Read Zeme Naga SAMREKUM 3 Bible Online

SAMREKUM 3 - Zeme Naga bible

SAMREKUM 3

¹A na gau, I geteiliabe sam ze nang ’ngngaî se lau, kane a gu samde ramme ze ning lung ge kai’mmi le lau;

²chiramme zene ning gu keringbe tingkum misongga ze tew’ntie gai gu, zai pung-ze-sarabe ningchu pei gu lei.

³Peize hekuâpheube benai lungsangtewbe zene ningchu sâu gai se lau; chiramme ze ning guang ge ’nteu gai le lau, ning lungchêu ge chiramme ze raw gai le lau.

⁴Chigumbe ne Hera benai ziemmena mikngau ge ka’nchâbe benai heji yibe nang ngau gu lei.

⁵Ning lung leine ne Tingwang je ’nnum’mmi lau, nang gechîbe runne ge ’nnumtew se lau.

⁶Ning tâ’mpuî leine ge pechu chibam lau, dezai ning gu ’mpuî ramme pa ne tew’nzei gai gu lei.

⁷Ning mikngau hangge runne nang ningching ze bam se lau; Tingwang je hingchi lau, zai kesiabe gene ’mbia de lau.

⁸Chize ning pum hangge tewka’mmibe hang chang gu, zai ning ra ramme bamyirabe hang chang gu lei.

⁹Ning gu kebambe ramme benai ning gu mâ-hîmra ’nchikeuraibe ramme zene Tingwang ngeutew lau;

¹⁰dezai ning gu ’nseu ge misongga ze tewpui gai gu, zai ning gu grepchî kaibe bung ramme ze wain ne pigit bam gu lei.

¹¹A na gau, Tingwang gu besie geteiliabe ’nning’nna se lau, zai pa ka’ngngiambe ze du lugailak se lau,

¹²pe peu ne pe na pa kehungpeu je tew’nzei gai gum ze, Tingwang ne pa kehungbe kau je â ka’ngngiam daseu.

¹³Kaningchingbe ngaulube kau benai pe dage chika’mmibe bambe ziemmena ze helungtemi gu lei,

¹⁴chigene kegiebe ngaube â, gepût gene kegiebe ngaube suanedu yi’nteu lei, zai chigene pelâp ngaube â, gechâk gene pelâp ngaube suadu yi’nteu lei.

¹⁵Kaningchingbe â, teluichu ramme suadu pemîhung ’nteu lei, zai nang luneibe zat ne du kaningchingbe je mâ de teikedachi lak lei.

¹⁶Ringtierabe ze pe ba hezat’mbia ba ge la lei; zai pe ba heku’mbia ba ge keheube benai hengêutewbe la lei.

¹⁷Kaningchingbe ’mpuî ramme â helungsuiyibe ’mpuî lei, zai chipau ’mpuî ramme â lungkatemibe misuiyibe lei.

¹⁸Kaningchingbe teilume hang â, kaningchingbe ze pe hangge keringbe chingbang chang lei; zai kaningchingbe je ’nggui’ntiplume ze helungkatemibe kau lei, ze ku lei.

¹⁹Tingwang kaningchingbe gezene kedei ze tewchu gai bei de lei; zai mâ-chika’mmibe gezene tingkehube ramme tei’nsap kai de lei;

²⁰pa mâ-gechîbe ne sungkling gechukbe ramme lua ra tew gai bei, zai kemâu ramme gene kezik kêu ra tew gai bei de lei.

²¹A na gau, kaningchingbe keyibe benai mâ-siechibe tei’mmi lau; ning mikngau gene peize chize rimna se lau,

²²chibe kena ze ning hangge keringbe chang gu, zai ning guang ge heteu peluiyibe hang chang gu lei.

²³Chidezai nang ning gu ’mpuî tatbe ge zêune ze tat ku, zai ning pî mâ-’nrap ra mak lei.

²⁴Nang ’ntau dezai du mâ de hing ra mak lei; zai nang jeikau gai dezai nang jeiyi-desang gu lei.

²⁵Luakat ne mâ-hingbe wangbe je nang hing se lau, zai tingkai kechibe gumbe ne helungriaksiame je tewka’nggabe wangbe je nang â hing se lau;

²⁶Tingwang zene ning lungtewdirabe bangpui hang de lei, zai ning pî mirabe gene pa ne tei’mbia gai gu lei.

²⁷Tâtew ra ning dage rezie bambe luage mâ-keyibe ngaurabe kau dagene mâ-keyibe bai se lau.

²⁸Mâ-keyibe ning dage bambe luage ning ramna’mpeu suage, “Tat lu ze wang dai lau, ’nchuamai ne ningchu chize pei gu lei,” ze acheu se lau.

²⁹Ningchu ’nnumtew ze ning hiage bambe kau, ning ramna’mpeu peireige kesiabe tew ra ’nning se lau.

³⁰Patedeu ga ze ningchu mâ de kesiatewmakbe kau je hegei se lau.

³¹Ziemmena pategâradibe kau je ’nchie se lau, zai pa tebamtak katte nang â kelâng se lau;

³²ziemmena pakeriângchâmbe kau â Tingwang dage katenetbe kau chang lei, kane ziemmena ka’nzeime je â pa ne ’nnumtew lei.

³³Helungriaksiame ki peireige Tingwang gu desetkaibe â bam lei, kane ziemmena katelingme bambe bâm ge pa ne ’nnam gai lei.

³⁴Miramme je ngaugailakme je â pa ne penui je du ngaugailak lei, kane kecheiluilung pungme je â pa ne ngaukanggiabe pei gai lei.

³⁵Ziemmena kaningchingme â pengêudibe nguaheu gu lei, kane ziemmena kemiebe kau â, ka’ngngambe ngau gu lei.