Read Zeme Naga SAMREKUM 2 Bible Online

SAMREKUM 2 - Zeme Naga bible

SAMREKUM 2

¹A na gau, a sam ramme nang ne ’nchâ zai â, a gu samde peigaibe ramme ning dage kaigekua gai ze,

²kaningchingbe lam ge ning kun ’ndua lu, zai mâ-chî’mmirabe hangge ning lung kai ze bam dizai â,

³eu lei, ’nningchi ra hangge nang ’nrung, zai chî’mmirabe hangge nang ning kuâ pat kai zai â,

⁴zai chize gepût je gum ze nang peu, zai mi heu baigaibe hangge gum ze nang peu dizai aî;

⁵Tingwang je kehingbe ’ndaikau hang mei be nang chîdesi gu, zai Hera je gechîbe nang ngau gu lei.

⁶Tingwang ne kaningchingbe pei gai daseu; pe muiki gene mâ-gechîbe benai chika’mmibe pat lei;

⁷ka’nzeibe kau hangge kaningchingbe keyibe ze pa ne kaigekua gai lei, lungsang ne tatme hangge pa ne hinggei chang de lei,

⁸ka’nzeibe ne samrambe ’mpuî ze pa ne reheiheka, zai pe gu ziemmena ka’nchime ’mpuî ze pa ne reheiheka bam lei.

⁹Chidezai katelingbe benai pelingtewbe tak zai hingde teichibe tak, zai ’mpuî keyibe leine ze nang chîdesi gu lei;

¹⁰kaningchingbe ne ning lung ge gut ze, zai gechîbe ne ning gu keringbe je tew’ngngup kai gu lei;

¹¹hejeupiechibe tak zene ningchu pie bam gu lei; chika’mmibe ne ningchu reî bam gu lei;

¹²kesiabe ’mpuî gene, zai sam sa’nteuchime ziemmename dagene ningchu lupat kai ze,

¹³zai kemuîbe ’mpuî ge tat kai ra hangge katelingbe ’mpuî ramme sâu ’ndime,

¹⁴mâ-kesiabe tâ tewgaineime benai kesiabe tâ tewbe ge penui lungwângchangme dagene lupat kai gu lei;

¹⁵’mpuî ka’ngkuibe ramme ge tatme, zai penui ’mpuîki ramme teguakrik ze bamme dagene lupat kai zeu.

¹⁶Kahailapui, pe hang runne chîbepui gu samniamyibe gene,

¹⁷pa hena’ngka ting gu pe kanghiâ-tewme je sâu nan ze pe Rapeu gu sam hatkaibe ’ngngaî’ndipui dagene ningchu tew’nringpat kai bu lei;

¹⁸pe ki â kechaibe ge kêugut kai lei, zai pe gu pa’mpuiki ramme â, kemuîbe kezui ge gut kai lei;

¹⁹pe dage tatme leine mî de wang dai mak lei, zai keringbe ’mpuî ramme penui ngau dai mak lei.

²⁰Chigum nang â keyime ’mpuî ge tat ra lei, zai katelingme ’mpuîki nang suichi ra lei.

²¹Ziemmena ka’nzeime ne heram ge bam gu lei, zai ziemmena lungsangtewme ne chige bam bam gu lei,

²²kane helungriaksiame je â, heram gene penui je tew’ngga kam ’ndu, zai kesiabe kelutewme je â chigene kelitua ’ndu lei.