Read Zeme Naga SAMREKUM 7 Bible Online

SAMREKUM 7 - Zeme Naga bible

SAMREKUM 7

¹A na gau, a sam ramme tei’mmi ze a gu samde ramme ning lung ge kaigekua le lau;

²a gu samde ramme nang tei’mmi ze bam lau, a gu geteiliabe ramme ze ka’nchâbe merua gum ze tei lau;

³chiramme ze ning bakêrang ge kap kai lau, zai ning lungcheû ge chiramme raw gai lau.

⁴Kaningchingbe je, “Nang â a kinapui lei,” ze acheu lau, zai chika’mmibe je ning kang yilangpeu ze kû lau;

⁵ningchu kahailapui dagene, zai pe hang runne chîbepui muizuayibe gene rereiheka ra hangge zeu.

⁶A ki muicheiki gene hela ’mbe chige hegeîterang kaibe gene I piepat dege,

⁷’mpangpaibe kau ramme ruage I pie gai ze rehangme ruage rehang’mpeu hangkat mâ-ka’nningbegabe kau je I ngau de lei,

⁸puidi ge chi ’mpuimi bambeki hiage pa tatpat ze pe ki lam gutbe ’mpuî ge tatgut ti de lei,

⁹hegî muîgamwangbe hî ge tingmuî ge zai muiterîngbe gezeu.

¹⁰Zai pie le lau, ’mpuimi hangkat pe pum zuateupui gum ze pe puâ kerubit lu, pe lung ge paningchingsiapui pechu kahedau lei.

¹¹Chipaupui â pe kuâ kie zai pe suirâchipui lei, zai pe pî ta ze pe ki ge bamdau mak lei;

¹²luagedege â puidi ge, luagedege â hechaiki ge zai mâ mik-mik ge jeikuâ ze bam lei.

¹³Chipaupui ne pechu nîm lu keput kai bei lei, zai megiesie ze pe ju ge ka’ngngambe ga ze pechu,

¹⁴“I desieyibe peipatbe-râtewbe tew lei; zai nemai ge I deseugaibe ramme ze tewpui lu de lei;

¹⁵chidadege ningchu ngauhedau ra I pat lei, ningchu I peu-desang ze chuna â ningchu I ngau lu de lei.

¹⁶Ijipram gu betachiâmbe paî heziak kairuirikbe zat ne a jeî ge I kâm gai lu de lei;

¹⁷zai a jeî ze Mur, alos zai ’nteumaching taudui perîmyibe ramme ne ’nnuk kai lu de lei,

¹⁸kei lei, anai ’nraitingba kei lei; kehungbe ne anai kat-kat suî tew’nta ze bam kei lei.

¹⁹Kilûng ge a napeu â ga lei; pa â kedeu ’mbe tebeîtewtat ti de lei;

²⁰pe gu rangkângrak pa tei lu tat ti de lei; zalua ting dezai pa wang gu lei,” kacheu de lei.

²¹Samniamyibe ne pechu kiam de lei; pe muizuayibe zene pechu pe sam kangge teigut kai ’ndi de lei.

²²Getumsei ne peize pechu gîchat kai ra tatbe gum, zai rehiê’nsei ne pe railoa ge

²³bai’mpi tu kapgut kai ra kuabe ria rapsiak’ndibe gum, ’nruipoine ne ’mpia ge gi gai gum ze pe dage ’ndaikau wangchang gu mei be pa chimakbe ziegene luakatne chipaupui chai pa suitat’nnang gai di tai de lei.

²⁴Zai chunage a name gau, a sam ’ngking le lau, zai â mui gene sam sapatbe ramme ze ’ngking’mmi le lau.

²⁵Chipaupui gu ’mpuî ramme ge peize ning lung ’nrei gai se lau, pe gu ’mpuî ramme ge nang kezitruatat se lau;

²⁶ziemmena misonggame je chipaupui ne tewkau gai ’ndi de lei; eu lei, ziemmena seikamlakme je pa ne tewchat kam ’ndi de lei.

²⁷Chipaupui ki ze â Kechaiberam tatbe ’mpuî de lei, zai kechaibe kisîam ramme ge chize ne nguakeu gai lei.