Read Zeme Naga SAMREKUM 30 Bible Online

SAMREKUM 30 - Zeme Naga bible

SAMREKUM 30

¹Massa’mpeu Jakebe na Agurbe gu sam ramme. Chipaupeu ne Ithielbe, Ithielbe benai Ukalbe suage sa lei:

²I ziemmena changbe ze ’nta-gesang run de lei. Zai I â a dage ziemmena mâ-siechibe ga lei.

³Kaningchingbe I getei le mak lei, ’Nchilangbe Hangkat je gechîbe du a dage ga lei.

⁴Châu tinggîm ’mbe chu lu wangkeu kadai lau? Châu tingkai je ’nzum lu lau? Châu hedui ze paî ne dum lu lau? Châu ne kedei gu pa’nrai ramme kai lau? Pe ji ’ndaikau lau, zai pe na ji ’ndaikau lau? Nang chî sing lei! kacheu de lei.

⁵Hera gu sam leine â gesang lei be ze ’nchetpat te lei; pa ge ’nseugaime hangge pa â hinggei chang lei.

⁶Pe sam ramme ge kaisuâ se lau, makchai â pa ne ningchu ’ngngiam gu, zai karasasabe kau nang chang gu lei.

⁷Ning dagene mâ kena I kie lei; I chaimakbe suage chiramme ze achu ’ngkim se lau:

⁸A dagene mâ-peruânggabe benai karasasabe tei’ndeu ne lau; achu â kelaksiabe du keheube du pei gai se lau; a hang ka’nnangbe hetak ne achu kei bam lau,

⁹makchai â I ’nggeu lu ningchu ’ngkim ze, “Tingwang ze châu lau?” ze I acheu gu rei lei, nune I kelaksia lu mâ-hegateu gu, dezai a Rapeu ji I sahebâ gu rei de lei.

¹⁰Pe pau suage tâka’ngguapeu je sa’nsia se lau, makchai â pa ne ningchu deset kai gu, zai nang ’ngkui gu lei.

¹¹Ziemmena penui peume je chianggaichime, zai penui puime je du ’nnamgaimakme bau la lei.

¹²Ziemmena penui mikngau hangge runne ’nchi ze bamme la lei, kane penui gu kahebâbe mâ de teleu’nchi mak lei.

¹³Ziemmena pe mik ne rehutau ze, penui mik rakgetîng ze bamme la lei!

¹⁴Ziemmena penui geu ramme hiazutkie benai hekiepoine ramme chang ze bamme la lei, kelaksiame je kedeirei gene tew’ngga ’nde ra, kegame je ziemmename ruagene tew’ngga ’nde ra hangge zeu.

¹⁵Timbat pa ne napatlube bepuipoine kena bam lei, penai ne, “Pei lau, pei lau,” acheu ze ka’nra lei. Mâ-kechum â mâdau du penui lungwângchang mak lei; zai mâ-medai zene mâdau du “Bui de lei,” ze acheu makbe:

¹⁶Kechaiberam, henagabe nebâm, kedei ne hedui saknei ze bam-bambe, zai mâdau du, “Bui de lei,” acheu samakbe hemi ze de lei.

¹⁷Pe peu je tewliachibe mikcheu benai pe penui je mâ-hang chakkaimakbe mikcheu ze â, peningkâm ge bambe ’nggek ramme ne kuipatkai bei ze chize lawai ramme ne teu ’ndu lei.

¹⁸A hangge mâ-mâ ’nningdaulakbe zat kechum lamui lei; mâ-zat medai I ’nningchilakbe ze:

¹⁹tinggîm ge keliengrie liamruabe tak, tingchukâng ge henêu ka’ngngaibe tak, duinei sungkling kedibe ge ’ntîtatbe tak, zai ’mpeumi heleu’mpui dage bambe tak, airamme ze de lei.

²⁰’Mpuimi kahemapui bambe tak â ai de lei: pa mâ-teu gai lu, zai pe muitai nui’nchi gai lu dege, “I â mâ de mau gai me lei,” ze kacheu de lei.

²¹Mâ-mâ zat kechum kang gene kedei kakedun lei; mâ-zat medai kangge ze liechilakbe bambe:

²²kebang ne pa heguang ra chang dege, zai kemiebe kau ne tak teu’nggeugit lu dege;

²³meilakpui ne pe napeu hang ngau lu dege, zai tâka’ngguapui ne pe pai kelei leî dai ra chang dege, airamme zeu.

²⁴Kedeirei ge mâ-kecheibe medai lamui lei, kane chiramme â ’nching-kadesangbe ramme lei:

²⁵tingtia ramme â peranchibe dung mak lei, acheuleusedu penui hetak hangge gepuakting ge kaigekua gai lei;

²⁶rongpong ramme â mâ-tewchibe dung mak lei, acheuleusedu tingchukâng limkak ge penui ki tew gai lei;

²⁷tîngkau ramme â penui gu heguang ga lei, acheuleusedu pedungtew ze kedingpratat lei;

²⁸kûluibe je ning ba ne tei dui lei, acheuleusedu chiramme â, heguangme ki ramme ge bam lei.

²⁹Mâ-zat kechum penui pî kabe tak ngauyibe la lei; mâ-zat medai ze penui pî kiambe tak ngauyibe la lei:

³⁰duilui, hekaune ruage peran chilangbe, zai pa â mâ-mâ suagene du pak sua makbe kau lei;

³¹pa ’nrettewbe ’nruirie, kemei’nsei, zai heguang pe kumme suage pe pî ma ka ze tatbe ze lei.

³²Ning runne ningchu tew’ndi ze nang mie bam dizai â, nune mâ-kesiabe tew ra nang ’nning bam bam dizai â, ning ba ne ning mui kebanam ne lau.

³³Tungdui kakebitbe gene mâ-châkâng tewpat lei, zai mi neû kagetaube ne hejai tewpat lei, zai mi râta ra gechuigaibe ne kahegeibe tewpat daseu.