Read Zeme Naga GETOABELEU 91 Bible Online

GETOABELEU 91 - Zeme Naga bible

GETOABELEU 91

¹Mige Hulangpeu gu heki ge lungbambe kau, Hera tâtewchipeu kezui kangge bam-bambe kau â,

²Tingwang suage, “A ’nseubâm zai a gu keriengdi; a Rapeu, I ne ’nnumtewpeu,” ze acheu gu lei.

³Pa ne ningchu ’nruipoine ’mpiatewpeu gu ’mpia gene heipat kai gu, zai herarît kesiabe gene ningchu tei’mbia gai gu daseu;

⁴pa ne ningchu pe kan kena ne ’nggum gai gu lei, zai pe kan kena kangge nang ’nseurabe bâm hang ngau gu lei; pe gu lungsangtewbe ze â hinggei benai hinggeicheibe de lei.

⁵Tingmuîzeu ge mi hing-kadesangbe deze nang hing ra mak lei, zai ’nrîmbeting ge bai’mpitu gipatbe je du nang hing ra mak lei,

⁶zai kemuîbe ge reine ze herarît liamruabe je du hing ra mak, zai tîngnarî ge mâ-tewka’nsiabe zat ne tew’nsiaruabe je du nang hing ra mak lei.

⁷Changsenângme ning hiage kâu gai le dui lei, chang kereume ne nang hezat’mbia ba ge kau gai le dui lei; kane ning taihia ge chize wang’nna ra mak lei.

⁸Nang â ning mik runne ne pie gai gu lei, zai helungriaksiame je mâ-peiruîgaikadaibe nang ngau gu lei.

⁹Nang ne Tingwang zene ning gu ’nseubâm hang tew gai, zai Hera Hulangpeu zene nang kelungbe bâm hang tewgai’ndibe ziegene,

¹⁰ning peireige mâ de kesiabe keu gai ra mak, lak’nsiarabe du ning gu hetiamki hia wang’nna ra mak lei.

¹¹Pa ne ningchu ’nggum ra hang pe gu angelme je pei gai gu lei, ning gu ’mpuî leine ge nguada ra hangge zeu.

¹²Penui ba ne ningchu puachu ’ndu lei, tingchu ge ning pî getau-tâu me ra hangge zeu.

¹³Duilui benai mechinêu peireige nang kutgetie gu lei, duiluipoine benai henêu je ning pî ne nang kedîmgetie gu lei.

¹⁴Kehungbe gene a dage pa ’mpêugit bambe ziegene I ne pechu ripat kai gu lei; I ne pechu ’nggum gu lei, a ji je pa chibe ziegeneu.

¹⁵Pa ne achu kû gai dezai, I ne pe kuâ kak kai gu lei; kahereube ge I pe dage bam gu lei, I ne pechu meupat kai lu pe ngeutew gu lei.

¹⁶Pa ringtie bam ra ngaube gene pe lungwângchang ze bam ra I ne pechu tew gai gu lei, zai a gu tewka’nringbe pechu I teilia gai gu lei.