Read Zeme Naga GETOABELEU 9 Bible Online

GETOABELEU 9 - Zeme Naga bible

GETOABELEU 9

¹A lung leine ne Tingwang je a suiyibe pei gu lei; ning tatew ningdaulakbe leine ze I salia gu lei.

²Ning dage a suiyi ze ’nsumchai gu lei, Hei Hulangpeu gau, heleutew ze ning ji je I suang gu lei.

³A teureime ’ngngîn dai di dege, ning masuage penui kâukeu ze ga gai di de lei.

⁴A tedeu ge kapelingbe nang ne tew gai bei de lei; heguang-bamrak ge nang ’ntau lu, samram kapelingbe nang ne pei bei lei.

⁵Heramzatme je nang ne ’ngngiam bei de lei, helungriaksiame je nang ne tew’ngga kam gai bei de lei; betingbeta hangge penui ji nang ne tew’ngga kam gai bei de lei.

⁶Heteureime â ’nggazut kai de lei; nang ne puitua kam de lei; anui je chibam dai ra ga de lei.

⁷Kane Tingwang ne heguang-bamrak ge betingbeta hangge ’ntau bam gu lei, pe gu heguang-bamrak ze samrambe hangge pa ne teichu gai ’nde lei;

⁸zai kedeirei je kapelingbe ne pa samram lei, hezat ramme je du kapelingbe ne pa samram lei.

⁹Tingwang â tewsabe lieme hangge ’mbaiki de lei, kahereube ting ramme hangge ka’mbaibeki de lei.

¹⁰Aigum ze ning ji chime ne nang ge ’nnumtew ze bam lei, Hei Tingwang gau, ningchu peume je nang ne sâu gai mak daseu.

¹¹Ningnui Zaion ge bamme gau, Tingwang dage leutew ze toa lau! Pezat leine dage pe tatew rasam ranglia zu lau!

¹²Hejai kûmlupeu ne penui hangge ’nninghereu la lei; tewsabe lieme gu ka’nrungbe kuâ pa ’ngngaî mak lei.

¹³Achu ngau’nggia gai lau, Hei Tingwang gau! Achu ngaugailakme dagene ’ndaizeu I kahereu mei be nang ne pie gai ni lau, Hei kechaibe kemui ramme gene achu nang kuakchupeu,

¹⁴chidezai ningchu getoabe Leu leine I saliachi le ra, zai Zaion na’mpui gu kerie’ngkam ramme ge nang ripatbe ze I a suiyi’nta le ra hangge zeu.

¹⁵Heramzatme ne penui hûmkui sugaibe ge penui kêugut kai de lei, chiâk’mpia tew’mbaigaibe ge penui pî ramme mi nan ze la de lei.

¹⁶Heguang â pe runne pechu teilia la de lei, pa ne samram gai de lei; zai helungriaksiame â, penui ba ramme ne tâtewgaibe ramme gene mi gai la de lei.

¹⁷Heramzatme Hera je ’ngngaî’ndime leine, helungriaksiame â Kechaiberam ge tatgut ku lei.

¹⁸Kegame je pehî’nsangne ge ’ngngaî ra mak lei, zai kelaksiame gu kaheguîbe du ’nggazut ra mak lei.

¹⁹Zuachu lau, Hei Tingwang gau, ziemmena ne duî ze bam ra pei gai se lau; peize heram ramme je ning suagene samram gai be lau!

²⁰Kehingbe ge penui je kai be lau, Hei Tingwang! Peize heramzatme ne penui â, hejaipumsie gu ziemmena runne lei be chî lau!