Read Zeme Naga SAMREKUM 15 Bible Online

SAMREKUM 15 - Zeme Naga bible

SAMREKUM 15

¹Samkakbe karenuabe zene, mi râtabe tei’mbiatua lu lei, kane samka’ntangbe zene helung tew’mpum gai lei.

²Ziemmena kaningchingme leiria ne mâ-gechîbe ’nzipat lei, kane ziemmena kemieme mui gene kemiebe tak ze ruîpat kai lei.

³Tingwang mik â pebâm leine ge bam lei, kesiabe benai keyibe je pie bam lei.

⁴Karenuabe leiria â mâ-keringbe bang de lei, kane heleiria ge kakeriângbe bambe zene helung ka’nningbe tewpâng gai lei.

⁵Kemiebe kau ne pe peu mâ-rangbe mâ-hang ’nning gai mak lei, kane yine ze kaladdeibe sam ’ngking’mmigaibe kau â, mâ-’nsapchibe kau de lei.

⁶Katelingbe kau ki ge keheube zat misongga bam lei, kane helungriaksiabe kau heurâ wanggaibe peireige tewkakeleube wang lei.

⁷Kaningchingme mui gene mâ-kechîbe ’nrukpat lei; kane ziemmena kemieme lung â chigum tew mak lei.

⁸Helungriaksiame gu herâtewbe peipatbe â, Tingwang hangge katenetbe chang lei, kane ka’nzeibe kau gu kakellumbe peireige pe suiyi lei.

⁹Helungriaksiame ’mpuî â, Tingwang hangge katenetbe chang lei, kane katelingbe je ka’nsabe kau je pa hung lei.

¹⁰’Mpuî tatsâu’ndibe kau peireige dei’nchuk kai ra la lei; zai ka’ngngiambe sam seusiabe kau â chai gu lei.

¹¹Kechaiberam benai tewka’nggabe bâm ’nsangdu Tingwang suage teilia ze bam dizai â, ’ndaizeuge ziemmena lung ze teilia ze bam mak ta ra lau!

¹²Kehichibe kau â peize pechu kiâgailak lei; zai kaningchingme dage pa zuamie ra mak lei.

¹³Helungsuiyibe ne hema rengachai ze bam ra tew gai lei, kane hesui kahereube ne helung ka’nningbe ze tewpâng gai lei.

¹⁴Mâ-’nningchipeu lung zene mâ-gechîbe je peurua lei, kane kemiebe mui â kemiebe teu ze bam lei.

¹⁵Kategabe lieme leine gu ringting ze â kesiabe kam lei, kane helung rengachai ze bampeu lung ge â ’ntaza bam lei.

¹⁶Mi heurâ misongga bam lu chige hereu ze bam ra sua â, Tingwang je hingchi lu kecheîne runne bambe yi’nteu lei.

¹⁷Kehungbe bambe gene gireuneu gi teube â, ngaugailakbe bambe ge getumsei ji chabe teube sua â yi’nteu lei.

¹⁸Heraisiabe kau ne kahegeibe tewpat kai lei, kane heraitiebe kau ne getube tewtemai gai lei.

¹⁹Karengabe kau tatbe ’mpuî â, hetu ramme ne tuâchimgit kai lei, kane ka’nzeibe kau gu ’mpuî â, puidi bekâmtenaibe chang lei.

²⁰Napoine kaningchingbe kau ne pe peu lungsui tewka’nta lei, kane kemiebe kau â pe pui je mâ-hang chak kai mak lei.

²¹Hejeuchimakbe kau hang â kemiebe ze pe suiyibe lei, kane hejeuchibe kau â ka’nzeibe ge tat lei.

²²Geteigaika’mmibe ga ze tâtew ra ka’mpungbe â mauchi lei, kane laddeirame misongga bambe ge penui tâtewpui gai lei.

²³Betâu-tâu ge samkakbe ze ziemmena hangge hesuiyibe lei, zai beting-ting hangge sam pakezei sabe ze yi run lei!

²⁴Ziemmena kaningchingbe kau gu ’mpuî zene keringbe lam’mbe nguachu gai lei, chidezai ’ngkang ’mbe bambe Kechaiberam ze pa ’mbia le ra hangge zeu.

²⁵Tingwang ne gechîrettewme ki ze rakeu gai lei, kane kemîpui gu herai ze tei’nggim gai lei.

²⁶Helungriaksiame gu ka’nningbe tak â, Tingwang dage katenetbe chang lei, penui lung ka’nchime gu sam â pe suî tewka’nta lei.

²⁷Kemakbe ’mpuî gene kegiebe ngau ra kadekumbe kau â, pe ki-kelak hangge kahereube tew gai lei, kane henim je ngaugailakbe kau â ring gu lei.

²⁸Kapelingbe kau â, samkak ra pe lung ge mâ-’nning’mmi gai lei, kane helungriaksiabe kau mui gene mâ-kesiabe ruîpat kai lei.

²⁹Tingwang â helungriaksiame dagene deutau bam lei, kane kapelingme kellum ze pa ’ngking ze bam lei.

³⁰Hema rengachaibe ne helungsui tew’nta gai lei, zai misuiyibe ne mi ra ramme tewringchim gai lei.

³¹Yi ze ladeibe sam pe kun ’ngking’mmilube kau â, kaningchingme ruage pa bam bam gu lei.

³²Mâ-rangbe sam je mâ-hang chakkaimakbe kau â, pe runne ze pechu ngauka’nna lei, kane yi ze laddeibe kuâ ka’ngkingbe kau â, mâ-chika’mmibe pa ngau gu lei.

³³Tingwang je hingchibe â, kaningchingme hangge â mâ-geteiliabe lei, zai hengêutewbe suage kecheiluîtewbe ne raîtat lei.