Read Zeme Naga SAMREKUM 28 Bible Online

SAMREKUM 28 - Zeme Naga bible

SAMREKUM 28

¹Helungriaksiame â, mige ne penui je gua’nsa mak sedu pak pak lei, kane pelingtewme â duilui gum ze kuugiereu bam lei.

²Heram zene mâ-tewmau gai dege chige samramme misongga ze pat lei; kane ziemmena mâ-siechime benai mâ-gechîme bambe ge samrambe-sie ’ntiprip ze bam bam lei.

³Kelaksiabe kau ziemmena ne kelaksiame kêdame je kagetadbe â, tingsît ruiwang ze mâ-mera biaktuabe gum lei.

⁴Hingde suimakme ne helungriaksiame je toa lei, kane hingde suime ne chime je ka’nggi lei.

⁵Ziemmena kesiame â mâ-pelingtewbe ze ’nningchi mak lei, kane Tingwang je gepeume â chize chîkadesi lei.

⁶Ziemmena lungyipeu pe gu ’mpuî tattâumakbe kau sua â, ziemmena kelaksiabe kau lungsangtew ze tatbe kau â yibi lei.

⁷Hingde teichibe kau â kaningchingbe napoine de lei, kane mâ-teusuame je pe kangtewbe kau â, pe peu je tewka’ngngam lei.

⁸Mige pechinglube benai pa’ntua kaisuabe gene pe heurâ ge bausîgaibe kau â, (miramme) kelaksiame je ka’nggiabe kau hangge chize tei’ndui gai de lei.

⁹Mige hingde gu sam ka’ngkingbe gene pe kun ’nreitatibe kau â, pa kakellumbe ’nsangdu katenetbe chang lei.

¹⁰Mige ka’nzeibe kau je kesiabe ’mpuî ge ngua’mmiegaibe kau â, pa ne sugailube mâ-kuiki ge keu gai gu lei; kane hetiâkgabe kau ne mâ-keyibe nguaheu gu lei.

¹¹Ziemmena lungyibe kau â, pe mikngau ge runne pa kaningching lei, kane ziemmena kelaksiabe kau mâ-siechibe kau ne pechu ngaupat ku lei.

¹²Mâ-pelingtewme ne duîwang dege, pengêudi-kadesangbe bam lei; kane helungriaksiame ne dichu bei dege, ziemmena penui runne ka’mbai lei.

¹³Mige pe tâsiabe kakebaibe kau â lungchu ra mak lei, kane chiramme ze salia ze sâugai’ndibe kau â, ka’nggiabe ngau gu lei.

¹⁴Pehî ’nsangne ge Tingwang je hingchibe kau yi de lei; kane pe lung tewka’ngkube kau â, pausiabe ge keu gai gu lei.

¹⁵Kelaksiame peireige samrampeu, helungriaksiapeu â pe kuâ ka’nrabe duiluipui, zai mi je katingkangbe hegum riâ de lei.

¹⁶Rezieteipeu, mâ-gechîbe chambe kau â, pa tegarâsiapeu de lei; kane pelingmakbe gene kegiebe ngaube je lugailakbe kau â, pe gu kering ting tew’ntie gai gu lei.

¹⁷Ziemmena mi ge miramme je pa ne tewchatbe tûdeu pungbe kau â, kechaibe riâ peize kezitruapeu chang ze bam lau; mi ne peize pechu ’ngngâ se leu.

¹⁸Lungsangtew ze tatbe kau je â ’nripat kai gu lei, kane pe gu ’mpuî ramme ge tattâumakbe kau â, mâ-kuiki ge keu gai gu lei.

¹⁹Pe gu kedei ge tâtewbe kau â teu ra misongga ngau gu lei, kane peruânggabe tâ ramme ge suibe kau â, kelaksia-desang gu lei.

²⁰Ziemmena lungsangtewbe kau â, ’nnamgaibe ne puigit ze bam gu lei, kane keluakkelat ze lungyi ra tewbe kau je â, tewsâ mak ze ta ra mak lei.

²¹Kehungkanrietewbe â yi mak lei; kane tingkukâng kat hanggene ziemmena mâ-tewmau gu lei.

²²Pe gu mâ-tingbe kau â pe heu ngau ra kelua ze tew lei, zai pe peireige kegabe wang gu lei be pa chî mak lei.

²³Pe leiria ne miramme ruâgetoachibe kau suanedu miramme je ’ngngiamchibe kau ne bechâng ge yi’nteu laleu gu lei.

²⁴Mige pe pui mei, pe peu mei gu sutteu lu, “Chize â mâ-kesiabe ka’nzûbe tâ tewbe kau mak lei,” ze kacheube kau â ziemmena mâ-tew’nsiachibe kau kangpeu lei.

²⁵Ziemmena kadekumbe kau â hegei ra tewpatkaichi lei, kane Tingwang ge ’nnumtewbe kau â lungyi ra tew gai gu lei.

²⁶Mige pe lung ka’nningbe ge runne ’nnumtewbe kau â, kemiebe kau lei; kane mige kaningchingbe ge tatbe kau je â lupat kai bu lei.

²⁷Mige kelaksiame je mâ-peibe kau â, ’ngga bam ra mak lei, kane kelaksiame je piezat du makbe kau â, misongga desetkaibe ngau gu lei.

²⁸Helungriaksiame ne dichu dege, ziemmename penui runne ze ka’mbai lei, kane chime ga gai di dege, katelingme kiebi-bi pat lei.