Read Zeme Naga SAMREKUM 14 Bible Online

SAMREKUM 14 - Zeme Naga bible

SAMREKUM 14

¹’Mpuimi kaningchingbe kau ne pe ki ze teleu’mmichu lei, kane ’mpuimi kemiebe kau ne chize pe ba sing ne tewka’nsia lei.

²Ka’nzeibe ge tatbe kau ne Tingwang je hingchi lei, kane pe gu ’mpuî ge ’nningkatelambe kau â Tingwang je ’nningka’nna lei.

³Kemiebe kau gu samsa ze â, pe chingtua ge pechu lakrabe tui hang de lei. Kane kaningchingbe kau mui ne yirabe zeu hang teleu gai lei.

⁴Getumsei ramme gabe ge chêu du ga lei; kane getumsei ranchi ne chêu misongga wang lei.

⁵Sakki yisingbe kau â karasa sa mak lei, kane sakki ’nchuimakbe kau â karasa ’mmutpat lei.

⁶Kehichibe kau â, kaningchingbe ze peruânggabe gene peu lei, kane ningchingchibe ziemmena hang â, gechîbe ze sêulane la lei.

⁷Kemiebe kau bambe ge bam ta lau, chigene mâ-chîrabe sam hang ngau ra mak daseu.

⁸Mâ-’nsapchibe kau gu kaningchingbe â, pe gu ’mpuî hang peuchirabe ze lei, kane kemieme gu kemiebe tak â kechoabe ze de lei.

⁹Hera ne kesiame je â mâ-hang chak kai mak lei, kane ka’nzeime dage â pe suiyika’ntabe bam lei.

¹⁰Helung zene pe runne pe dage pe suisiabe bambe chî lei, zai hesangheluîchâmme ne pe gu hesuiyibe sam nguadamgaihâ me lei.

¹¹Helungriaksia kau ki â tew’ngga ’ndu lei, kane ziemmena ka’nzeibe kau gu hetiamki â yi ze bam gu lei.

¹²Ziemmena hangge yi ra gumbe ’mpuî hang la kam lei, kane hetûn ge â kechaibe ge nguagairabe kau lei.

¹³Ka’nnuibe ge ’nsangdu helung ge â mi suisiabe bam lei, zai misuiyibe pahekapbe ze â mi duânggabe ze lei.

¹⁴Pakeriângchâmbe kau ziemmena je â, pa neibe zat ramme zene peipuigit kai gu lei, zai ziemmena keyibe kau â, pe dagene patbe ramme zene peipuigit kai gu lei.

¹⁵’Mpangpaibe ziemmena â getaleine ge ’nnumka’mmi lei, kane mâ-ka’nsapbe kau â, pa ’ndaige tat mei be pie’mmi ze bam lei.

¹⁶Kaningchingbe ziemmena â mâ-’ntîng ze kesiabe gene ka’mbia lei, kane kemiebe kau â kagesutbe tew mak, zai pe deuzietew lei.

¹⁷Heraiduibe ziemmena â pe meî ’mbene tâtewchi lei, kane mâ-siechibe ziemmena â hereuliechi lei.

¹⁸’Mpangpaibe kau ne kemiebe lu lei, kane mâ-’nsapchibe kau je â haimena ne chikemak ga lei.

¹⁹Kesiame ne keyime suage keikeu lei, zai helungriaksiame â kapelingme gu keriekemui ge bam lei.

²⁰Kelaksiabe kau je â pe ramname ’nsangnedu ngauka’nrie lei, kane lungyibe kau â pe kangme misongga bam lei.

²¹Pe kiningme je ngauka’nnabe kau â kesiabe kau lei, kane kelaksiame je ngauka’nggiabe kau ze helungtemi gu lei.

²²Kesiatew gai ra ka’nningme ze penui kemaube tâ tewbe mak ti lau? Mâ-keyibe hangge ka’nningme je â, haimena ne ka’nchâbe benai ’nnumtewbe dau gu lei.

²³Tâtewka’nrîbe leine ge kegiebe lamui lei, kane hedeu runne dambe â garabe ge ngua gai lei.

²⁴Kaningchingme gu heguangpeichûp ze â, penui gu kaningchingbe ze de lei, kane kemieme gu mâpâ-teuria ze â kemiebe ze de lei.

²⁵Peling sakkitewbe zene keringbe je tew’nring gai lei, kane karasa sapatbe kau â kelutewpeu de lei.

²⁶Tingwang je hingchibe gene ziemmena helungdi ze bam lei, zai pe name hangge ’mbaibâm hang ngau gu lei.

²⁷Tingwang je hingchibe kau â keringbe depin de lei, chize ne kechaibe gu ’mpia ramme ’mbia le ra hangge zeu.

²⁸Heguang gu pengêudibe â, ziemmena baudi bambe ge bam lei, kane baudime gabe ge heguang du ga gai di tai lei.

²⁹Heraitiebe kau dage mâ-chika’ngkiebe bam lei, kane heraiduibe kau â kemiebe tak je toa lei.

³⁰Helung rengachaibe ne hepumsak yi ra tew gai lei, kane hemimeube zene mi ra ramme tew’nriam gai lei.

³¹Kelaksiabe kau je kagetadbe kau â, pechu Ka’ndampeu je tew-ra-tew lei, kane kegabe kau je ngauka’nggiabe kau â, pechu Ka’ndampeu ngeutew lei.

³²Helungriaksiabe kau â, tâ-kesiabe pa tewbe gene pechu tuâkeu gai bei de lei, kane kapelingbe kau â, pe lung ’ntiprip ze bambe gene pa ’mbaibâm ngau lu lei.

³³Mâ-’nningchibe kau lung ge kaningchingbe ’nnai bam lei, kane kemieme lung ge chize chî mak tai lei.

³⁴Pelingtewbe zene pezat je teichu lei, kane hemui â haimena hangge kesiabe tewbe chang lei.

³⁵Pezeu pie’mmi ze tâka’ngguapeu peireige heguang ne ka’nchâ lei, kane mi ngaudaulakbe tatew tewgaipeu peireige pe râta lei.