Read Zeme Naga SAMREKUM 6 Bible Online

SAMREKUM 6 - Zeme Naga bible

SAMREKUM 6

¹A na gau, ning ramna’mpeu hangge nang ne sapda ze, zai hesangheluîchâmme je ’ngngâ gai ra nang ne samhat kai dizaine â,

²ning mui ge sam sapatbe zene ning hangge ’mpia chang, zai ning sam ramme zene ningchu nîm ’ndizai â,

³a na gau, chigum ning runne ne ningchu tew’nringpat kai ra aize tew lau, ning ramna’mpeu gu rezie kangge nang bam di daze, tat ze ning ramna’mpeu suage ning runne ningchu tew’nchei gai lu ze pechu kiâm’mmi lau.

⁴Ning mik peize jeikeu se lau, zai ning mikkûm ramme du peize heruîkeu se lau;

⁵hetipui ne heteuruipeu dagene ’nreipat gum, zai ’nruine ne ’mpiatewpeu ba gene tat dai di gum ning runne ne ningchu tew’nringpat le lau.

⁶Hei ziemmena karengabe kau gau; tingtiapui dage tat ze pa kebambe tak ramme hezeûpiegai’mmi lu ze ningchingchu zu lau.

⁷Tingtiapui â pe peireige besuitewbe kau, saibe zai samrambe kau bam mak ze,

⁸hepuakting ge pe gu hetak hang kedâ gai lu, hechit ting ge pa hetak ze pua’ndui ze bam lei.

⁹Hei ziemmena karengabe kau gau, ’ndaitiege nang jeikela bam ra rei lau? Nang kejeibe gene ’ndaitewbe luage zuachu ra lau?

¹⁰Keduîne jeigaibe, jeitupkaibe, kecheînege sau gai ra mi ba ’ntuigaibe luagene,

¹¹kelaksiabe ze kezitruapeu gum, zai hereipuâ kai lu pe runne bampeu gum ze ning peireige wang gu lei.

¹²Mâtâuhanggabe kau ziemmena helungriaksiabe kau â tatrua ze pe sam damkeluairua lei,

¹³pemik gechingliâ, zai pe pî ne ’nrit, zai pe bakêrang ne gechiau,

¹⁴pe lung kerîng ze tâ-kesiabe tew ra ’nsap ze keriângku ze bam lei;

¹⁵chipauziegene pe peireige tewka’nsiabe luakatne wang gu lei; zai tew’mmidailakbe riâ luakatne pechu tew’nsia kam ’ndu lei.

¹⁶Tingwang ne ngaugailakbe zat, zat sena, pe hangge ngaugailak-kadesangbe zat sena bam lei:

¹⁷gechîrettewbe mikpie, karasa sabe leiria, zai pemâugame jai tewpatbe ba,

¹⁸mâ-kesiabe tew ra ka’nsapbe helung, kesiabe ge tat kai ra ka’nchapbe pî,

¹⁹karasa kaisuâ ze sakkitewbe, zai mige pe sikiname ruage desit ra tewgaichibe, airamme zeu.

²⁰A na gau, ning peu gu samde ze tei’mmi lau, zai ning pui ne geteiliabe sam ze tuâ se lau.

²¹Chiramme ze pehî’nsangne ning lung ge tei bam lau; zai ning guang ge chiramme ’nteu bam lau.

²²Nang tatbe luage, chiramme zene ningchu ngua gu lei; nang jeikeugaibe luage chiramme zene ningchu hereiheka gu lei; zai nang ’nrakchube luage chiramme zene ningchu ngua’mpau gu lei.

²³Samde zene kachâbung chang, zai geteigaibe sam zene kebabe chang lei, zai kehungbe-sie ge ka’ngngiambe sam ramme â, keringbe ’mpuî chang lei,

²⁴’mpuimi kesiabe kau, pe hang runne chîbepui muizuayibe gene ningchu hereihekarabe hangge zeu.

²⁵Chipaupui heleuyibe ze ning lung gene ’nchâ gai se lau, zai pe mikrak ngauyibe zene ningchu peize tew’mmie se lau;

²⁶pe pum zuateupui je tingkuliâp kat mî ne du puîwang dui lei, kahemapui ne ’mpeumi keringbe je bin-binne rui lu lei.

²⁷Ziemmena ne pe ga ge hemi pung gai lu ze pe paî ramme rû mak ra semei?

²⁸Nune mige meching heigiebe peireige tat kai bei ze pe pîdei sup mak ra semei?

²⁹Mige ne pe ramna’mpeu nâu peirei keube ze du chigum de lei; mi-mige chipaupui je deîtaugaime leine peireige tewsâ gai mak ze â ta ra mak lei.

³⁰Kahegapeu ne pa ka’nzeibe luage kemei’ntei gai ra hanggene hegateubeibe ge miramme pechu ngau’nna mak semei?

³¹Zai pechu nîmtau lu zai â dêt sena pa pei ra chang gu lei; pe ki gu kerua leine pa pei ra chang gu lei.

³²Kahemabe tâtewbe kau â, mâ de ’nningchimakbe kau lei; chipau tâ tewbe kau â, pe runne pechu tewka’nsia de lei.

³³Kahejambe benai peluîlabe pa ngau gu, zai pe gu ka’ngngambe ze bam bam gu lei.

³⁴Hemimeube ziegene ’mpeumi pe râta-desang ra pat lei, zai pa ne hekûm lu dai dezai mâ de ’nzaî ta du lei.

³⁵Ka’nzuabe pa lu ra mak, zai pechu kela ramme ’ndaizeuge pei sedu pe suiyi sua ra mak lei.