Read Zeme Naga SAMREKUM 12 Bible Online

SAMREKUM 12 - Zeme Naga bible

SAMREKUM 12

¹Besie geteiliabe ka’nchâbe kau â, mâ-gechîbe ka’nchâbe kau de lei, kane kiâbeibe kuâ seusiabe kau â kemiebe kau de lei.

²Ziemmena keyibe kau â, Tingwang dagene ngauka’nggiabe ngau lei, kane mâ-kesiabe chiamchibe kau je pa ne tew’ngkui gai lei.

³Helungriaksiabe tak ne ziemmena je teika’nsapbe mak lei, kane kapelingpeu gu pemateringhibe ze â, mâtew-tewsedu tew’ngngai ra mak lei.

⁴Henâu yi-kadesangpui â pe napeu gu heguangpeichûp lei, kane ’mpuimi pe napeu je tew’ngngamchibe kau â, pe napeu ra ge tewka’nriambe (kensar) rarît bambe gum de lei.

⁵Katelingme ne mâ-ka’nningbe ramme â ’nzei lei; helungriaksiame ne laddeitewbe ramme â gechoabe ’nnia lei.

⁶Helungriaksiabe gu sam ramme â, mi je tew’nsiarabe sam ramme de lei, kane ka’nzeibe kau mui zene ziemmena je ’nripat kai lei.

⁷Helungriaksiame je â tuâpat kai bei ze ’ngga de lei, kane katelingme ki-kelak â sapbam gu lei.

⁸Pa kaningchingbe luigum ze pechu â satoa gai de lei, kane helung ka’ngkibe â ngau’nna gai bei tai lei.

⁹Mâ-luîdemakbe kau chang ze pe runne tew ze teupeu yi lei, kedipeu gum bam lu teu ra chambepeu suane aî.

¹⁰Katelingpeu â pe gu kaurui hangge ’nningkatinggeube bam lei, kane helungriaksiapeu gu ka’nggiabe tâ â katîmphibe chang lei.

¹¹Pe gu kedei ge hetâ ta-ka’nrîppeu â teu ra misongga ngau gu lei, kane peruânggabe ramme ge ’nsaruabe kau â, pe dage mâ ’nningchibe gabe kau lei.

¹²Helungriaksiame gu heki kehube â siakeu lei, kane katelingme gu heki’mpûm â ’ntiprip ze bam lei.

¹³Ziemmena kesiabe kau pa samsa ka’nzûbe gene pechu mi lei, kane kapelingbe kau â kahereube gene ’mbiapat lei.

¹⁴Ziemmena mige ne pe hî ngaurabe ze â, pe samsa benai pe tatew peireige la de lei; pa ne ngaukakezeibe ramme pa ngau gu lei.

¹⁵Kemiebe kau gu ’mpuî â pe mikngau ge runne ka’nzei lei, kane kaningchingbe kau â, kaladdeibe sam ze ka’ngking lei.

¹⁶Kemiebe kau pe râtabe â luakatne chîgap lu lei, kane hejeuchibe kau â kakeraibe kuâ ze mâ-hangge du ’nning gai mak lei.

¹⁷Samsangsabe kau â peling ge sakkitew gai lei, kane sakki karasabe zat â kechoabe sam sapat lei.

¹⁸Sam ketakedau sagaibeibe zene hiazutkie ne reibeibe gum chang lei, kane kaningchingpeu leiria â chize teleu’mmi lu lei.

¹⁹Samsangsabe mui â bam bam gu lei, kane karasasabe leiria â tingkat hang runne lei.

²⁰Mâ-kesiabe tew gai ra chiampatme lung ge â kechoabe bam lei, kane mâ-keyibe tew ra ka’nningme lung ge â hesuiyibe bam lei.

²¹Kapelingme peireige â kesiabe keu gai mak lei, kane helungriaksiame â kahereube ne puigit ze bam lei.

²²Karasa mui ramme â, Tingwang suage katenetbe chang lei, kane lungsang pei gai ze tâtewgaime peireige pe suiyibe bam lei.

²³Mâ-’nsapchibe kau â, pe gu gechîbe hekâm zun ze kahekâm lei, kane kemieme â penui kemiebe tak ze pauliârua lei.

²⁴Ka’nrîbe kau ba ne samram gu lei, chipau luage karengabe kau je â, ’nchi-chine miramme guâ ’nggua ra pechu tew gai gu lei.

²⁵Ziemmena lung ge mi duânggabe bambe ziegene pechu pungkau gai lei, kane samyibe zene pe lungsuiyi’nta ra tew gai lei.

²⁶Katelingbe kau â kesiabe gene ka’mbia lei, kane helungriaksiame gu ’mpuî zene chime je nguakakezit lei.

²⁷Karengabe kau â pe gu heteu ruitâu lak lei, kane ka’nrîbe kau â, pemîhungbe heurâ ngau gu lei.

²⁸Kapelingbe ’mpuî ge keringbe bam lei, kane kemaube ’mpuî â kechaibe ge ngua gai lei.