Read Zeme Naga GETOABELEU 81 Bible Online

GETOABELEU 81 - Zeme Naga bible

GETOABELEU 81

¹Anui ranchibe bangpui Hera dage leutew’nchi gai lau; Jakobbe Rapeu dage hesuiyibe ziegene ’ngkiak lau!

²Heleu tuachu ze ’ntoî ramme, zai ’nrabung kuâ seuyibe ramme tewchu gai lau.

³Keuhâ ngaube ge zai hekêu zalua ge hegeîluîkie ’mmut lau, anui gu kahengîbe mai gezeu.

⁴Aipau ze â Israelme hangge hingde rawdiakkaibe kau de lei, Jakobbe Rapeu gu hingde tewgaibe zeu.

⁵Pa ne Josepbe dage âzah kat tew gai de lei, pa Ijip gechimgutbe luage zeu. I ne chimakbe kuâ I seu de lei:

⁶“I ne ning keîtoa ge heput pungbe ze tew’ncha gai ’nde lei; ning ba mâ-rak teibe gene ’mpatpat kai ra I ne pei gai ’nde lei.

⁷Lungkahereube gene nang ku de lei, zai I ne ningchu lupat kai bei de lei; mâ-mik ge tingcheibe gene ningchu I ne kak kai bei de lei; Meriba geuki ge I ne ningchu kedak lu de lei.

⁸Seu le lau, Hei a gu ziemmename gau, ningchu I keyi ka’ndeibe luage zeu! Hei Israel gau, ningnui ne a kuâ ’ngking sâng ’ngking gai bei laîzai!

⁹Ningnui ruage hera kêdabe gechâmbe bam ra mak te lei; hesangkedeume rapeu je ningnui keikeu ze kellum ra mak te lei.

¹⁰I ne Tingwang ningnui Rapeu de lei, Ijipram gene ningnui je nguapatkaipeu zeu. Ningnui mui ’ngngarang gai lau, dezai I ne pangpui gai gu lei.

¹¹“Kane a gu ziemmename ne a kuâ ze ’ngking mak tai lei; Israelme mî de achu nei mak lei.

¹²Chidadege penui helungchibe ge helungchi ze bam ra penui je I ne pei gai bei de lei, penui ka’nningbe luî sui ra hangge zeu.

¹³Hei a gu ziemmename ne a kuâ ’ngking bei laîzai, Israelme a gu ’mpuî ge tat ra hangge zeu!

¹⁴I ne kelua ze penui teureime je naîchim gai bei ta du de lei, zai penui je ka’nggime peireige a ba hua’nrik kai bei ta du de lei.

¹⁵Tingwang je ngaugailakme â, pe suage keikeu ze hechai ’ngngîntri tat tu lei, dezai penui hang siarabe ze â betingbeta bam bam gu lei.

¹⁶Dekuîmeu yilangbe zene ningnui je I ne kei lei, zai tingchutum gene ’ngkuidui patbe zene I ne ningnui je kei’nggeugit kai gu lei.”