Read Zeme Naga SAMREKUM 26 Bible Online

SAMREKUM 26 - Zeme Naga bible

SAMREKUM 26

¹Kepuakting ge kebunkeube benai, hechiting ge tingruibe pakezei makbe gum ze kemiebe kau je hengêutewbe â pakezei mak lei.

²’Ngkînepui ne tâunak kai du mak ze liamrai-rai bam gum, zai (’nruipoine) liamkehuairua bambe gum ze patedeu ga ze desetkaibe â wangchangmakchi lei.

³Hekun hangge kegitrabe ria, zai hekunmerângne hangge hegeîdâng ka’nnang lei, chigum ze kemieme chingtua hangge hetui ka’nnang lei.

⁴Kemiebe kau je pa kemiebe tak luî ze kak se lau, makchai â nang du pa gum ze chang gu lei.

⁵Kemiebe kau je pa kemiebe luigum ze kak lau, chimakchai â pe mikngau ge runne pechu kaningchingbe kau hangge chak kai gu lei.

⁶Kemiebe kau ba ge samkela ’mputkaipeu â, pe runne ne pe pî dângtua de lei, zai mâ-tewkakeleube dui pa sak lei.

⁷Pe pîsiapeu pî ’ntane zâu bam gum ze, kemieme mui ge samrekum ze bam lei.

⁸Kemiebe kau je hengêutew kau â, bai’mpireu ge tingchukâng retkaipeu gum de lei.

⁹Kemieme mui ge samrekum bambe â, kameneupeu ba ne hetu lupatbe riâ de lei.

¹⁰Mige tatka’ngguakme kemiebe kau mei, nune kameneube kau mei je tâtew ra puîbe kau â, hetu kapchipeu ne haimena je kapjâmkamgaibeipeu gum de lei.

¹¹Kemiebe kau ne pa kemiebe tâ sau mak ze tewbambe â, hetei ne pa ’nruîgailube ge helatwangkadaibe gum de lei.

¹²Ziemmena pe mikngau ge pe runne kaningchingbe hang chakkaibe kau nang ngau mei? Chipaupeu hang sua â kemiepeu hang yi’nteu dai gu lei.

¹³Karengabe kau ne, “’Mpuiki ge duilui lamui lei! Puidi ge duilui la lei!” kacheu de lei.

¹⁴’Ngkam-’nnak (kopza) gene ’ngkam kedat-ka’nrui gum ze karengabe kau ze pe jeî gene jei kedat-’nrui bam lei.

¹⁵Karengabe kau ne hekuak ge pe ba keri gai lei; chize pe mui ge pangchu gai ra du leisei tai lei.

¹⁶Ziemmena hangsena samkakzun ze kakchime sua â, karenga kau ze â pe runne pe mikngau ge pa â ningching ’nteu ze bam lei.

¹⁷Pe hangge mâ pedeu ga ze miramme kahegeibe ge kebutchibe kau â, hetei tatruabe tei je pe kun gene teipeu riâ de lei.

¹⁸Ziemmena kemiebe kau hangkat ne hemi mesumpui, bai’mpitu zai chairabe tuâgaibe riâ de lei,

¹⁹ziemmena mige pe ramna’mpeu je choa gai lu, “I â keliang gai lei,” ze kacheube nung ai.

²⁰Heching gadibe ziegene hemika’mmit lei; chigum ze kesiabe sam telumruachibe kau gabe ge kahegeibe sau lei.

²¹Dekeikâng gene hemi heibe gum, zai heching gene hemi taube gum ze mâ-tuchime dagene kahegeibe â melaipat lei.

²²Mâ-telumchibe kau sam ramme â mâ-teuyine gum lei; chiramme mi lungsîng ge gutchang lei.

²³Helungriaksiabe pung lu pe mui chabe â, hegamli ze gepût bâ ne zuâplinglube gum lei.

²⁴Miramme je ngaugailakbe kau â pe mui kelimgit bamchi lei, zai pe lung ge kechoabe banggit kai lei;

²⁵pa yine ze mâ-sa dezai pechu ’nnum’mmi se lau, pe lung ge ngaukatenetbe ramme sena la daseu;

²⁶pa ngaugailakmakbe helîtew ze bam sedu pe lungriaksiabe tak ze pebaume wangka’nduibe ge teilia bu lei.

²⁷Mâ-kuiki supeu ne chige keu gai gu lei, zai tingchu ’ngkuagaipeu dage tingchu ’ngkuawang dai gu lei.

²⁸Karasa leiria ne pa sa’nsiagai’ndime je pa ngaugailak lei, zai mi ’ntanedamchibe mui zene mâ tâ tew’nsia kam gai lei.