Read Zeme Naga SAMREKUM 29 Bible Online

SAMREKUM 29 - Zeme Naga bible

SAMREKUM 29

¹Mige pechu ’ngngiam bei seu mak pe kunrachibe bambe kau je â, kelua ze tew’nsiazut kai bu lei.

²Katelingme ne rezietei ze bam dege baudime penui suiyika’nta lei; kane helungriaksiame ne samram bei dege baudime ne huaipun tai lei.

³Kaningchingbe je ka’nchâbe kau ne pe peu suigut tewchi lei, kane hepumzuateume je kangzangtewbe kau ne pe heu kezittua lei.

⁴Pelingtewbe gene heguang ne heram ze tei’nsap’mmi ra chang lei, kane henim luteuchibe kau ne heram tewkauchi lei.

⁵Ziemmena pe ramna’mpeu ruâ-getoachibe kau â, pe pî mi ra chiâk pa lîm gai de lei.

⁶Ziemmena kesiabe kau â pa hedieka’ngkabe zene ’mpia chang ze mi gai lei, kane ziemmena katelingbe kau â, heleuzie ze pe suî’nta bam lei.

⁷Ziemmena katelingbe kau â, kelaksiame gu ka’nzeibe chî lei; ziemmena helungriaksiabe kau â aigumbe mâ-gechîbe pe dage ga lei.

⁸Kehichibe kau ramme zene namdi ze tewpedap kai lei, kane ziemmena kaningchingme ne mi râtabe ze tewhegei gai lei.

⁹Ziemmena kaningchingbe kau ne kemiebe kau dage samhepen dizai â, kemiebe kau â pe râta-desang gu, zai ’nnui gu lei, zai zîng ze bam ra mak lei.

¹⁰Ziemmena hejai kahereime â, pemâugabe kau je ngaugailak lei, zai helungriaksiame pe gu keringbe je tew’ngga ra peu lei.

¹¹Kemiebe kau â pe lumpumbe ze liâpatkamchi lei, kane ziemmena kaningchingbe kau â, pe kuâneu mak ze gesut kai ’ndi lei.

¹²Rezieteibe kau ne karasa sam ’ngking dizai â, pe kumme leine â penui tatew siame chang kam du lei.

¹³Ziemmena kelaksiabe kau benai kategabe kau hangna hedaukaherua lei; Tingwang ne penai mik tewreba gai bei de lei.

¹⁴Heguang ne kelaksiame peireige peling ne samram gai dizai â, pe gu heguang-bamrak ze betingbeta hangge tew’ntiprip kai bu lei.

¹⁵Hetui benai ka’ngngiambe ne kaningchingbe pei gai lei, kane napoine je pe runne ze pe sui-sui tew ra peigaibe â, pe pui je tew’ngngam gai lei.

¹⁶Helungriaksiame ne rezietei ze bam dege tâ-kesiabe tewbe ramme kiebi-bi patchi lei; kane katelingme ne penui kâukeurabe ze piekua gu lei.

¹⁷Ning na je laddei’mmi lau, dezai pa ne ningchu katemibe pei gu lei; zai pa ne ning lungsui yi ra pei gu lei.

¹⁸Hera gu sam rangliaka’ntuabe gabe bâm ge baudime penui runne reîchi lak ze bam lei, kane hingde ze teika’mmibe kau ze yi de lei.

¹⁹Sam runne ne â tâka’ngguapeu je laddeichi lak lei, pa chî lu sede pe lung pei gai ra mak lei.

²⁰Pe sam kagechube kau ziemmena je nang ngau mei? Chigumbe kau hang suane â, kemiebe kau hang â kaheguîbe kie’nteu ze la lei.

²¹Pe gu tâka’ngguabe kau je hena’ngka gene tela ze ka’nsibe kau â nâlangbe ge pe heurâ ngau gu lei.

²²Ziemmena pe lumpumchibe kau ne hegei ra tewpatkaichi lei, zai pe lumpumbe kau ne siaka’nzûbe tâ misongga ze tew gai lei.

²³Ziemmena pa gechîrettewbe zene pechu tew’nchei gai gu lei, kane pa pe lungsui ka’nningbe tak ge kecheiluîtewbe kau â hengêutewbe ngau gu lei.

²⁴Mâ-kahega kau je nguakangzangtewbe kau â, pe runne pa keringbe je ngaugailak lei; pe peireige desetkaibe sam ze pa seu de lei, kane mâ de ralia mak lei.

²⁵Ziemmena je kehingbe â, ’mpia tewgaibe chang lei, kane Tingwang je ’nnumka’mmibe kau â, zeûne ze bam gu lei.

²⁶Misonggame ne rezieteipeu dage buâ lei, kane ziemmena â, Tingwang dagene samram ka’nzeibe ngau lei.

²⁷Ziemmena pelingmakbe kau â, kapelingme hangge katenetbe chang lei, kane ’nzeitun ze tatbe kau â, helungriaksiame hangge katenetbe chang lei.