Read Zeme Naga SAMREKUM 19 Bible Online

SAMREKUM 19 - Zeme Naga bible

SAMREKUM 19

¹Lungsangtew ze kelaksia ze bambepeu â, ziemmena hangkat pe sam keriângkube kau, kemiebe kau suadu â yi’nteu lei.

²Mâ-chîmeluisui ze bambe â ziemmena hang yi mak lei, zai pe ma-hegua’nteu ’ndi kau â pe gu ’mpuî tatmauchi lei.

³Ziemmena pa kemiebe ziegene pe gu ’mpuî tew’nsia kam gai lu dege pe lung gene Tingwang peireige ki’nsiagaichi lei.

⁴Mi heu ne mi kang karchibe misongga ze nguawang gai lei, kane kelaksiabe kau â pe kang ’nsangnedu pechu sâu gai bei tai lei.

⁵Karasa ne sakkitewbe kau ze â, pechu tewsâ gai mak ze ta ra mak lei, zai sam karasa dambe kau ze pak’mbiapat ra mak lei.

⁶Pa ’nggiadibe kau taige â haimena ne ka’mpuî lei, pe gu kela peipatchipeu hang â haimena ze pe kang kam de lei.

⁷Kelaksiabe kau je â, pe sikiname ’nteumena ne ’nsangdu ngaugailak lei; ’ndaizeuge pe kangme pe dagene deu de ra lau! Kuâlêu lau, kuâlêu lau, ze penui je guaka’nsa de lei, kane penui je peu dai lak tai lei.

⁸Kaningchingbe ngaulube kau â pe runne pechu hung lei; zai mâ-’nningchibe bambe kau â, lung’ntua gu lei.

⁹Karasa ne sakkitewbe kau je â tewsâ mak ze ta ra mak lei, zai karasa dambe kau â ga gu lei.

¹⁰Kemiebe kau ne lungyime gum ze ’nnangmeluisui ze bam ra â, bui me lei, kebang ne heguang name peireige samram ra hang â, bui mak’nteu de lei.

¹¹Mâ-siechibe bambe ne ziemmena heraitie ra tew gai lei, zai kemaube peireige gesutkaibe ze pa pe ngeudibe de lei.

¹²Heguang pe lumpumbe â duilui ka’nrabe gum lei, kane pa ne ngaukanggiabe ze â, timpeizeu peireige kezik bambe gum lei.

¹³Kemiebe napoine bambe â, pe peu hangge tew’nsiarabe kau de lei, zai henâu changpui gu samtuchibe â tingzaube riâ de lei.

¹⁴Heki benai mi heurâ â, mi paume dagene nguaheu ra ngaube kau lei, kane henâu hechai-hesua hang mâ-’nsapchipui â, Tingwang dagene ngaube kau lei.

¹⁵Karengabe lungtak zene jeihungkeu gai ra tew gai bei de lei, zai ziemmena karengabe kau â ’ngkîm ze bam gu lei.

¹⁶Samde ’nzaîchibe kau â pe gu keringbe je reîchi lei; zai sam je ’nningka’nnabe kau â chai gu lei.

¹⁷Kelaksiame je mâ-’nggiapatchibe kau â Tingwang je hepukkaileu de lei, zai pe tatew peireige pa ne pechu peiruî gu lei.

¹⁸Heguî ra bambe luage ning na je ngualaddei lau; pechu tew’nsiarabe ge ning lung pei gai se lau.

¹⁹Ziemmena pe raisiabe kau â gesâbe lie gu lei, pechu nang lupat kai dizai â pechu nang mâge â tew gai dai ra ’nnang gu lei.

²⁰Geteiliagaibe ’ngking lau, zai rangliabe lutei lau, bechâng hangge kaningchingbe nang ngau le ra hangge zeu.

²¹Ziemmena lung ge tâtew ra ka’nningbe misongga ze bam lei, kane chiramme tewpatrabe ze â Tingwang ne chirabe lei.

²²Ziemmena ne ka’nchâbe ze â mi telui-luibe ze de lei. Karasa sachipeu suane â kelaksiapeu â yibi lei.

²³Tingwang je hingchibe ne keringbe ge ngua gai lei; zai chize pe dage bam-bambe kau â, temi ze pe lungwângchang ze bam lei; pe dage â tewkahereube dau ra mak lei.

²⁴Karengabe kau â, hekuak ge pe ba kerigailube pe mui ge ’nsangdu pangchu gai ra mak lei.

²⁵Kehichibe kau je lak kai be lau, dezai ’mpangpaibe kau ne keyibe chî du lei; mâ-’nningchibe kau ziemmena je kiâ gai be lau, dezai pa chî’nteu du lei.

²⁶Pe peu je geikangbe kau, zai pe pui je kumtuabe kau â, ka’ngngambe benai heji siabe teiwangbe chang lei.

²⁷A na gau, kaningchingbe sam ramme gene tatlie de ra run zai â, geteiliabe sam ze ’ngking ta du lau.

²⁸Peruânggabe sakkitewbe â ka’nzeibe-sie je hepâ-henuitewbe chang lei, helungriaksiabe kau mui ne hemui-helut ’nzua gai lei.

²⁹Teikeliangchime hangge chau’ngkuigairabe kaikua gai lei, zai kemieme chingtua ge lakkaibe hangge du chau’ngkuigairabe kaikua lei.