Read Zeme Naga GETOABELEU 90 Bible Online

GETOABELEU 90 - Zeme Naga bible

GETOABELEU 90

¹Tingwang gau, nang zene rehei leine ge anui gu ’mbaibâm chang ze bam lei.

²Kedeiloa ramme ’ntuapatmakbe suage, zai kedei benai kedeirei nang ’ndamgaimakbe suage, betunmakbe gene betunmakbe riâ nang â Hera de lei.

³Nang ne ziemmena je ’mbuimoîne chang dai ra tew gai lu ze, “’Nnuktat dai zu lau, Hei ziemmename name gau!” ze sa gai lei.

⁴Ning mikngau ge kum chang kat ze ’nzimai tattibe kak riâ runne lei, makchai tingmuîzeu ge hekêt-kainakkaibe riâ runne lei.

⁵Nang ne ziemmename je biaktua lei; penui â hemang ka’mmibe riâ lei, hereubuâ hechua ge ’ndiakri-patdaidibe gum lei:

⁶hechua dege chize ring’ndiakripat ze rechida dai di lei; hegî dege â chize heguikeu di ze kî gai di tai lei.

⁷Anui je â ning lumpum zene tew’ngga ’ndi de lei; ning râtabe gene anui je â tew’ngga gai ’ndi de lei.

⁸Nang ne anui gu hemui-helut ramme ning suage kai bei de lei, anui reine ze hemui tâ tewbe ramme ze ning ju karbabe suage kai bei de lei.

⁹Anui ting ramme pelane ne ning rata tew ze tat kam de lei, hechuiluhuigaibe gum ze anui tingkum ramme â tudwang di de lei.

¹⁰Anui keringbe tingkum ramme ze â riaksena lei, makchai mi ranchitieme riakdesat lei; chigumsedu penui hegiêsie ze ringgaibe kak ze â, ka’nchuakbe benai kahereube runne lei; chiramme â kelua-desang ze tat ti de lei, zai anui liamtat ti de lei.

¹¹Ning lumpum gu tâtewchibe peireige châu ne ’nningdesi gai, zai ningchu hingbe luigum ze ning rata peireige châu ne ’nningdesi gai lau?

¹²Chidaze anui gu keringbe tingnaimikpui ramme riam ra anui je getei gai lau, chidezai kaningchingbe lungtak anui ngau le ra hangge zeu.

¹³Helatwang dai lau, Hei Tingwang gau! ’Ndaitiege gîng gai ra rei lau? Ning guâ ka’ngguame peireige ngau’nggia gai zu lau!

¹⁴Hechua ge ning gu hungka’ntipbe zene anui lungwângchang ra tew gai lau, dezai anui gu ringting leine ge anui mi suiyi’nta ze mi suiyi bam le ra hangge zeu.

¹⁵Anui je nang ne tewhereu ze bambe tingnaimikpui riak luî ze anui lungsui tew’nta gai lau, zai anui ne kesiabe ngau ze bambe tingkum riâ luî ze anui lungsui tew’nta gai lau.

¹⁶Ning guâ ka’ngguame dage ning tatew ze liâ gai lau, zai ning chi pengêudibe ze penui name suage liâ gai lau.

¹⁷Tingwang anui Rapeu ne ngauka’nchâbe peize anui peireige bam lau, zai anui batâ tewgaibe ramme ze nang ne anui peireige tew’ntip kai lau, eu lei, chi anui batâ tewgaibe ramme ze nang ne tew’ntip kai lau.