Read Zeme Naga SAMREKUM 23 Bible Online

SAMREKUM 23 - Zeme Naga bible

SAMREKUM 23

¹Ziemmena rezieteibe kau je nang mâ-nguateu ra ’ntaukeu dezai, ning suage ’ndaikau la mei be ’nchat’mmi ze ’nchat lau;

²zai nang mâ-teube ge gesutlakbe kau ziemmena zai â, ning ku ge têgareîne kai be lau.

³Mâ-mâ teuyibe ramme pa kaibe ze ’nchâ se lau, chiramme ze â ningchu choarabe hetak ramme de lei.

⁴Mi heurâ ngau ra hangge tâ aipau detew-tew se lau; sau’ntakrabe chiam hang chî le lau.

⁵Ning mik ne chige piezatkaibe luage chize tat kam di laleu de lei; luakatne chize pekan ramme hang pat lu, tinggîm ’mbe keliengrie gum ze liamtat ti de lei.

⁶Ziemmena pe gu mâ-tingbe kau gu hetak ze teu se lau; pe gu mâ-teuyibe ramme ’nchie se lau;

⁷pa â pe lung ge tak mî riam ze bambe kau gum lei, “Teu lau, sak lau” ze ningchu kacheu de lei; kane pe lung â ning dage ga lei.

⁸Nang mâ-teugailube ze ’nruîpat dai gu lei, zai pechu ning suiyibe sam ramme ze ’ntakû gai du de lei.

⁹Kemiebe kau kunseu ge sam salia se lau, ning sam ge kaningchingbe ze mâ-hang chak kai mak tau gu lei.

¹⁰’Ndâ ting gu heramrai chukâng ze puikeli se lau, zai bepeugame gu helu ge du gut kai se lau;

¹¹penui je meupatkaipeu â peranchibe kau de lei; ning peireige hetû kaibe ze pa ne penui hang sagaihâ gu daseu.

¹²Rangliabe sam ze ning lung ge ’nningmmi le lau, zai gechîbe sam lam ge ning kun ’ndualie le lau.

¹³Napoine je kedeibe ze ’ngngîn se lau; hetui ne pechu nang lak bei sedu pa chai ra mak lei.

¹⁴Hetui ne pechu nang lak tizai â, Kechaiberam gene pa keringbe ze nang ne tew’nringpat kai gu lei.

¹⁵A na gau, ning lung ge ’nching zai â, a lung ge du a suiyi gu lei.

¹⁶Ning mui ge ka’nzeibe nang sa gai dizai â, a keringbe ne pe suiyi’nta gu lei.

¹⁷Peize ning lung ne kahemuime je hemimeu se lau, kane tingnaimikpui tâluî Tingwang je kehingbe ge bam lau.

¹⁸Bechâng dezai beting dau sing gu lei, zai nang kaheguîbe ze tew’ngga ra mak lei.

¹⁹A na gau, ’ngking ze ningching le lau, zai nang bambe ’mpuî ge ning lung tew’nzei le lau.

²⁰Wain teûsuame ruage mei, zai hemei teûsuame ruage mei ze bam se lau;

²¹hezau kameneume benai keteube gesutlakbe â, kelaksiabe dau gu lei, zai kang’ngnguibe ne ziemmena je â, paîrie siabe ne bâ gai gu daseu.

²²Ning peu ningchu lungkeupeu kuâ ze ’ngking le lau, zai ning pui je du pa chîng di dezai, pechu ’nning’nna se lau.

²³Samsang lui le lau, zai chize zua se lau; zai kaningchingbe, mâ-geteiliabe zai mâ-gechîbe lui le lau.

²⁴Katelingbe kau peu â pe suiyi’nta-desang gu lei; zai pe na kaningchingbe kau je lungkeupeu â, pe peireige pe suiyi gu lei.

²⁵Peize ning peu benai ning pui â penai suiyi ze bam lau, ningchu lungkeupui je peize pe suiyi’nta lau.

²⁶A na gau, ning lung achu pei gai lau, zai ning mik ne a ’mpuî ramme peize pie’mmi bam lau.

²⁷Pe pum zuateupui â mâ-kuiki gechukbe kau de lei; zai ’mpuimi kahailapui â dekuaki tebittîtbe gum lei.

²⁸Mâ-hegasut-teume gum pa â lîmkua bam lei, zai ziemmena ruage ’nnumtewmakme je tewpung gai bam lei.

²⁹Châu pe duângga ze bam lau? Châu pe lunghereu ze bam lau? Châu ’nggîhegei ze bam lau? Châu ki’nrui ze bam lau? Mâ de tew mak ze châu kahejam lau? Châu pe mik gieria ze bam lau?

³⁰Hezau ge putlakme, hezauhaibe ’ndâu gai ra tatme bau ze de lei.

³¹Wain gie ze hepiak ge bambe luage, hepiak ge ta-pri-ri ze bambe luage, zai ruîpat ze luahuai-huai bambe luage pie se lau.

³²Hetûn ge â henêu gum ze ka’ngkî lei, zai mechinêu gum ze ka’nsâu lei.

³³Ning mik ne mâ-mâ gechâmbe zat ramme ngau gu, zai mâ-mâ ramme ning lung ge ’nningkedetda-dabe ramme ze pat ku lei.

³⁴Sungkling zuilung ge jeikaugaibe kau gum, hedui’nnei ge mâ-ra bambe peireige jeikaube riâ gum nang bam du lei.

³⁵“Penui ne achu lak bei, kane achu tew’nteu mak; penui ne achu bêu bei, kane I â deîtaube chî mak lei. ’Ndaitewbe luage I ’nrakchu ra lau? Piak kat I peu dai gu rei lei,” ze nang acheu gu lei.