Read Zeme Naga SAMREKUM 22 Bible Online

SAMREKUM 22 - Zeme Naga bible

SAMREKUM 22

¹Mi heu misongga bam ra sua â heji yibe kelâng ra lei, zai gechâk benai gepût sua â ngauka’nggiabe yi’nteu lei.

²Lungyime benai kelaksiame hedaukaherua lei; Tingwang ze penui ’nteumena je ka’ndampeu lei.

³Mâ-’nsapchibe kau â kehingbe ngau lu ze pe runne ka’mbai lei; kane ’mpangpaibe kau â tatbe luî ze tat bam lei, zai hereulie ra dau lei.

⁴Kecheiluilungpungbe benai Tingwang je hingchibe peireige toagaibe hî ze â keheube, hengêutewbe zai keringbe lei.

⁵Hetu ramme benai ’mpia ramme â, pakeriângchâmbe kau ’mpuî ge bam lei; pe runne pechu reîchibe kau â chiramme gene bamka’ndeu lei.

⁶Napoine je pa tatsingrabe ’mpuî ge nguageteichu gai be lau, zai pa chîngchu dezai chigene pa tatchâm ra mak lei.

⁷Lungyime ne kelaksiame peireige penui suitew lei, zai kahepukpeu â hepukkaipeu gu kebang chang lei.

⁸Pelingtewmakbe linggaibe kau â, mi duânggabe pausiabe gat ku lei, zai pa pe râtabe hetui ze ’ntakû gai du lei.

⁹Ngau’nggiachime je â ’nnam gai bu lei, zai kelaksiame je pe gu tingku nguateu bei daseu.

¹⁰Kehichibe kau je kelitua ne lau, dezai kahegeibe ga du lei, zai tuneibe kau je kelitua ne lau, dezai ngau’nna ta du lei.

¹¹Helungka’nchibe je ka’nchâbe kau, zai pe samniamyibe kau â, heguang ze pe kang chang gu lei.

¹²Tingwang mik â mâ-gechîbe peireige pie bam lei, kane ka’nnumbe game gu sam ramme â tuâpat kai gu lei.

¹³Karengabe kau ne, “Hela ge duilui la lei! Keloaning ge achu ’nsia gai gu de lei!” ze kacheu de lei.

¹⁴’Mpuimi kahailapui mui â mâ-kuiki chukbe de lei; pe peireige Tingwang ne pe lumpum ze bambepeu zene chige kau gai gu lei.

¹⁵Napoine lung ge kemiebe tak ze rat kai ’ndi de lei, kane pechu kedeibe hetui zene pa kemiebe pe dagene kedeu ’mbe kumtua lei.

¹⁶Mige pe heurâ tewpat’ngkie nei ze kelaksiame je kagetat mei nune lungyime je mâ-pei mei, chigumbe kau â kegabe dau gu lei.

¹⁷Ning kun ’ndualie gai lau, zai kaningchingme gu sam ’ngking le lau, zai ning lung ge a gu gechîbe teigut kai lau;

¹⁸ning lung ge chiramme nang tei dizaine â, zai chiramme pelane ning mui ge teleukua ze bam dizai â, ning lungsui yi gu lei.

¹⁹Chiramme nemai ge ningchu I salia bei de lei, nang ’nnumka’mmibe ze Tingwang ge kai le ra hangge zeu.

²⁰Laddeibe sam benai gechîbe sam sagaibe ramme himreu ze ning hangge I raw gai mak ti lau,

²¹ning hangge ’ndaibe ze ka’nzei mei, zai kagesang mei be ze teilia ra, chidezai ningchu langgaime je sam peling ne nang kakchi le ra hangge zeu?

²²Kelaksiabe kau je pa kelaksiabe ziegene pechu sut se lau, zai keriekemui ge kagetadbe lieme je du tewsâ se lau;

²³Tingwang ne penui getube ze sagaihâ gu, zai sut-teume je pa ne penui keringbe sut-tat ku lei.

²⁴Ziemmena heraisiabe kau je ning kangtew se lau, zai ziemmena pe râtachibe kau je du ngua se lau,

²⁵pe gu ’mpuî ramme nang sui gu, zai ning runne ze ning gu ’mpia ge mi gai mak ra hangge zeu.

²⁶Miramme gu hepâupungbe peiruî dai ra samhatkaichime ruage nang â gut se lau.

²⁷Nang ne peiruîrabe zat hang mâ de ga dizai â, ’ndaitew ze nang jeibe gene ning jeî ze chaktat ne ra lau?

²⁸Ning paume ne ’ndâ gu heramrai chukâng kai’ndibe ze puikeli se lau.

²⁹Ziemmena pe tâ ge karemingbe kau je nang ngau mei? Pa â heguangme suage sap ku lei, ziemmena ketadau kau ramme suage pa sap ra mak lei.