Read Zeme Naga SAMREKUM 20 Bible Online

SAMREKUM 20 - Zeme Naga bible

SAMREKUM 20

¹Hezau â keliang ra tewgaichibe kau, zai hezau â mi je tewkebienggaichibe kau lei; chize ne nguakezitkai’ndibe kau â, kaningchingbe kau mak lei.

²Heguang lumpum mi kehingbe ze â duilui ne ka’nrabe riâ de lei; mige pe lumpum-tâbe kau â mâ marak ngau lei.

³Mige ’nggî-kahegeibe gene bam’ndeudibe kau â, pe ji yibe chang lei; kane kemiebe kau leine â nguakahegei lei.

⁴Karengabe kau â hekarâting ge helu pu mak lei; hechit ting ge pa gat kai ra ngau ra mak lei.

⁵Ziemmena mâ-tew ra ’nning ze bambe â hedui gechukbe gum lei, kane mâ-gechîme ne chize tuak ku lei.

⁶Ziemmena misonggame ne penui gu-gu mâ-pelingtewbe ze latrua lei, kane ziemmena lungsangtewbe kau je châu ne peupat dui lau?

⁷Ziemmena katelingbe kau lungsangsing ne— tâtewbe kau ’ndaizeuge pe name pe chaige lungtemi ze bam ra lau?

⁸Samrambe heguang-bamrak ge ka’ntaube heguang â pe mik ne kesiabe leine chî lu lei.

⁹Châu ne, “I a lung tew’nchichiak lu de lei; zai a gu hemui gene I â ’nchi lu de lei,” ze acheuchidui lau?

¹⁰Periâ chang’mmi mak ze mâ-ka’nchube benai mâ-ka’ndeube aibe kena ze Tingwang dage katenetbe kam lei.

¹¹Napoine ’nsangdu pe tatew ramme gene pa telungtak ze chî lu lei, pe tâtewbe ze peling kau mei zai tâube kau mei be zeu.

¹²Geseube kun benai kengaube mik aibe kena ze â, Tingwang ne tew gai bei de lei.

¹³Jeichibe je ’nchâ se lau, makchai â nang kelaksia gu lei; ning mik ze rakreu bam lau, dezai teu ra misongga nang ngau gu lei.

¹⁴Mâ-keluibe kau ne, “Aize â siabe kau lei, aize â siabe kau lei,” kacheu da, kane pa tat lu dege â pa’nrîmyi bam de lei.

¹⁵Gechâk benai tingchu pemîhungbe dangsang la lei; kane mâ-gechîme mui ramme ze â, teluichu pemîhungbe ramme de lei.

¹⁶Hesangheluîchâmbe kau hangkatpeu gu hepâu ze hangkat zene ruî gai ra hatkai’ndibe luage pe paî tei ne lau, zai hesangkedeume gu hepâu ze aipaupeu zene ruî ra pa hatbe luage ’nchunggaileube gu gene pechu nîm le lau.

¹⁷Choapatlube tingku â ziemmena hangge kum lei, kane mâtiege mak ze pe mui ge hegitmoîne ne puigit bam du lei.

¹⁸Miramme je helak ze tâtew ra ’nrang lau, nang herei ra zai â geteiliabe kuâ lu lau.

¹⁹Tatrua ze keluaichibe kau ne hekimsam ramme a latliachi lei; chidaze pe kuâkie kau je ngua se lau.

²⁰Mige pe peu je mei nune pe pui je mei desetkaibe kau je â, pe gu hemibung ze tew’mmit kam gai gu lei.

²¹Bepîbang ge keluakkelat ze mi heurâ ngaube â, hetûn ge ’nnam gai be ra mak lei.

²²“Kesiabe ne I peiruî gu lei,” ze acheu se lau; Tingwang je kuârî lau, zai pa ne ningchu ’ngngâ gu lei.

²³Mâ-periâ ’ndeuchang’mmimakbe ramme ze â, mâ-ka’ndeube kerua ze Tingwang dage katenetbe chang lei, pelingmakbe ramme â yi mak lei.

²⁴Ziemmena ’mpuî ramme â Tingwang ne tei lei; chidizai â ’ndaigum ze ziemmena ne pe gu ’mpuîrabe ze chî’mmi le ra lau?

²⁵’Nning’mmi mak ze luakatne, “Aize ’nchi lei,” ze kacheube, zai deseutewlube châng gene ’nningdesidairabe â, ziemmena hangge ’mpia chang lei.

²⁶Heguang kaningchingpeu ne helungriaksiame je kakelap lei, zai penui peireige timriangpigua ’ngkua gai lei.

²⁷Ziemmena gu helung suî ze â Tingwang hangge hemibung chang lei, pe lungsîng ge bambe zat ramme leine peu de lei.

²⁸Helung peigaibe benai lungsangtewbe ziegene heguang yi ze bam lu lei, zai pe gu heguang-bâm â katelingbe ziegene tei’nsap ze bam lei.

²⁹Rehangme ngeudibe ze â penui pumranchibe ze de lei, kane gechipaume ngeudibe ze â penui peîtam pûbe ze de lei.

³⁰Tewjâmgaibe zene kesiabe huitua lei; zai lakkagetiebe zene mi lung sîng ge bambe ramme tew’nchi gai lei.