Read Zeme Naga SAMREKUM 21 Bible Online

SAMREKUM 21 - Zeme Naga bible

SAMREKUM 21

¹Heguang lung â Tingwang ba ge bambe ’nggeuki de lei; pa ne nei-nei ’mbe luatat ra tew gai lei.

²Ziemmena ne pe gu pa kebambe tak leine ze pe hang-hangge yi kam ze bam lei, kane Tingwang ne helung ze ka’ndeu lei.

³Katelingbe tâ tewbe benai ka’nzeibe tâ tewbe â, herâtewbe peipatbe suadu Tingwang ne ’nchâ ka’nteu lei.

⁴Keditewbe mik benai helungriaksiame gu kachâbung, gechîrettewbe lung â hemui lei.

⁵Ka’nrîme ne tâtew ra ’nning’ntuazun-gaibe â, perachî misongga ze ngau sing ra chang lei, kane kakeluakme â pe hangge kagekumbe dau gu lei.

⁶Choachibe leiria ziegene mi heurâ ngaube ramme â, kemuangrâ ziakra bambe benai kechaibe ’mpia de lei.

⁷Helungriaksiame gu katîmphibe ramme zene penui je biaktua kam ’ndu lei, mâ-ka’nzeibe penui tewgailakbe ziegeneu.

⁸Kemaube kau gu ’mpuî â ’ngkuirui ze bam lei, kane pelingtewme kebambe tak â ka’nzei lei.

⁹’Mpuimi pe kuâkiepui je kilûng ge nguabam ra sua â, heki’mpûm ge ’nrua lu bamdibe yi lei.

¹⁰Helungriaksiabe kau gu mâ-ka’nningbe â kesiabe je ka’nchâ lei; zai pe ramna’mpeu peireige ngau’nggia mak lei.

¹¹Kehichibe kau je tewsâ gai bei dege, ’mpangpaibe kau ne ningching di-di lei; kaningchingbe kau je â mâ-rang gai bei dege chî di-di lei.

¹²Katelingbe kau ne helungriaksiabe kau ki peireige ’nchat ze pie bam lei; helungriaksiame ze â gaderabe ge tuâpat kai bei lei.

¹³Kelaksiame kuâ ’ngkingmakbe kau â pa ze du ’nrung gu lei, zai pe kuâ mî de seu ra mak lei.

¹⁴Reine ze peibe kela ne mi lumpumbe ze tew’ngga lu lei, zai paîlim kang gene henimpeibe gene helumpum-kadesangbe ze tew’ngga lu lei.

¹⁵Ka’nzeibe tâ tewgaibeibe ge katelingme ne penui suiyi lei, kane tâ-kesiabe tewme ne penui lungrîn-rîn ze bam lei.

¹⁶Mâ-’nningchibe lam ge kelamtambe kau â, kechaime ka’nduibe ruage bam gu lei.

¹⁷Pe sui-pedeuzietew ze bamneibe kau â, kelaksiabe kau chang gu lei; zai wain benai mâ-châdui je ka’nchâbe kau â lungyi ra mak lei.

¹⁸Katelingme je ’nripatrabe mî hangge helungriaksiame ne penui runne penui je tew gai lei, zai helungka’nzeime je du penui choâsiame ne chipau luirun ze tew gai de lei.

¹⁹’Mpuimi sianeibe kau, zai pe châkkerâksakbe kau je nguabam ra sua â, tingkangram ge bamdibe du yi lei.

²⁰Kerua pemîhungbe ramme ze kaningchingpeu bambe bâm ge bam bam lei, kane ziemmena kemiebe kau â chize teu kam nan tai lei.

²¹Katelingbe benai ’nggiachibe je guaka’nsabe kau â, keringbe benai hengêutew ngau gu lei.

²²Kaningchingbe kau ne peranchime gu namdi gu kerie ’nzakchu ze penui ’nnumtewduibe keriengdi ze tew’nsia gu lei.

²³Mi-mige pe mui benai pe leiria reîchibe kau â, kahereube gene pe runne ze pechu tei’mbia lu lei.

²⁴“Teikeliangchibe,” kacheube ze ziemmena gechîrettewbe kau benai ka’ngngangbe kau ji de lei, gechî-keditewbe gene tâtewpeu zeu.

²⁵Pe ba ne tâtew’nrîgailak ze, pa ’ntakûne bamneibe ziegene pechu tewchat te lei.

²⁶Tingnaimikpui tâluî helungriaksiame dekum ze bam lei, kane katelingbe kau â mâ de kebai mak ze pei ze bam lei.

²⁷Helungriaksiabe kau ne herâtewbe peipatbe â katenetbe chang lei; siarabe hang chikâ lu ze chize teiwang dezai ’ndaizeuge tenet ’nteu ra lau.

²⁸Karasa ne sakkitewbe â ga gai du lei, kane sam ’ngking ka’mmibe kau gu sam â bam bam gu lei.

²⁹Ziemmena helungriaksiabe kau â, pe ma ge kuugiereube ju punglia lei, kane ziemmena ka’nzeibe kau â, pe gu ’mpuî ramme ’nning’mmi je bam lei.

³⁰Tingwang ne neimakbe ge, kaningchingbe, mâ-gechîbe, geteiliabe, airamme zene mâ de tewdaichi lak lei.

³¹Hekun â hereirabe mai hangge kedâ gai ze bam lei, kane keduîbe ze â Tingwang gu lei.