Read Zeme Naga SAMREKUM 16 Bible Online

SAMREKUM 16 - Zeme Naga bible

SAMREKUM 16

¹Helung gene tew ra ka’nningbe ramme ze â, ziemmena gu lei, kane heleiria gene samkakbe ze â, Tingwang dagene chang lei.

²Ziemmena â pe mikngau ge â, pe gu kebambe tak leine ’nchi kam lei, kane Tingwang ne helung ka’nningbe tak ze ka’ndeu lei.

³Ning tâ ze peize Tingwang ne chî ra peipat kai be lau, dezai ning tâ ’nranggaibe ramme ze tew’ntip kai gu lei.

⁴Tingwang ne mâgetaleine mâ-betâubambe hange tew gai bei de lei, helungriaksiabe kau ’nsangdu kahereube mai hangge tew gai lei.

⁵Gechîrettewbe kau leine â, Tingwang dage katenetbe chang lei, aize chî sing le lau, pechu tewsâ gai mak ta ra mak lei.

⁶Hekuapheube benai lungsangtewbe zene mauka’ndibe ge keyitew gai bei de lei, zai ziemmena Tingwang je hingchibe gezene kesiabe ka’mbia lei.

⁷Ziemmena ne Hera ’nning ge bamchi dege pe teureime du pe dage nguadesieyibe tew lu lei.

⁸Pelingtewmakbe gene pelâp ngaube rangkâng misongga bambe suane â, katelingbe ziegene kecheîne bambe ze yi’nteu lei.

⁹Ziemmena lung ka’nningbe zene pe gu ’mpuî hang ka’nrang lei, kane Tingwang ne pe pîma hangge tew’nzei gai lei.

¹⁰Hera ne gecheugaibe sam ze heguang mui ge bam lei, zai pe mui ne samram mau mak lei.

¹¹Peling ne mâ-ka’nchube benai hedu ka’nsambe ze â Tingwang gu lei, chiaka lungge perît bambe leine â pe tatew gu lei.

¹²Kesiabe tewrabe â heguang changme hangge katenetbe lei, heguang-bamrak ze â kapelingbe ne tei’nsapkaibe kau daseu.

¹³Peling samsabe mui ze heguang ne ka’nchâbe lei, zai ka’nzeibe sam sapeu je pa â hung lei.

¹⁴Heguang gu pe lumpumbe ze â, kechai-pâu paupeu ze de lei, zai ziemmena kaningchingbe kau â, aize kiâmhegei ze bam lei.

¹⁵Heguang ju karengabe ge ringlerabe bam lei, pe gu ngaukanggiabe â, heleiting tingruirabe hang heduipungbe kemâu gum lei.

¹⁶Gechâk ngaube sua â, kaningchingbe ngaube ze yi’nteu lei; zai gepût kelâng ra sua â, mâ-’nningchibe kelângderabe yi’nteu lei.

¹⁷Ka’nzeime gu puidi ze kesiabe gene keliktat lei; pe gu ’mpuî reîchibe kau ne pe gu keringbe ze teichi lei.

¹⁸Tewka’nggabe suage gechîrettewbe ne dau raî lei, zai kâutatrabe suage ka’ngngangbe ne dau raî lei.

¹⁹Gechîrettewme ruage hereichâ nguatimzirabe suadu kelaksiame ruage mi lung nakeu lu bamdibe yi’nteu lei.

²⁰Sam je ’ngkingchibe kau â pung-ze-sa gu lei, zai Tingwang je ’nnumtew ze bamme yi de lei.

²¹Helung ge kaningchingbe kau je â, keyi-kesia hezêupatchibe kau ze pechu ku lei, zai seuyibe samsa ne mâ-chîneibe tewpung gai lei.

²²Kaningchingbe bambe kau hang â, kaningchingbe ze keringbe depin lei, kane kemiebe ze â kemieme gu tewsabe de lei.

²³Kaningchingbe lung zene pa samsabe ge pemî bambe samsa hang tew gai bei de lei, zai pe mui ge sam tewchibe kaisuâ gai bei de lei.

²⁴Seuyibe sam ramme â ’ngkuiduipei gum lei, keringbe hangge kum zai hepumsak hang yi lei.

²⁵Ziemmena hangge yi ra gumbe ’mpuî hang la kam lei, kane hetûn ge â kechaibe ge nguagairabe kau lei.

²⁶Tâtewpeu pa kamereube zene pe hangge tâtew lei; pe mui ne pechu gechung’nrui bam lei.

²⁷Ziemmena ’nta kau â kesiatew gai ra kelutew lei, zai pe gu samsa tak â hemi getaube gum lei.

²⁸Ziemmena pakeriângchâmbe kau zene hegei ra hûrua gai lei, zai telumruachibe kau ne mi kang ka’ntipme je tewka’mpak lei.

²⁹Tingkangneibe kau ne pe ramna’mpeu je kemak ze ’mpuî yimakbe ge pechu ngua gai lei.

³⁰Pe mik gechingliabe kau ne mâ-gechâmbe tew ra ka’nning lei, zai pemuitai kelimgit kau â kesiabe teiwang ra tewchi lei.

³¹Hepeîtam pûbe â pengêudibe heguangpeichûp lei; chize â lungkatelingbe gene ngau lei.

³²Heraitiepeu â peranchipeu suane â yi’nteu lei, pe runne pechu gesutchipeu â, namdi ’nraklupeu suane â yi’nteu lei.

³³Mi-mige ne hedachak kai lei, kane samrampatkaibe leine ze â, Tingwang dagene runne pat lei.