Read Zeme Naga SAMREKUM 10 Bible Online

SAMREKUM 10 - Zeme Naga bible

SAMREKUM 10

¹Napoine kaningchingbe kau â, pe peu lungsuiyi ra tew lei, kane kemiebe napoine â pe pui hangge pe duânggabe chang lei.

²Mi taksiabe gene mi heurâ ngaube â kegiebe ngau mak lei, kane katelingbe zene kechaibe gene lupat kai lei.

³Tingwang ne katelingme je ’njei-herei ze bam ra pei mak lei, kane helungriaksiame gu teuneibe gesutklakbe zat â, pa ne tei’mbia nan-nan lei.

⁴Karengabe ba ne kelaksia ra tew gai lei, kane ka’nrîbe ba ne lungyi ra tew gai lei.

⁵Hepuakting ge mâ-mâ ’nrapwangchibe kau napoine â, mâ-’nsapchibe kau lei, kane hechit ting ge jeichibe kau napoine â ’ngngam ra tew gai lei.

⁶Ziemmena katelingme peireige ’nnamgaibe ramme bam lei, kane ziemmena helungriaksiabe kau mui â, ’nggî-kahegeibe rasam kagetip lei.

⁷Ziemmena katelingme gu mâ-chitiebe ze â ’nnamgaibe lei, kane ziemmena helungriaksiame ji â hui’ngga du lei.

⁸Kaningchingbe kau lung â sam ramme ge ’ntîng gu lei, kane deuzie ne sam keluaichi kau, kemiebe kau â ga gai du lei.

⁹Lungsang sing ze tatbe kau â tenangmeluisui ze tat bam lei, kane pe gu ’mpuî tatchimakbe kau je â ngaupat ku lei.

¹⁰Pe mik ne gechingliapeu zene miramme je tewhereu gai lei, kane kuugiereu ze kiabe zene yirabe hang tew gai lei.

¹¹Ziemmena katelingbe kau mui ze â, keringbe depin hangge chang lei, kane ziemmena helungriaksiabe kau mui â, ’nggî-kahegeibe rasam kagetip lei.

¹²Ngaugailakbe ne kahegeibe hang tewkeleupat kai lei, kane kehungbe zene ’nggî-kahegeibe zat leine gumchim kam gai lei.

¹³Chika’mmibe bambe kau muikuâng ge kaningchingbe dau lei, kane pe besuitewmakbe kau chingtua hangge hetui â kai lei.

¹⁴Ziemmena kaningchingme ne mâ-gechîbe kagekua lei, kane ziemmena kemiebe mâ-sakatenumbe ne deî’nggarabe teiwang’nna gai lei.

¹⁵Keheupeu heu â pe gu namdi ka’ntipbe ze de lei; kelaksiame gu kelaksiabe ze â, penui hangge gagairabe ze de lei.

¹⁶Katelingme tâ tewbe hî zene keringbe ge ngua gai lei, helungriaksiame gu pelâp-pegîe ngaube zene hemui ge ngua gai lei.

¹⁷Rangliabe sam ze ka’ngkingpeu â keringbe ’mpuî ge tat lei, kane kiâbeibe kuâ ze seusiapeu â lietat lei.

¹⁸Mige pa ngaugailakbe chî ra saliamakbe kau â karasa sachibe mui pungbe kau lei, zai miramme ji tew’nsia ra sam pauruachibe kau â ziemmena kemiebe kau lei.

¹⁹Sam misongga ze sapatbe â kemaube bamchi lei, kane pe mui reîchibe kau â, ziemmena mâ ’nsapchibe kau lei.

²⁰Katelingbe kau leiria â gepût yilangbe de lei; helungriaksiabe kau lung â betâu kecheîne hang runne lei.

²¹Katelingme muikuâng zene misonggame je kei lei, kane ziemmena kemieme â ’nningchibe gabe ziegene chai lei.

²²Tingwang’nnamgaibe â lungyi ra tew gai lei, zai chige mi lunghereurabe pa kaisuâ mak lei.

²³Kemiebe kau hangge kemaube tâ tewbe ze ka’ntabe gum chang lei, kane kaningchingme tâtewbe ze â, mâ-chika’mmibe bambe kau hangge hesuiyibe chang lei.

²⁴Ziemmena helungriaksiabe kau hangge ka’ngngimbe ze pe peireige wangchang gu lei, kane ziemmena katelingbe kau ne luneibe chize pechu pei gai gu lei.

²⁵Natri ’nruiwang bei dege ziemmena helungriaksiabe kau ga gai kam di di lei, kane ziemmena katelingbe kau je â, bam bam ra sum gai bei de lei.

²⁶Mi gêu hangge wain kehiabe gum, zai mi mik hangge mika gum, zai ziemmena karengabe kau â pechu tâtew ra langgaibeipeu dage chigum bam lei.

²⁷Tingwang je hingchibe zene keringbe ting hang tew’ntie gai lei, kane ziemmena helungriaksiame tingkum ramme â dui du lei.

²⁸Ziemmena katelingme gu kaheguîbe ze helungsuiyibe gene tud kai lei, kane ziemmena helungriaksiabe kau gu kaheguîbe â, betâu hang ga gai di de lei.

²⁹Ziemmena, pe gu ’mpuî tatzuntatme gu keriengdi ze â, Tingwang de lei, kane tâ-kesiabe tewme â tewka’nggabe hang runne de lei.

³⁰Katelingme je â mâtew-tewsedu tei’mbia ra mak lei, kane helungriaksiabe kau â heram ge lung ra mak lei.

³¹Ziemmena katelingbe kau mui gene kaningchingbe sam zuapat lei, kane mileiria gene sam chapchibe kau je â tew’ngga gu lei.

³²Ziemmena katelingbe kau muikuang zene ’ndaikau sam lu dui mei lu lak mei be chî lu lei, kane pe lungriaksiapeu mui â sam chaprabe runne chî lei.