Read Zeme Naga GETOABELEU 85 Bible Online

GETOABELEU 85 - Zeme Naga bible

GETOABELEU 85

¹Tingwang gau, nang â ning gu heram je ka’nchâ lei; Nang ne Jakob hangge beting keyibe pei gai dai bei de lei.

²Nang ne ning gume gu hemui-helut ze lun gai bei de lei; nang ne penui gu hemui leine lun kam gai bei de lei.

³Nang ne ning lumpum leine tew’nsau gai dai bei de lei; ning lung teu-kadesangbe gene nang ne helitat dai di de lei.

⁴Anui je tei’nsapchu gai dai lau, Hei anui je tewka’nringbe bangpui Hera gau, zai anui lam’mbia gene ning râtabe ze tei’mbia ne lau!

⁵Nang anui je betingbeta ning râta bam ra mei? Rehei wangkeu leine dage ning râtabe bam bam ra rei mei?

⁶Nang ne anui je tew’nrak kai dai me ra mei, chidezai ning gu ziemmename nang gene hesui’nta ze bam ra hangge zeu?

⁷Ning gu hungka’ntipbe anui je teilia zu lau, Hei Tingwang gau, zai anui je ning gu tewka’nringbe pei gai lau.

⁸Hera Tingwang ne ’ndaikau sa ra mei be ze achu ’ngking gai ra pei lau, pa ne pe gu ziemmename dage, pe gu ka’nchime dage desieyibe sam sa gu lei, pe dage penui lung ’nreiwangdaibeime dage zeu.

⁹Pechu hingchime hangge â pe gu tewka’nringbe ze wang’nna la sing de lei, chidezai pengêudibe ze anui ram lungge bam ra hangge zeu.

¹⁰Hungka’ntipbe benai lungsangtewbe hedau gu lei; kapelingbe benai lungkatemibe kat-kat je keput ku lei.

¹¹Lungsangtewbe ze kedei gene puakpat ku lei, zai kapelingbe zene tinggîm ’mbene pie’nsukkeu gu lei.

¹²Eu lei, Tingwang ne mâ-keyibe pei gu lei, zai anui ram ze pe gu perachî misongga pungpat ku lei.

¹³Kapelingbe ne pe sua-sua raîtat ku lei, zai pa kiamgairabe pichaîset hang teleutat ku lei.