Read Zeme Naga GETOABELEU 88 Bible Online

GETOABELEU 88 - Zeme Naga bible

GETOABELEU 88

¹Hei Tingwang, a Rapeu gau, ’nrîmbeting ge ’ngngâ gai ra I ku lei; zai tingmuî ge ning suage I kû’nrungpat kai lei.

²I kakellumbe ze ning suage peize wangchang gai lau, I kûka’nrungbe kuâ ge ning kun ’ngngiakeu gai lau!

³A keringbe ze mi duânggabe ne puigit ze lamui lei, zai a ringting du Kechaiberam ’mbe nabi-bi la de lei.

⁴Achu â Hûm ge wangkeugaidime ruage sei’mpam gai ze lamui lei; peran-gabe ziemmena gum ze I chang di de lei,

⁵kechaime ruage sâudiakkaibeibe kau gum de lei, gîchat’ndime heraw lungge tuâbamdime gum de lei, nang ne penui je chitadime gum de lei, ning ba gene penui je â tew’ngga ’ndi dadegeu.

⁶Nang ne achu â Hûm kechukbe ge kai bei de lei, muiterîngbe benai chukrungbe kuiki lungge zeu.

⁷Ning râtabe ze a peireige dapritsit la de lei, zai ning gu hedui kagesuâkbe leine ne achu nupgit ’nde lei.

⁸I kangzangtewme ne achu ’mbia ra hangge nang ne tew gai ’nde lei; penui ngauhingrabe hangge nang ne achu tew gai bei de lei. I pat dai lak te ra achu â kainam gai ’ndi de lei;

⁹mi suisiabe ne a mik du heruîsui di de lei. Nai’nsangne ningchu I ku lei, Hei, Tingwang gau; a ba ning lam’mbia I getuapat kai lei.

¹⁰Kechaime hangge ningdaulakbe zat ramme nang tew gai mei? Kechaime ne ningchu toa ra zuachu mei?

¹¹Ning gu hungka’ntipbe heraw lungge, zai ning gu lungsangtewbe Abaddon ge pau gai bei mei?

¹²Ning gu ningdaulakbe zat ramme kemuîbe ge chî di de mei, zai ning gu tewka’nringbe ’ngnga ze mâ-’ngngaîchibe heram ge chî di de mei?

¹³Kane Hei, Tingwang gau, ning dage I kûka’nrung lei; hechua ge a gu kakellumbe ning suage wangchang gai lei.

¹⁴Hei Tingwang gau, ’ndaitew ze nang achu tuâpat kai ’ndi lau? ’Ndaitew ze ning ju a dagene ’mbai di lau?

¹⁵A riting gene chu ze lungkahereube lie ze kechaibe deîtau ra kecheîne runne de lei, ning gu mi hingka-desangbe ge I hereulie ze la lei; I â mâ-tâu hang ga de lei.

¹⁶Ning râtabe zene a peireige nupgit ’nde lei; kakedungbe mi ngauhingbe ne achu tew’ngga ’nde lei.

¹⁷Heduinaibe gum ze naimikpui tâluî penui ne achu bamguâgit ’nde lei; a peireige penui ne bamnam ’nde lei.

¹⁸Mi kehungme benai mi kangme ne achu ’mbia de ra nang ne tew gai bei de lei; I nguakangzangtewme kemuîbe ge lamui lei.