Read Zeme Naga SAMREKUM 5 Bible Online

SAMREKUM 5 - Zeme Naga bible

SAMREKUM 5

¹A na gau, a gu kaningchingbe ze ’ngkinggai’mmi lau, zai a gu mâ-gechîbe lam ge ning kun ’ndualie gai lau;

²chidezai nang mâ-sie chî ra, zai ning mui ge mâ-gechîbe ze reî’mmi le ra hangge zeu.

³’Mpuimi kahailapui muikuâng gene ’ngkuidui zâukeu lei, zai pe samsa â mâ-châ suadu du cha lei;

⁴kane hetûn ge â pa â keza gum ze karî tai lei, zai hiazutkie pemui kena lam liabe gum lei.

⁵Pe pî ne kechaibe lam’mbe tatkeu lei; zai pe pikiâm ze Kechaiberam ge kiam gai lei;

⁶keringbe ’mpuî ge pa tat ra ’nning mak lei; pe gu ’mpuî ramme teguakrik ze, pe gu ’mpuîrabe pa chî mak lei.

⁷Chidaze a name gau, ’ngking le lau, a mui gene rangliabe sam ramme gene rimna se lau.

⁸Chipaupui dagene deutau ze tat bam lau, zai pe ki kemui hiage du tatwang’nna se lau;

⁹ning ngeudibe miramme je nang pei gai mak ra, zai nang ringbe tingkum ramme ze du ’nggiachilakme je nang pei gai mak ra hangge zeu;

¹⁰hesang heluîchâmme ne ning heu tei kam mak ra, zai nang tâtewbe leine ze hesangme ki ge tat kai mak ra hangge zeu;

¹¹zai ning gu keringbe betun-gaibe ge ning chie benai ning pum ze tew’nsia kam lu dezai nang huaipun ze bambe ge

¹²nang ne, “’Ndaitew ze kedeibe I lugailak, zai ka’ngngambe sam ze a lung ne I ngauka’nna lau!

¹³Achu geteiliame kuâ ze I lugailak da, zai achu mâ-rangliame lam ge du a kun ’ndualie mak ta di zeu.

¹⁴Baudime wangka’nduibe gene I â, ’nggagai’nzâuderabe runne de lei,” ze acheu gai mak ra hangge zeu.

¹⁵Ning nâu dage runne ning lung pei gai ze bam lau, zai pe hang runne nang kehungbe pei gai lau.

¹⁶Kêdabepui ne lungkeube na ramme ne â, ning hangge keyibe tew gai ra mak lei.

¹⁷Hesangheluîchâmme ne mak ze, ning name ne ningchu ’ngngâ ra chîngchu lei.

¹⁸Chidaze ning nâu dage ning suiyi ze bam lau, zai nang kelaktewpui peireige ning suî’nta ze bam lau.

¹⁹Pa â hetipui peleuyibe benai rehiêpui ngauyibe gum ze ka’nraibe ne pehî leine ge ning lungwângchang ra peize tew lau, zai pa kehungbe ne ningchu tuaguâ ze peize bam lau.

²⁰A na gau, ’mpuimi kahailabe kau ne ’ndaitew ze ningchu tew’mmie ne ra lau, zai kahemapui je ’ndaitew ze nang tuipua ra lau?

²¹Ziemmena ’mpuî ramme â Tingwang masuage ngaukâ la lei, zai ’mpuî ramme pa ne reine ze pie la daseu.

²²Ziemmena helungriaksiabe kau gu tewmaube ramme zene pechu ’mpia gum rap te lei, zai chipaupeu hemui tâ tewbe ramme ge pa mi gai de lei.

²³Pechu kedeibe pei’mmimakbe ziegene pa chai de lei, zai pa kemiebe kedibe ziegene pa ga lei.