Read Zeme Naga GETOABELEU 96 Bible Online

GETOABELEU 96 - Zeme Naga bible

GETOABELEU 96

¹Hei Tingwang dage heleu karchibe tew zu lau; Tingwang dage heleutew lau, kedeirei leine gau!

²Tingwang dage heleutew zu lau, pe ji je ’nnam gai lau; nainsangne pe gu tewka’nringbe rasam ze pauliâ lau.

³Heramzatme ruage pa pengêudibe tak ze rangba gai zu lau, pe gu tâningdaulakbe tewbe rasam hezatme leine ruage rangba gai zu lau!

⁴Tingwang â di-kadesangpeu de lei, zai toa ’ndigairapeu de lei; pechu â hera ramme leine peireige hing ze hengêutewrabe de lei.

⁵Hezat leine gu hera ramme leine ze â heraluîtewbe ramme daseu; kane Tingwang ne tingkehube â ’ndam gai de lei.

⁶Hengêutewbe benai kaheguangbe â pe suage bam lei; peranchibe benai peluiyibe ze â pe gu kakellumbeki ge bam lei.

⁷Tingwang je suang gai lau, Hei hezat leine ki-kelak ramme gau, Tingwang pengêudibe benai tâtewchibe je suang gai lau!

⁸Tingwang ji pengêudibe hangge suang gai lau; pe kisîam ge kela peipatbe tei lu wang zeu!

⁹Ka’nchibe gene ngauyibe paîni tei ze Tingwang je kellum zu lau; kedeirei leine gau, pe suage kedun zu lau!

¹⁰Heramzatme ruage salia zu lau, “Tingwang ne heguang ze la lei! Eu lei, kedeirei je tew’ntip kai ’nde lei, mâtew-tewsedu ’ngngai ra mak lei; pa ne hezat leine je ka’nzeibe gene samram gu lei,” ze acheu zeu.

¹¹Peize tingkehube ne hesuiyi lau, zai peize kedeirei ne hesuiyi’nta zu lau; peize sungkling ne ’mbeu zu lau, zai pelung ge kebambe leine ne zeneu;

¹²peize peningkâm zene ’nsumchai zu lau, zai pelung ge kebambe leine ne zeneu! Chidezai ’nrêu ge chingbang ramme leine ne hesuiyibe ne heleutew gu lei

¹³Tingwang suage zeu, pa wangkeu daseu, kedeirei je samram ra pa wang la daseu. Pa ne kapelingbe gene kedeirei je samram gai gu de lei, zai hezat ramme je pe gu peling gene samram gai gu de lei.