Read Zeme Naga GETOABELEU 97 Bible Online

GETOABELEU 97 - Zeme Naga bible

GETOABELEU 97

¹Tingwang ne heguang ze la lei; peize kedei ne hesuiyi’nta lau; peize kedeiloa duiluakanggua ramme ne penui suiyi’nta kam lau!

²Kemâu ramme benai muiterîngbe ne pechu bamguâ lei, kapelingbe benai ka’nzeibe ze pe gu heguang-bamrak gu pedimpung de lei.

³Hemi ne pe sua-sua raîtat lei, zai pe teureime tuaguâgit bamme je rûmut ’ndi lei.

⁴Pe gu tingkakepitbe ramme zene kedeirei tewbabak kai lei; kedeirei ne ngau lu ze kakedun de lei.

⁵Kedeiloa ramme ze tega gum ze Tingwang masuage luapin gai lei, kedeirei leine gu Tingwang masuage zeu.

⁶Tingkehube zene pe gu kapelingbe ze pau bam lei; zai hezat leine ne pe gu pengêudibe je pierim bam lei.

⁷Mâ-luîtewbe ramme je kakellumme leine je â tew’ngngam gai de lei, mâ-tâuhanggabe heraluîtewbe ramme peireige kedikuâ-kuame bau zeu; hera ramme leine ne pe suage kukdungkeu kam gai lei.

⁸Zaion ne seu lu ze pe suîyi di de lei, zai Juda na ’mpuimi ramme ne penui suiyika’nta lei, Hei, Hera gau, ning gu samrambe ramme ziegeneu.

⁹Hei Tingwang gau, kedeirei leine ge nang Hulang lei; hera ramme leine peireige ningchu â teichu’ngngu gai ’nde lei.

¹⁰Tingwang ne kesiabe ngaugailakme je hung lei; pe gu ka’nchime gu ringting ze pa ne tei’nggim bei lei; helungriaksiame ba gene pa ne penui je lupat kai lei.

¹¹Kapelingme hangge tingbapat lei, zai helung ka’nzeime hangge hesuiyibe tingbapat kai lei.

¹²Tingwang ge hesuiyi’nta ze bam lau, Hei ningnui kapelingme gau, zai pe ji ka’nchibe je hesuiyi lau!