Read Zeme Naga SAMREKUM 13 Bible Online

SAMREKUM 13 - Zeme Naga bible

SAMREKUM 13

¹Hename kaningchingbe kau â pe peu ne mâ-rangliabe ’ngking bam lei, kane kehichibe kau â, ka’ngngiambe sam ze ’ngking mak lei.

²Ziemmena keyibe kau â, pe mui rachî gene mâ-keyibe teu lei, kane kelutewchibe kau ne luneibe â, tewkakeleube ze de lei.

³Pe mui reîchi kau â pe gu keringbe reî ka’mmi lei; pemuirachibe kau â pe hangge tewka’nsiabe dau lei.

⁴Karengabe kau gu keringbe â mâ-teunei-desang ze, zai mâ de ngau mak lei, ka’nrîbe kau gu keringbe hangge â, mâ-mâ peipatdangting gai lei.

⁵Katelingbe kau â karasatewbe ngaugailak lei, kane helungriaksiabe kau â mi luîtewlabe benai ka’ngngambe tâ ze tew lei.

⁶Pe gu ’mpuî tatka’nzeibe kau je â kapelingbe ne pechu reî gu lei, kane hemui ne helungriaksiabe kau je tewkeu gai lei.

⁷Mihangkat ne lungyibe helîtew, kane pe dage mâ de ga lei; kêdapeu ne kelaksiabe helîtew, kane pe heu misongga bam lei.

⁸Ziemmena gu keringbe ’nrirabe mî ze â pe heu ze de lei, kane kelaksiabe kau â pechu ’nripatrabe mî hang ga lei.

⁹Kapelingbe kau gu kebabe â pa’mbi sireba ze bam lei, kane helungriaksiame gu kachâbung ze â tew’mmit kai bu lei.

¹⁰Ka’ntîngbe gabe keraichibe zene kahegeibe tewpat ka’nsui lei, kane kaladdeibe sam lume dage kaningchingbe bam lei.

¹¹Luakat ne mi heurâ kie ra ngaube â mit-mitne ze gakeu du lei, kane kecheî-cheîne kagetaipeu â chize tewpung gu lei.

¹²Heguîkualak saudibe ze â helung tewka’nrâ lei, kane mi keneibe tewpuigailube â mâ-keringbe bang de lei.

¹³Sam je ’nningka’nnabe kau â, pe runne pechu tew’nsiagaibe chang lei, kane samde je ’nning’nchukkaibe kau â, getoabehi ngau gu lei.

¹⁴Kaningchingme gu mâ-geteiliabe â keringbe depin de lei, chize ne kechaibe gu ’mpia ramme ’mbia le ra hangge zeu.

¹⁵’Nningchibeibe zene ka’nggiabe dau lei, kane ’nnumtewmakme ’mpuî â penui hereubambe ze de lei.

¹⁶Mâ-’nsapchibe kau â getaleine ge gechîbe gene tâtew lei, kane kemiebe kau â hegiêbibelam ze pa kemiebe tak ze teilia gai lei.

¹⁷Hepaupaupeu kesiabe kau ne ziemmena je kahereube ge chui gai lei, kane hepâupaupeu lungsangtewbe kau â, teleuka’mmibe teiwang gai lei.

¹⁸Mâ-rangliabe mâ-hang ’nninggaimakbe kau dage kelaksiabe benai tewkakengambe dau lei, kane ka’ngngiambe sam ze ’ngkingchibe kau je â, toa gai bei de lei.

¹⁹Mi keneibe tewpuilube â keringbe hangge yi lei; kane kesiabe gene keliktatdairabe ze â, kemieme hangge â katenetbe de lei.

²⁰Kaningchingme je kangua kau â ningching gu lei, kane kemieme kau je nguatâtewbe kau â, hereulie ra dau gu lei.

²¹Pausiabe ne kesiame chai guaka’nchu lei, kane katelingbe je â pung-ze-sabe ne toa gai bei de lei.

²²Ziemmena keyibe kau â, pe chaname hangge pe heurâ ze sâudiak kai lei, kane kesiame heurâ â katelingme hangge kaigekua gai lei.

²³Kelaksia kau gu pukeguagailube kedei gene hetak misongga ze ngau lei, kane tâ peling tewmakbe gene chize biakrittua ’ndi lei.

²⁴Hetui je zuibe kau â pe na je ngaugailak lei, kane pe na je kehungbe kau â pe na je dei ka’nri lei.

²⁵Katelingbe kau â pe lungwâng mâ teuchang lu lei, kane helungriaksiabe kau bungpui â ’njeilup bam lei.