Read Zeme Naga SAMREKUM 17 Bible Online

SAMREKUM 17 - Zeme Naga bible

SAMREKUM 17

¹Helung temichai ze tak ’ngkiateu ze bambe â, luuhimbambeki ge kahegeibe suane â yi’nteu lei.

²Kebang hangkat ningching ze tâtewpeu ne pe pau na, pe tatew ngaudaulakpeu peireige besuitew gu lei, zai pechu pe sikiname ’mpeumi ruage hangkat gum ze pe ki heurâ nguaheu ra ’nzi gai gu lei.

³Ziemmena hangge yira gumbe ’mpuî la kam lei, kane hetûn ge â kechaibe ge nguagairabe kau lei.

⁴Tâsiabe tewbe kau â, helungriaksiabe kau kuâ ramme ’ngkingka’nsui lei; zai karasa damchibe kau â, karasasabe leiria gu sam ’ngkingka’nsui lei.

⁵Kelaksiabe kau je teihenuitewbe kau â, pechu Ka’ndampeu je tew-ra-tew lei; zai miramme pe pausiabe luage pe suiyibe kau â, pechu tewsâ mak ze ta ra mak lei.

⁶Napoine misongga heluîhing ze bambe ze â, gechîngme gu heguangpeichûp lei, napoine ngeudibe ze â penui paume ramme ze de lei.

⁷Sam sazun sabe ze kemieme hangge â betâu hedau mak lei; samsabe tâumakbe ze heguang hangge hedau mak ’nteu lei.

⁸Rangkâng henim peibe â, chi peipeu mikngau ge heduaî chukâng gum chang lei; zai pa ne teigai-gaibe bâm ge tâtew’ndi ze bam lei.

⁹Kemaube kelunbepeu â kehungbe lunei lei, kane kemaube rasam pauruapeu â, mi kangpeu je du tewka’ndeu lei.

¹⁰Ka’ngngiambe sam seugut ra lua haî kat lakkaibeipeu, kemiepeu dage sua â, ziemmena mâ-siechipeu dage ka’ngngiambe sam seugut-tâu’nteu lei.

¹¹Ziemmena kesiabe kau â, ’nggî-kahegeibe hang runne peu lei, zai ka’nggiabe ga ze hepâupaupeu je pe dage lang gai gu lei.

¹²Mige hangkat ne kemiebe kau je pa kemiebe bâm gene hedau ra sua â, hegumpui bepoine ramme suibepui je peize hedau lau.

¹³Mige ziemmena mâ-kesiabe ne mâ-keyibe hang peiruî dizai â, pe ki gene kesiabe ze ’mbiatat ra mak lei.

¹⁴Hegeipatchuraibe â hedui titbe gum lei; chidaze hegeipat makge yi dai de lau.

¹⁵Helungriaksiabe kau je châu’nzeigaibe benai ziemmena katelingbe kau je chau’ngkuigaibe â, kena ze Tingwang dage katenetbe chang lei.

¹⁶Kemiebe kau pe lung mâ-ka’nningbe ga ze ’ndaigum ze kaningchingbe lui ra pe ba ge pemî hang kai ra lau?

¹⁷Mi kangpui-peu â mi je pehî’nsangne ge hung lei, zai mi sikina hangkat ze â, mi je tewhereugairabe hang lungkeu gai lei.

¹⁸Ziemmena pe besuitewmakbe kau â, mâ-’nchunggaileube tak tewchi lei, zai haîmapa gene pa ne mâ-mâ tew ra samhatkaichi lei.

¹⁹Hede ’ngkagaineibe kau â tewkeleugaineibe kau de lei; pe gu kemui tewka’ngngube kau â, tewka’nsiabe wang ra lunei lei.

²⁰Ziemmena pe lungriak châmbe kau â ’ntuachu ra mak lei, zai pe sam puakelichibe leiria pungbe kau â, kahereube ge kêugaichi lei.

²¹Pe miêradibe napoine bambe â, pe peu hangge pe duânggabe chang lei; zai kemiebe kau peu changme â pe dage hesuiyibe ga lei.

²²Helungsuiyika’ntabe â reheuyibe chang lei, kane mi lungsuisiabe ne mi ra ramme tewchangku gai bei de lei.

²³Helungriaksiabe kau â, samramka’nzeibe-sie tewteguak kai ra henim ’ngkim luteu lei.

²⁴Mâ-’nningchibe ziemmena â, kaningchingbe lam’mbe pe ma ’nrik bam lei, kane kemiebe kau mik â, kedeimik deulang ’mbe pie bam lei.

²⁵Kemiebe napoine bambe â, pe peu hangge pe suikahereube chang lei, zai pechu lungkeupui hangge pe lunggailak-kadesangbe chang lei.

²⁶Ziemmena katelingbe kau peireige ’nchi-chine ’nzuakiebe â, yi mak lei; zai ziemmena hengêupeibuibe kau je lakkagetiebe â tâu mak lei.

²⁷Pa sam gesutchibe kau dage mâ-gechîbe la lei, zai mige lunghegeigâk bambe kau â mâ-siechibe ziemmena lei.

²⁸Kemiebe kau je ’nsangdu pe kuâneu mak ze bambe kau je â, kaningchingbe kau hang riam gai bei de lei; zai pe mui kelimgit ze bambe lua â, mâ ’nningchibe kau hangge pechu riam gai bei de lei.