Read Zeme Naga SAMREKUM 1 Bible Online

SAMREKUM 1 - Zeme Naga bible

SAMREKUM 1

¹Israelme wangpeu Dabidbe na, Solomonbe gu samrekum ramme aigum lei:

²Ziemmename ne kaningchingbe benai rangliabe sam chirabe ningching ne sabe sam rimba chî’mmi ra,

³’nching ze tâtewbe tak, zai katelingbe, samram ka’nzeibe benai tewka’nzeibe sie ’mpuî ge rangliabe sam ngau ra,

⁴ziemmena ’mpangpaibe kau je ’nningchibe tak pei gai ra, rehangme je gechîbe benai samrambe tak pei gai ra,

⁵zai ziemmena kaningchingbe kau ne du seu lu pa gechîbe pung ze bam ra, zai ziemmena chika’mmibe kau ne du chiamchibe tak ngau ra,

⁶samrekum benai samrekab rimba, zai kaningchingme ne samsabe tak benai penui hekî-kibe sam ze chî’mmi ra hangge zeu.

⁷Tingwang je hingchibe ze â mâ-gechîbe pîbang de lei; kemieme â kaningchingbe benai rangliabe sam je ’nningka’nna lei.

⁸A na gau, ning peu ne mâ-kerangbe ze ’ngking’mmi lau, zai ning pui ne mâ-geteiliabe sam ze tuâ se lau;

⁹chiramme â ning peî hangge mâpâ-teuria peluiyibe gum, zai ning guang ge heteuria ramme gum chang daseu.

¹⁰A na gau, kesiame ne ningchu duai dezai ning lung hezuâ gai se lau.

¹¹Penui ne ningchu, “Anui hejai tewpat ra anui reine ze lîmkua kei lei, patedeu mâ de ga ze pemâugame je anui reine ze lîmkua kei lei;

¹²Chi kechaiberam gum ze penui je ’nring’nzua ne kei lei, mâ-kuiki ge penui pum luî kêugutme gum zeu;

¹³mâ-merua keyibe leine ngau gu, zai anui ki ramme hereichâ ne tewpui gai gu lei,

¹⁴anui ruage nang hedachak kai be lau, rangkâng rak kat anui ’nteumena tei gu lei,” ze penui acheu dezai,

¹⁵a na gau, penui ’mpuî ge nang â tat-herua se lau, penui ’mpuî gene ning pî ’ngngîngut te lau;

¹⁶penui pî â kesiabe tew ra pakka’nsui lei, zai hejai tewpat ra penui pakkakelua lei.

¹⁷’Nruine ngaukâbe bâm ge chiâk lîmgaibe ze â ’nta daseu;

¹⁸kane aime â penui runne penui je hejai tewpat kai ra penui lîmkua de lei; penui keringbe hang penui runne reine ze lîmkua bam de lei.

¹⁹Tewkeleugaibe gene pelâp-pegîe ngaume gu kebambe tak â aigum de lei; chipau heurâ teime gu keringbe ze lutat ka’nsui lei.

²⁰Kaningchingbe kacheube zene keloa’ndi ge perankai ze ka’nrung lei; hechaiki ramme ge pe kuâ kiâkerang gai lei;

²¹kerie-taube peirei ramme gene pa ka’nrung lei; namdi gutbe kemui ge pa ne sam sa de lei:

²²“Hei ’mpangpaibe kau ramme gau, ’ndaitie ningnui ’mpangpai kau chang bam ra rei lau? ’Ndaitie kehichime kehichi-desang bam ra rei lau?

²³I ne kiabe ge mi kuâ seu lau; pie le lau, a gu I ka’nningbe ramme ningnui peireige ruî gai gu lei; zai a sam ramme ningnui dage tew gai gu lei.

²⁴I ne kû gai bei ze ningnui ’ngking nei mak, a ba getuapat kai bei ze mî de nei mak,

²⁵zai I gechiauliâbe sam ningnui ne mâ-hangge du chak kai mak, zai I ka’ngngiambe ningnui lugailak daze,

²⁶I du ningnui dage mi duânggabe pausiabe daube ge ’nnui gai gu lei; kehingbe ne ningnui je tewhereu gai dezai,

²⁷kehingbe ne tingkai kechibe gum ze ningnui je deîtaube luage, zai ning gu mi duângga pausiabe tingkai-natri gum ze wang dezai, lungkahereube benai mi duânggabe ningnui dage wangchang dezai, I du ningnui je teikeliang gu lei.

²⁸Chidezai penui achu kû gu lei, kane I ne kak ra mak lei; penui achu peu-desang gu lei, kane achu peudau ra mak lei.

²⁹Mâ-gechîbe je penui ngaugailak, zai Tingwang je hingchirabe hangge penui kelâng mak,

³⁰I gechiauliâbe sam ze penui mâ de tei nei mak, zai I ka’ngngiambe sam mâ hang du chak kai mak lei,

³¹chipauziegene ningnui tatew luigum ze ningnui dage, wangchang gu, zai ningnui je tew’nrâ gai gu lei.

³²’Mpangpai kau ramme â penui kakezitbe gene chai de lei, zai kemiebe kau ramme â, penui runne penui lungwângchang ze bambe gene chai de lei;

³³kane a kuâ ka’ngkingbe kau â, zeûne ze lung bam gu lei, zai kesiabe mi kehingbe dau mak ze bamyi ze bam gu lei,” acheu zeu.