Read Zeme Naga GETOABELEU 83 Bible Online

GETOABELEU 83 - Zeme Naga bible

GETOABELEU 83

¹Hei Hera gau, ning kuâneu mak ze bam se lau; zîng ze bam se lau; Hei Hera gau!

²Pie le lau, ning teureime â keleulia ze lamui de lei; ningchu ngaugailakme ne penui peî ze ’ngngangchu la de lei.

³Ning gu ziemmename peireige penui ningching kesiabe tak ’mpungchu la de lei; nang ne ’nggum ze bamme peireige kesiatew ra penui kahedei lei.

⁴Penui ne, “Wang lau, penui zatme leine je tew’ngga ne kei lei; Israelme ji je peize chî ta de zu lau!” ze kacheu de lei.

⁵Eu lei, penui muikattew ze mâ-kesia ka’mpung de lei; ningchu ’nggi ze penui samhatbe tew—

⁶Edom benai Ishmaelme zai Moab benai Hagme gu hetiam ramme,

⁷Gebal zai Ammon zai Amalek, zai Tira ge bamme benai Philistia peireige zeu;

⁸Assiriame bau du penui benai herua gai de lei; penui zene Lotbe chaname bau baranchi hang chang de lei.

⁹Midian peireige nang tew gai gum ze, penui peireige du tew gai be lau, Kishon geuki ge Siserabe benai Jabinbe je nang ne tew gai gum zeu,

¹⁰En-dor gene penui je tew’nsiagai’ndime, kedei hangge hebâ changgaidime zeu.

¹¹Orebbe benai Zeebbe peireige tew gai gum ze, penui ge kedime peireige tew gai be lau, Zebabe benai Zalmunnabe peireige tew gai gum ze penui gu heguangsinme peireige tew gai be lau,

¹²Hera gu timpeizeu ze, anui ne anui ram hangge lu ne kei lei,” ze kacheume bau jeu.

¹³Hei a Rapeu gau, tingkai ne guika’nruibe deiniamoîne gum ze penui je tew gai be lau, tingkai guiwangbe ge chêurie guitua’ndibe gum zeu.

¹⁴’Nrêukang hemi ne rûmut’ndibe gum ze, hemi ne kedeiloa ramme taugie bambe gum ze,

¹⁵ning gu heratingkaichibe ne penui je nang ne gua’nchu be lau, zai ning gu natri zene penui je tewhingrim gai be lau!

¹⁶Ka’ngngambe ne penui ju ge kaipui gai be lau, chidezai ning ji penui ne peize peu le ra hangge zeu. Hei Tingwang gau.

¹⁷Peize penui je tew’ngngam gai be lau, zai peize betingbeta penui lungchei ze bam lau; kahelêube gene peize penui je ga gai de lau.

¹⁸Nang ning ji Tingwang kacheupeu, ning runne kedeirei leine ge Hera Hulangpeu de lei be ze peize penui je chî le lau.