Read Zeme Naga GETOABELEU 89 Bible Online

GETOABELEU 89 - Zeme Naga bible

GETOABELEU 89

¹Ning gu hungka’ntipbe je betingbeta I heleu ne suang gu lei, Hei Tingwang gau; a mui ne rehei wangkeu leine dage ning gu lungsangtewbe I paurua gu lei.

²Ning gu hungka’ntipbe ze â, betingbeta hangge sum’ntip kai ’ndi daseu, nang lungsangtewbe â tinggîm gum ze ’ntip ze bam lei.

³Nang ne, “I kelânglupeu dage I samhatkaibe tew gai ’nde lei, a guâ ka’ngguapeu Dabidbe dage I ne:

⁴‘Ning haîhikme je I ne betingbeta tew’ntip ze bam gu lei, zai reheipiakeume leine hang ning gu heguang-bamrak ze I ne tew gai bam gu lei,’ acheu ze deseutew gai lei,” ze kacheu de lei.

⁵Tingsung kedibe zene ning gu ningdaulakbe zat ramme deze peize toa lau, Hei Tingwang gau, ning gu ka’nchime ka’nduibe ruage nang lungsangtewbe jeu!

⁶Tinggîm piehang ngaube ge Tingwang je châu kedaduime la lau, zai hera ramme name ruage châu Tingwang gumbe kau la lau,

⁷ka’nchime ka’nduibe ruage haimena ne hing ze bambe Hera, pechu tuaguâ ze bamme leine peireige tâtewchibe, mi kehingbe chang ze bambepeu zeu?

⁸Hei, Tingwang baudime gu Hera gau, nang gum tâtewchibe, ning gu kapelingbe ne ning hiage guâgit bam gumbe kau châu la lau, Hei Tingwang gau?

⁹Sungkling duiteleupum peireige nang ne samram lei; heduiteleu gesuâkchu dege, nang ne chiramme ze tew’ntau gai lei.

¹⁰Hepaupum je gum ze nang ne Rahab je tewdesuirui gai bei de lei, ning ba ranchi ne nang ne ning teureime je hûtimrarip kai bei de lei.

¹¹Tingkehube â ning gu de lei, zai kedei ze du ning gu de lei; kedeirei zai pelung ge bambe leine nang ne chiramme bam ra tew gai bei de lei.

¹²Tingpeî benai tingpî ze nang ne tew gai bei de lei; Tabor benai Hermon ne hesuiyi’ntaza ze ning ji je toa lei.

¹³Ning dage tâtewchibe ba la lei; ning ba â peranchi, nang hezat’mbia ba hu ze bam lei.

¹⁴Kapelingbe benai ka’nzeibe zene ning gu heguang-bamrak gu pedimpung de lei; hungka’ntipbe benai lungsangtewbe zene ning sua-sua raîtat lei.

¹⁵Hengî ra sagaibe kuâ chilume ze yi de lei. Hei Tingwang gau, ning ju karbabe ge tatme bau zeu,

¹⁶naimikpui tâluî ning ji gene ’nrîmbeting ze bambe, zai ning gu kapelingbe je toa’ndi ze bamme bau zeu.

¹⁷Nang â penui ranchibe bangpui gu pengêudibe daseu; nang keyibe ziegene anui gu mâkie ze teichu’ngngu gai bei de lei.

¹⁸Anui gu hinggei ze Tingwang gu chang lei, anui gu heguang ze Israelme gu Ka’nchipeu hang chang lei.

¹⁹’Ndâge keliâbe gene nang ne ning gu lungsangtewme dage ’mpam ze, acheu ze sa ze, “Mihangkat pe ranchipeu peireige I ne heguangpeichûp luak kai bei de lei, hangkat baudime ruagene kelânglupeu je I ne teichu’ngngu gai bei de lei.

²⁰Dabidbe, a guâ ka’ngguapeu je I peudau lu de lei; a gu ka’nchibe taudui ne I ne pechu ’nnukkai’ndipeu zeu;

²¹chidaze a ba ze pe dage ’ngguabam bam ra, zai a ba ne peran tew’nchi gai ra hangge zeu.

²²Hereime ne pechu duî ra mak lei, helungriaksiame ne pechu tewhelêu ra mak lei.

²³I ne pe reime je pe suagene tewhitruai gai gu lei, zai pechu ngaugailakme je lakkau gai gu lei.

²⁴I lungsangtewbe benai I hungka’ntipbe ze pe dage bam gu lei, zai a ji gene pe gu mâkie teichu’ngngu gai bei ze bam gu lei.

²⁵I ne pe ba ze sungkling peireige bam ra kai gu, zai pa hezat’mbia ba ze ’nggeuki ramme peireige bam ra kai gu lei.

