Read Zeme Naga SAMREKUM 4 Bible Online

SAMREKUM 4 - Zeme Naga bible

SAMREKUM 4

¹A name gau, mi peu ne mâ-rangliabe sam ramme ’ngking’mmi lau, ningnui mâ-chika’mmibe ngau le ra hangge zeu.

²I ne ningnui je mâ-nguageteitewbe keyibe pei gai de lei: a gu mâ-geteiliabe sam ze sâu se lau.

³I du a peu dage henapoine changbe luage renua ze, a pui mikngau ge bam lei,

⁴pa ne acheu ze achu getei gai de lei, “Peize ning lung ne a sam ramme ze tei’ntip lau, a gu samde ramme tei’mmi ze lung lau;

⁵kaningchingbe ngau ra tew lau; chika’mmibe ngau ra tew lau; a mui gene sam sapatbe ramme ’ngngaî se lau, zai chigene ’mbia se lau.

⁶Kaningchingbe je sâu gai se lau, chize ne ningchu nguada gu lei; zai chize ’nchâ lau, chize ne ningchu ’nggum gu lei.

⁷Kaningchingbe pîbang â aize lei: Kaningchingbe ngau le lau, nang mâ-mâ ngaube ge chika’mmibe ze lu le lau.

⁸Kaningchingbe ze yilangbe hang ’nning gai lau, chidezai chize ne ningchu tew’ngngu gai gu lei; nang ne chize teitit ze tei bam dizai â chize ne ning ngeutew gu lei.

⁹Chize ne ning peî ge mâpâ-riagua kai gu lei; peluiyibe heguang peichûp ze chize ne ningchu pei gu lei,” ze acheu zeu.

¹⁰A na gau, a sam ramme ze ’ngking ze lu gai lau, dezai ning tingkum misongga ringhang ra hangge zeu.

¹¹Kaningchingbe ’mpuî ze I ningchu geteilia gai bei de lei; zai ka’nzeibe ’mpuî ge I ningchu ngua gai bei de lei.

¹²Nang tatpatbe ge ning pîma heli ra mak lei; zai nang paktat dezai du nang mâ-’nsui ra mak lei.

¹³Rangliabe sam ze tei’mmi ze tei lau, chize ning dagene peize tat se lau; chize reî’mmi lau, chize ning gu keringbe de lei.

¹⁴Helungriaksiabe kau gu ’mpuî ge nang â gut se lau, zai ziemmena kesiame gu ’mpuî ge nang â tat se lau.

¹⁵Chigene nang â ’mbia de lau; chige nang â tat kai se lau; chigene ’mbia lu ze nang â tat bam lau.

¹⁶Penui â mâ-tewmau gai makchai â jeikeu lak daseu; mige du â penui ne tewmau gai makchai â, penui â jeikeulak luisui tai daseu.

¹⁷Penui â helungriaksiabe gu tingku teu, zai katîmphibe gu wain sak lei.

¹⁸Kane ziemmena katelingbe ’mpuî â, hechua barapatbe kebabe, tingnaimik pat dege pa’mbi babi-bi ze bambe gum lei.

¹⁹Helungriaksiabe ’mpuî â muiterîngbe gum lei; ’ndaikau peireige penui kâuka’nsui mei be penui â chî mak lei.

²⁰A na gau, a sam ramme ’ngking’mmi lau; zai a sam saliabe ramme ge ning kun ’ndualie lau.

²¹Chiramme ze ning mikngau ge peize ’mbiatat se lau; ning lung ge chiramme kai’mmi lau.

²²Chiramme ngaulube kau hang â, chiramme ze pe hangge keringbe de lei, zai pe pum hemeipum hangge tewka’mmibe de lei.

²³Ning lung je pe mapie ze rei’mmi lau; chige zene keringbe depin ramme luapat daseu.

²⁴Ning dage kechoabe samsabe peize sâu ne lau, zai sam sateguakrikbe tak du ning dagene peize deu de lau.

²⁵Ning mik hesua ’mbe ’nzeitun ze peize pie bam lau, zai ning sua chui ge runne pie’nzeitun ze bam lau.

²⁶Ning pî kiamgaibe ’mpuîki ze ’ntîng le lau, dezai nang tatbe ’mpuî leine tatdau kam gu lei.

²⁷Heku benai hezat kena lam ge kiamkelikrua se lau; kesiabe gene ning pî ze keli de lau.