Read Zeme Naga GETOABELEU 92 Bible Online

GETOABELEU 92 - Zeme Naga bible

GETOABELEU 92

¹Tingwang dage misuiyibe sam paurabe benai ning ji je suangrabe ze yi sing lei, Hei Hulangpeu gau;

²hechua ge ning gu hungka’ntipbe saliarabe, zai tingmuî ge ning gu lungsangtewbe saliarabe,

³zai ’nra benai ’nrabung kêdabe teikaheluabe ruakyibe tei ze saliarabe ze yi sing lei.

⁴Hei Tingwang gau, ning tatew zene a lung suiyi’nta ra tew gai bei de lei; ning batâ ramme geze I a suiyi ze leutew lei.

⁵Ning tatew ramme ze di-desang lei, Hei Tingwang gau! Ning gu mâ-ka’nningbe tak ramme chuk-desang lei!

⁶Ziemmena gepangbe kau â, chî lak lei, zai kemiebe kau ne aize ’nningchi lak lei:

⁷timpeikiak gum ze helungriaksiame pungpat leusedu, zai kesiabe tâ tewme leine ’ngnguplai bam leusedu, penui je â betingbeta hang tew’nsia gai bei ta ra la de lei,

⁸kane nang â, Hei Tingwang gau, kehube ge nang â betingbeta bam bam lei.

⁹Hei Tingwang gau, ning teureime je pie le lau ni, pie le lau ni, ning teureime ga gai du lei; kesiabe tâ tewme leine je â hûtimrarip kai ’ndu lei.

¹⁰Kane hênamkang gu getumsei kie je gum ze nang ne a gu mâkie ze teichu’ngngu gai bei de lei; nang ne a peireige taudui rechidabe ruî gai bei de lei.

¹¹A teureime kâukeudibe a mik ne I ngau lu de lei, achu kanggime siakeudibe a kun ne seu lu de lei.

¹²Kapelingme â ’nchangbang gum ze ka’ndat lei, zai Lebanon ge kedarchingbang gum ze chîngchu lei.

¹³Penui je â Tingwang ki lungge tau gai bei de lei, anui Rapeu kisîam gene penui yize chîngchu lei.

¹⁴Penui â chîng di chaine du penui rachî ’nchipat lei, penui râyi ze ring’ndiaktau bam lei,

¹⁵Tingwang â ka’nzei lei be teilia ra hangge zeu; pa â a gu tingchutum lei, zai pa ge pelingmakbe mâ de ga lei.