Read Zeme Naga SAMREKUM 24 Bible Online

SAMREKUM 24 - Zeme Naga bible

SAMREKUM 24

¹Ziemmena kesiame peireige ning lunggailak bam se lau; zai penui ruage du bamnei se lau;

²penui lung ge katîmphibe tâ tew ra ’nning, zai penui mui ne mâ-kesiabe damchi daseu.

³Kaningchingbe zene heki ze tew gai lei, zai chîka’mmibe zene chize tew’ntip kai bei lei;

⁴gechîbe zene hekisiâm ramme ge mi heurâ pemîhungbe benai peluiyibe ramme tewpui gai bei de lei.

⁵Ziemmena kaningchingbe kau â, ziemmena peranchipeu suadu chi’nteu lei, zai peranchipeu suadu gechîbe bampeu â, chi’nteu lei;

⁶ngualia’nchichiakkaibe gene nang herei ge gutchi duî lei, zai nguagetei ra misongga bambe ge keduîbe bam lei.

⁷Kemiebe kau hangge kaningchingbe â huran di lei; keriekemui ge pa mâ-dam mak lei.

⁸Mâ-kesiatew ra ka’nningbe kau ziemmena je â tewkakeleupeu lei, ze pechu kû gu lei.

⁹Kemiebe tatew hang ka’nningbe â hemui lei, zai kehichibe â ziemmename hangge katenetbe chang lei.

¹⁰Ka’nggibe daube mai ge nang ’nning’ngnginsin ze bam dizai â ning ranchi cham lei.

¹¹Tewchat kai ra nguatattime je meupat kai lau; kegîme dage kâugaidime je tei dai ne lau.

¹²Nang ne, “Pie le lau, aize anui â chî mak run de lei,” ze acheu dizai â, mi lung ze ka’nchupeu ne chize ngau mak ta ra semei? Ning gu keringbe kereîpeu ne chize chî mak ta ra semei? Zai pa ne ziemmena je pe tatew luigum ze peiruî dai mak ta ra semei?

¹³A na gau, ’ngkuidui sak lau, chize yi daseu, zai ’ngkuichîap gene pedui zâukeube ze ning mui ge kum lei.

¹⁴Kaningchingbe ze ning gu keringbe hangge chigum de lei be chî le lau; chize nang ngau zai â, bechâng ge ning hang yi gu lei, zai nang kaheguîbe du tud kai ra mak lei.

¹⁵Helungriaksiabe kau gum ze ziemmena katelingme ki peireige rikkua bam se lau; pa bambeki tewkeleu gai se lau;

¹⁶ziemmena katelingbe kau â, lua sena riâ kâukeu sedu chigene pa chu dai dai lei; kane helungriaksiabe kau je â, pausiabe ne tewkeu gai bei de lei.

¹⁷Ning teureipeu kâugaibe luage ning suiyi’nta se lau, zai pa ’nrap lu kau gai dezai peize ning lung suiyi se lau;

¹⁸Tingwang ne chize ngau lu ze pe suisia mak ra, zai pe lumpumbe chipaupeu dagene tei’mbia gai dai mak ra hangge zeu.

¹⁹Tâ-kesiabe tewme ziegene ’nninghereu se lau, zai helungriaksiame je ngaugailak se lau;

²⁰ziemmena kesiabe kau â, bechâng hangge ’nnumtew ra ga lei; zai helungriaksiame gu kachâbung â tew’mmit ’ndu lei.

²¹A na gau, Tingwang benai heguang je hingchi lau, zai penai kuâ pheu mak ze bam se lau;

²²penai dagene kahereube ’nnangwang gu lei, zai penai dagene dei’nsiarabe patrabe châu ne chî ra lau?

²³Airamme ze du ziemmena kaningchingme ne sagaibe sam ramme de lei. Samrambe ge kehungkanrietewbe yi mak lei.

²⁴Mi-mige ne helungriaksiabe kau je, “Nang â kemaube ga lei,” kacheube kau je â, ziemmena zat leine ne pechu deset kai gu, zai heramzatme ne pechu ’nneî-’nrie gu lei;

²⁵kane helungriaksiabe kau je ka’ngngiamme â, penui lungsuiyibe dau gu lei, zai penui peireige ’nnamgaibe keyibe bam gu lei.

²⁶Sam kaktaupeu â mi muitai kakeput lei.

²⁷Hela ge ning gu tâ ze kedâ le lau, helu ge mâgetaleine ning hang teleu kam gai le lau, chipau châng dezai ning ki tew lau.

²⁸Patedeu mâ de ga ze ning ramna’mpeu peireige sakkitew gai se lau, zai ning mui zene choa se lau.

²⁹“A peireige pa tew gum ze I du pe peireige tew gu lei; zai pa ’ndaikau tew gai mei be luî ge I du peiruî gu lei,” ze acheu se lau.

³⁰Karengabe kau gu helu benai ziemmena sie chimakbe kau gu grepchî merie I tatpelatat te lei;

³¹zai pie le lau, hetu ne chize zinting laleu de lei; zai kedei ze ’mbubang ramme ne chûm kam ’ndi de lei, zai rieguabe tingchurie ze kâu kam di de lei.

³²Chidadege chize I ngau lu dege ’nningchi lak ze bam lei; I ngau gai dege achu mâ-geteiliagaibe hang dau de lei.

³³Kecheîne jei gai zai kecheîne jeitup kai, mi ba ’ntuisiak lu kecheîne saugaibe ge,

³⁴zai sut-teupeu gum ze ning peireige kelaksiabe wang gu lei, zai hereipuâ kailube kau gum ze kegabe ning dage wang gu lei.