²⁶Pa ne achu kû gai gu lei, ‘Nang â a Rapeu, a Rapeu zai achu tewka’nringbe tingchutum lei,’ ze acheu zeu.

²⁷Zai I ne pechu lungkeuraipeu hang tew gai gu lei, kedeirei heguangme ruage hulangpeu hangge zeu.

²⁸A gu hungka’ntipbe ze pe hangge betingbeta reî bam gu lei, zai a gu samhatkaibe ze pe hangge sap’ntiprip ze bam gu lei.

²⁹Pe kiria ze betingbeta hang I ne sum’ntip kai ze bam bam gu lei, zai pe gu heguang-bamrak ze tinggîm bam tâne bam bam ra tew gai gu lei.

³⁰Pe name ne a gu hingde sâu gai, zai a gu hingde tewgaibe luigum ze tat mak,

³¹penui ne a gu rawdiakkaibe-hingde ramme ’ngka, zai a gu hingde ramme teichi mak tizai â,

³²I ne penui gu hedieka’ngkabe ramme ziegene hegeîtui ne tewsâ gu, zai penui gu hemui-helut ziegene lakkegit ku lei;

³³kane a gu hungka’ntipbe ze â pe dagene I tei’mbia ra mak lei, zai a gu lungsangtewbe ze karasa hang tew gai ra mak lei.

³⁴A gu samhatkaibe ze I ne tew’nsia ra mak lei, zai a mui gene sam zuapatbe ze tewkeli ra mak lei.

³⁵I ka’nchibe gene betingbeta hang luakatne I deseu gai lei; Dabidbe dage I karasa ne sa ra mak lei.

³⁶Pe kiria â betingbeta sapbam gu lei, pe gu Heguang-bamrak ze a suage tingnaimik bam tâne bam bam gu lei.

³⁷Hekêu gum ze chize ’ntiprip ze betingbeta bam gu lei; tingkehube bam tâne chize sap’ntiprip ze bam bam gu lei,” ze kacheu lei.

³⁸Kane chuna â nang ne tuâpat ’ndi de lei, nang ne ’nnukkailupeu peireige ning lumpum puigit ze la lei.

³⁹Ning guâ ka’ngguapeu dage nang samhatkaibe deze nang ne sâu gai ’nde lei; nang ne pe gu heguangpeichûp ze timbuimoîne gene tewhebâ gai ’nde lei.

⁴⁰Nang ne pe gu keriengdi ramme leine ze tewpâng kam ’nde lei; nang ne pe gu ’mbaibâm ramme sia kam ra tew gai bei de lei.

⁴¹Chige tatka’ngguakme leine ne pe dage sutteu de lei; pechu â kirei-kikangme ne teihenuitewbe hang chang di de lei.

⁴²Nang ne pe reime hezat’mbia ba ze teichu’ngngu gai bei de lei; pe reime leine je penui suiyi’nta ra nang ne tew gai bei de lei.

⁴³Eu lei, nang ne pe gu hiazutkie mui ze teikadet kai bei de lei, zai nang ne pechu herei ge tei’nsap kai mak lei.

⁴⁴Nang ne pe ba gene langsiutui tei’mbia ’ndi de lei, zai pe gu heguang-bamrak ze kedei ’mbe tuâkeu gai ’ndi de lei.

⁴⁵Nang ne pe rîting ze tew’ndui gai bei de lei; nang ne pechu â ka’ngngambe zene ruichim gai bei de lei.

⁴⁶’Ndaitiege Hei Tingwang gau, ning runne ningchu betingbeta tei’mbai ze bam ra lau? ’Ndaitiege ning lumpum hemi gum ze tau bam ra lau?

⁴⁷Keringbe tingkak ze â keduîne runne lei be, Hei Tingwang gau, chibam lau, ziemmename name je nang ne ’ndamgaibe ze ’nta-’mpia de zeî lau!

⁴⁸Ziemmena châu kechaibe ngau mak ze ring bam dui lau? Kechaiberam gu rezie gene châu pe gu keringbe lupatchi duî lau?

⁴⁹Tingwang gau, ’ndâting gu ning dage hungka’ntipbe bambe ze ’ndaige la lau, chi ning gu lungsangtewbe gene Dabidbe dage nang deseugaibe zeu?

⁵⁰Chîbam lau, Hei Tingwang gau, ning guâ ka’ngguapeu peireige duîzuttew-kadesangbe ze chibam lau; ziemmename hezat ramme ne ngauka’nnabe I liebambe,

⁵¹chige ning teureime achu ka’nrûbe, zai ning gu nang ne ’nnukkaipeu tatbe tak peireige penui ne kika’nnuibe tak zeu.

⁵²Betingbeta Tingwang je toa ze peize bam lau! Amen! Amen!