Read Zeme Naga GETOABELEU 84 Bible Online

GETOABELEU 84 - Zeme Naga bible

GETOABELEU 84

¹Hei baudime wangpeu gau, nang bambe bâm ze peluiyi-desang lei!

²Eu lei, ning kisîam ramme hangge a keringbe kualak ti, zai a ran du gakeu di ze la de lei; a lung benai a pum ne keringbe Rapeu dage hesuiyibe ne leutew lei.

³’Ngkînepui ne ’nsangdu pe poine ze kai ra pe ki hang ngaudau, zai ’ngngainepui (’nruipoine) ne ’nsangdu pe chip hang ngaudau ze bam lei, ning gu herâtewbe-kaira ramme ge zeu, Hei baudime gu Tingwang, a Wangpeu zai a Rapeu gau.

⁴Ning ki ge lungme â helung katemi de lei, ningchu suangbambe zeu!

⁵Ning dagene penui ranchi hang ngaume leine yi de lei, penui lung ge Zaion tatrabe puidi ramme bambe zeu.

⁶Baka kâm penui tatpelapatbe ge chige dekuaki penui tew gai de lei; zai tingruikeugaibe dui zene du hezai sungplik bam di de lei.

⁷Penui tat ze penui ranchibi-bi ze bam lei, Zaion ge hera ramme gu Hera je ngau gu de lei.

⁸Hei Tingwang, baudime Rapeu gau, I kakellumbe kuâ seu gai lau; ning kun ’ndualie gai lau, Hei Jakobbe Rapeu gau!

⁹Pie le lau, anui gu hinggei, Hei Hera gau; nang ne ’nnukkai’ndipeu ju pie gai ni lau!

¹⁰Ning gu hekisiâm ramme ge mai kat ’nnaigaibe â, mâkedabe bâm ge hezie chang kat ’nnaigaibe suane yi’nteu lei. A Rapeu ki ge I â kemuiki kereîpeu changnei lei, helungriaksiame gu hetiamki ge lung ra suane aî.

¹¹Tingwang Hera â tingnaimik benai hinggei de lei; pa ne ngauka’nggiabe benai hengêutewbe ze kela gum peipat kai lei; ka’nzeibe ne tat bamme je Tingwang ne mâ-keyibe pei ra ngaurau mak lei.

¹²Hei, baudime gu Tingwang gau, ningchu ’nnumtewbamme hangge yi-desang lei!