Read Zeme Naga SAMREKUM 11 Bible Online

SAMREKUM 11 - Zeme Naga bible

SAMREKUM 11

¹Hedu pelingmakbe â Tingwang mikngau ge katenetbe chang lei, kane mâ-peling ka’nchube â pe suiyibe chang lei.

²Gechîrettewbe pat dege ka’ngngambe dau lei; kane kecheiluîtewme dage kaningchingbe bam lei.

³Ziemmena ka’nzeime je â lungsangtewbe ne penui je kangua lei, kane ’nchuimakme je â penui choâsiabe tak zene penui je tewka’ngga lei.

⁴Mi lunggailakbe mai ge mi heurâ ne mi je ’ngngâ me lei, kane katelingbe zene kechaibe gene mi je lupat kai lei.

⁵Ziemmena hetiâkgabe kau ze pa katelingbe zene pe gu ’mpuî ze tew’nzei gai lei, kane helungriaksiabe kau â, pa pe lungriaksiabe gezene pa kau lei.

⁶Lungsangtewme je katelingbe zene ripat kai lei, kane penui choâsiame je â, penui gu ngau’ntetlakbe zene penui je kebang hang nim lei.

⁷Ziemmena helungriaksiabe kau chai gai dege pa kaheguîbe ga gai di de lei, zai ziemmena kesiame ne kaheguîbe â betâu hang gabe chang lei.

⁸Ziemmena katelingbe kau je â kahereube gene lupat kai bei lei, zai pa kelei ge helungriaksiabe kau ne chige gut kai lei.

⁹Hera je chimakbe kau â pe mui gene pe ramna’mpeu je tew’nsia gai bei de lei, kane ziemmena katelingme je â gechîbe zene lupat kai bei lei.

¹⁰Ziemmena katelingme lungyi ze bambe ge namdi du pe suiyika’nta lei; zai helungriaksiame ga gai di dege hesuiyibe kuâ ramme bam lei.

¹¹Ziemmena ka’nzeime penui suîyibeibe gene namdi pe ji di lei, kane chize ziemmena kesiame mui ramme zene sa’nsia kam gai bei tai lei.

¹²Pe ramna’mpeu je ’nning’ncheichibe kau â pe dage mi siechibe ga kau lei, kane mâ-siechibe ziemmena â pe kuâneu mak ze bam lei.

¹³Ziemmena pemui-tabe kau ne hekimsam latliachi lei; kane mi lung sam paulîa ra ’nnumtewduibe ziemmena â, chi hekimsam ze getipchi lei.

¹⁴Kanguabe kau gabe bâm ge baudime kâu kâu lei; kane nguageteiliarame kiebe bâm ge helung katemibe bam lei.

¹⁵Hesangkedeu’mpeu hangkat gu hepâu pei gai be ra hatkaizû’ndipeu â, chige pe lungneu-desang gu lei, kane aigumbe kadeseube zat je ngaugailakbe kau â, zêune ze bam gu lei.

¹⁶Miramme je ’nggiachibe ’mpuimi ne pechu hengêutewbe ngau ngau lei, zai ziemmena geikangchime ne keheube ngau ngau lei.

¹⁷’Nggiachibe kau â, pe hangge keyibe ngau ngau lei, kane ziemmena katîmphibe kau â, pe runne pechu tewhejam gai lei.

¹⁸Helungriaksiabe kau â, kechoabe hî pa ngau ngau lei, kane kapelingbe linggaibe kau zene pe damrabe pa ngau ngau lei.

¹⁹Teling’nchichiak ze bam kau â ring gu lei, kane kesiabe chai guaka’nsa kau â chai gu lei.

²⁰Ziemmena pakeriângchâmme â, Tingwang dage katenetbe chang lei, kane hetiakgame tatbe ’mpuî ramme ze Tingwang gu pe suiyibe lei.

²¹Aize chî sing le lau, ziemmena kesiabe kau je â tewsâ mak ze ta ra mak lei be zeu, kane katelingme je â lupat kai bu lei.

²²’Mpuimi heleuyipui pe dage mâ-siechibe gabe kau â, kebakmetu ge gechâk baroine bambe gum lei.

²³Ziemmena katelingbe ne luneibe ze â keyibe ze de lei, kane helungriaksiame ne kaheguîbe â helumpumbe ze de lei.

²⁴Mihangkat ne ’ntane mâ-peipat kai lei, kane lungyibi-bi chu lei; kêdapeu ne pa peirabe peilak lei, zai tudkeubi-bi di de lei.

²⁵Pe ba dibe kau je â pa lungyi ra tew gai gu lei, zai hedui peichipeu je â pechu du hedui pei gai gu lei.

²⁶Chêu reîtinggai’ndipeu peireige ziemmename desetkaichi lei, kane chi chêu kezuapeu peireige â toagaibe bam lei.

²⁷’Nrî ze keyibe peubepeu â, miramme ne ngau’nchâgairabe ze peu de lei, kane kesiabe runne peuruabe kau â, pe dage kesiabe wang lei.

²⁸Pe heurâ ge ’nnumtewbe kau â huikeu gu lei, kane katelingbe kau â, mâ-neu ka’ndiakbe gum ze ring’ndiaktau bam gu lei.

²⁹Pe kibaume je tewkeleuchibe kau â pe hangge peduângkerut kai du lei, zai kemiebe kau â, kaningchingbe kau gu kebang chang gu lei.

³⁰Katelingbe rachî a keringbe chingbang ze de lei, zai hingde teimakbe ne keringbe tewka’ngga de lei.

³¹Katelingbe kau je kedeirei ge peiruî dai dizaine, helungriaksiabe kau benai hemui kau peireige ’ndaizeu bam de ra lau!