁵Pebang hang nang hezat’mbia ba ne tewgailube zeu,

¹⁶Penui ne chize hemi ne rû ’ndi de lei, chize penui ne kuîkau ’ndi de lei; peize penui je ning mated tewliagaibe gene ga gai de lau!

¹⁷Kane nang hezat’mbia ba ge bambe kau ziemmena peireige peize ning ba getua bam lau, nang ne ning hangge peran tew’nchigailube kau ziemmena peireige zeu!

¹⁸Chidezai mâtew-tewsedu anui ning dagene ’nnuktat dai ra mak lei; anui je keringbe pei lau, dezai anui ning ji kû gu lei!

¹⁹Anui je tei’nsapchu gai dai lau, Hei Tingwang baudime gu Hera gau! Peize ning ju lerba gai lau, dezai anui ze ringpat le ra hangge zeu!