Read Zeme Naga GETOABELEU 99 Bible Online

GETOABELEU 99 - Zeme Naga bible

GETOABELEU 99

¹Tingwang ne heguang la lei; peize hezat leine ne kedun zu lau! Pa ne heguang chang ze kerubme peireige ka’ntau lei; peize kedei je kechuî’ngngai lau!

²Tingwang â Zaion ge di-desang ze la de lei; pechu â hezat leine peireige teichu’ngngu gai ’nde lei.

³Ning ji kedibe benai mi kehingbe ji penui je peize toa zu lau! Ka’nchibe kacheube ze â pa de lei!

⁴Tâtewchibe heguang, ka’nzeibe je ka’nchâpeu, nang ne samram ka’nzeibe ze tew’ntip kai ’nde lei; zai nang ne ka’nzeibe tâ tew gai de lei, zai Jakobbe dage ka’nzeibe tâ tew gai de lei.

⁵Tingwang anui Rapeu je teichu’ngngu gai lau; pe pichaîra ge kellum lau! Ka’nchibe kacheube ze â pa de lei!

⁶Mosabe benai Aaronbe â pe gu tingkume ruage bam lei, Samuelbe ze du pe ji kûme bau ruage bam lei. Tingwang dage penui kûka’nrung de lei, zai penui kuâ pa ne kak kai bei de lei.

⁷Kemâuchia gene penui je pa ka’mpau lei; pa ranggailiabe sam benai pe gu hingde rawdiakkaibe ramme penui tei de lei.

⁸Tingwang anui Rapeu gau, nang â penui hangge kelunbe Rapeu de lei; nang ne penui kuâ kak kai bei de lei; kane penui tâtewmaube ramme peireige hekûmruîpeu â nang de lei.

⁹Tingwang anui Rapeu je teichu’ngngu gai lau, zai pe gu kedeiloa ka’nchibe ge kellum zu lau; Tingwang anui Rapeu â ka’nchi daseu.