Read Zeme Naga SAMREKUM 31 Bible Online

SAMREKUM 31 - Zeme Naga bible

SAMREKUM 31

¹Massa gu heguang Lemuelbe gu sam ramme pe pui ne pechu geteigaibe sam:

²A na gau, ’ndaikau lau? Hei I ne lungkeube na gau, ’ndaikau lau? Hei I ne hatkaibeibe ne ngaube na gau, ’ndaikau lau?

³Ning pum ranchi ze ’mpuimi ramme dage pei gai se lau, zai heguangme je tewka’nsiame gu ’mpuî ramme ge nang tat se lau.

⁴Hei Lemuelbai, wain ze heguangme hang mak lei, heguangme â wain sakrabe kau mak lei, zai rezieteime hangge wain ze ’nchârabe kau mak lei;

⁵penui sak kai ’ndizai â, ’ndaikau diegaidiak ’ndi mei be penui ’ngngaî ’ndu, zai kategabe lieme hang yirabe ramme penui je tew’nsia kam gai bei ta du lei.

⁶Gaderabe kau je wain peranchibe pei be lau, zai pe lung muî-kadesangbe kau je wain pei be lau;

⁷penui sak kai lu penui kelaksiabe ze peize ’ngngaî ne lau, zai penui duânggabe ze peize ’nningdau bam ta lau.

⁸Pekuâpatlakme hangge ning mui ’ngkakpat kai lau, putzînggaibeime ’nzei hangge neu.

⁹Ning mui ’ngkakpat ze peling ne samram gai zu lau, kelaksiame benai kegame gu deu ze yi ra tew gai lau.

¹⁰Henâu keyibe kau je châu peudau dui lau? Pa â teluichu ramme suadu yi’nteu lei.

¹¹Pe napeu lung sing ne pechu ’nnumtew lei, zai pe napeu ze du pe hangge kegiebe ngau mak ze bam ra mak lei.

¹²Pa keringbe ting ge pe napeu je tewhereu gai mak lei, pa yirabe hang runne tew lei.

¹³Mâ-geû benai meseigiria peu lu, pe ba ’nchap-desang ze tâtew lei.

¹⁴Pa â mâ-helîkahedatpeu gu duinei riâ de lei, kedeu ’mbene pe gu hetak hangge teiwang lei.

¹⁵Tingba makge pa chu lu pe kiduîme mâ-teu ra teleu gai lei, zai pe ki guâ ka’ngguame heleume je penui tâ hang ’nzi gai lei.

¹⁶Merie tew ra hangge kedei hegua gai lu, chize pa lui lei; zai pa hipatlube zene grepchî merie tew gai lei.

¹⁷Pe kia kaktit kai lu, pe ba ran tew’nchi gai lei.

¹⁸Pa zuarabe kerua ramme pelî yi gu lei be pa chî lei. Tingmuî ge pe gu kachâbung ’mmit mak lei.

¹⁹Pe ba ne kelangkoa ze tei lu, zai pe ba ne kelangzuibe ra tei lei.

²⁰Kelaksiame benai kegame hangge pa â, mâ’nningchi lei.

²¹Pe kibaume deu hangge kebun kêu ra du pa â hing mak lei, pe kibaume ’nteumena ne mâ-geû paîgiebe ne bâ ze la dadegeu.

²²Pe runne pe hang paikam ramme kateleu lei; zai pe paî ramme â, banutpaî benai ’nzai-gieriabe paî ramme de lei.

²³Pe napeu je â, keloa keriekemui ge heram ge gechîngme je nguaka’ntaube luage ngauchikâ ze bam lei.

²⁴Banut betachiâmbe paî ramme teu lu chize pa zua lei; zai mâ-helîkahedatme dage hekiakâk ramme zua ra pei gai lei.

²⁵Pa tatew ze peranchibe benai pe ji yibe ze pe paîni chang lei, beting wangchangrabe hangge pa ka’nnui de lei.

²⁶Kaningchingbe sam pa sa ze pe leiria ne mâmâ-sie keyibe ramme geteilia gai lei.

²⁷Pe kiduîme deu hangge pa ’nningtinggeu-kadesang lei, zai ketakedau hetak pa â teu mak lei.

²⁸Pe name ne chu lu ze pechu penui suiyi lei; pe napeu ne du chigum ze pechu toa gai ze:

²⁹“’Mpuimi misonggame ne tewchi-desang ze tew kam lei, kane nang â, penui suadu tewchi’nteu rei de lei,” ze kacheu de lei.

³⁰Ngauka’mmibe â kechoabe lei, zai peluiyibe du peruânggabe lei, kane Tingwang je kehingbe kau ’mpuimi je â, toagairabe kau lei.

³¹Pe ba ne tewpatbe rachî ze pechu pei be lau, zai keloa keriekemui ramme ge pe gu tatew ramme zene pechu peize toa ze bam lau.