Read Zeme Naga SAMREKUM 25 Bible Online

SAMREKUM 25 - Zeme Naga bible

SAMREKUM 25

¹Airamme ze du Solomonbe gu samrekum ramme lei, Judaram heguang Hezekiabe gu ziemmename ne rawkeligaidiakbe ramme lei.

²Hera ne mâ-mâ teika’mbaibe ze Hera pengêudibe chang lei, kane heguangme pengêudibe ze â, mâ-mâ peupatkaibe ze lei.

³Tinggîm hudibe benai kedei chuktibe gum ze heguang changme mâ-ka’nningbe tak â peupatchi lak lei.

⁴Gepût gene betakrie lutua ne lau, chidezai gepûtluapeu hangge heli tewrabe gepût yibe ngau le ra hangge zeu;

⁵heguang masua gene helungriaksiabe kau je lutua ne lau, dezai pe gu heguang-bamrak ze kapelingbe gene tei’nsap le ra hangge zeu.

⁶Heguang bambe masua sing ge bam se lau, makchai ziemmena kedime bambe bâm ge sap se lau;

⁷“Aige wang ze ’ntau lau,” acheu sagaibeibe â, heguang suagene ningchu tew’ngngamgairabe suane â, yi’nteu gu daseu. Ning mik ne ngaulube ze

⁸keluakkelat samrambeki ge teiwang gai se lau; nâlangbe ge â ning ramna’mpeu ne ningchu tew’ngngam gai dizaine â, nang ’ndaikau tewsua dai ra lau?

⁹Ning gu deu ze ning ramna’mpeu dage tu lau, zai miramme gu hekimsam ze latpat kai se lau;

¹⁰makchai â ningchu ka’ngkingpeu ne ningchu tew’ngngam gai bei ze ning ji sia bam gu lei.

¹¹Sam satâuka’mmibe â, gepût lungge gechâk ne appilchî luî tewbe gum lei.

¹²Pe kun seuchime hangge â, kaningchingbe ne ka’ngngiambe â gechâk kunchei mei nune gechâkteuria mei be gum lei.

¹³Hechitting ge kebun kahegeibe gum ze lungsangtewpeu hepâupaupeu â, pechu langgaime hangge chang lei, pa ne pe paume lungsui tewrechida gai bei de lei.

¹⁴Ziemmena mige kela pei ra hegiêsie ze sa gai lu pei mak taibe kau â, kemâu ramme benai tingkai hedui pungmakbe gum lei.

¹⁵Hereuliechibe ne samrampeu suî tew’mmi dai dui lei, heleiria karenuabe ne mi ra ze tewbat ku lei.

¹⁶’Ngkuidui nang ngau dizai â, ning hang kebuibe riâ ge runne sak lau, makchai â nang chize ne ning ningsia ze ’nruî gu lei.

¹⁷Ning ramna’mpeu ki ge dekigut’mpai bi lau, makchai â ningchu pa ngaulei di ze ’nrie du lei.

¹⁸Pe ramna’mpeu peireige karasa ne sakkitewbe kau ziemmena â, kahereibe chingdâng mei, nune hiazutkie mei, nune bai’mpitu pemuiliabe kau mei be gum lei.

¹⁹Mi kahereube luage lungsanggabe kau ziemmena je ’nnumka’mmibe â hegeu siabe gum lei, makchai hepî chaîlîk’ndibe riâ de lei.

²⁰Pe lungkahereupeu suage heleu ramme tewliapeu â, mige kahegeibe mai ge paî gâupatkaibe gum lei, zai hejâm ge wain hiabe ruîgaibe gum lei.

²¹Ning teurei kau ’njei dizai â, pechu pa mâ-teu ra pei be lau; zai pa herei dizai â, pechu hedui sak ra pei be lau;

²²nang ne pe peî ge hemi mechingkâng kai ra daseu, dezai Tingwang ne ningchu ning hî hang pei gu lei.

²³Tingpeî ’mbia gu tingkai ne tingruibe teiwang gai lei; chigum ze tiakchibe leiria ne helumpumbe mikpie hang tew gai lei.

²⁴’Mpuimi pe kuâkiepui je kilûng ge nguabam ra sua â heki’mpûm ge ’nrua lu bamdibe yi lei.

²⁵Heram kedeu ’mbene misuiyibe mâ-rasam keyibe seube â, hedui kahereibe kau hangge hedui kahegeibe gum lei.

²⁶Ziemmena kapelingbe kau ne kesiame je hezeu peigaibe â tewhenau’ndibe geuki mei nune tewhebâ’ndibe depin mei be gum lei.

²⁷’Ngkuidui teu’ngkie ra yi me lei, chigum ze getoabe sam du peize cham lau.

²⁸Ziemmena pe runne pechu reîchilakbe kau â, namdi kâu di ze kerie ramme gabe gum de lei.