Read Zeme Naga SAMREKUM 8 Bible Online

SAMREKUM 8 - Zeme Naga bible

SAMREKUM 8

¹Kaningchingbe zene kû mak ti lau? Chika’mmibe zene pe kuâ ka’nrung mak ti lau?

²’Mpuiki hiage kedeiloa’ntûm ramme ge, zai ’mpuî’mmaî ramme ge pa sap te lei;

³namdi gutrabe keriekemuiki suage, zai keriekemuiki ge pe rankai ze ka’nrung de lei:

⁴“Hei ziemmename gau, ningnui je I kû lei, ’nteumena dage I ’nrung gai lei.

⁵Hei ’mpangpaime bau gau, mâ pie’mmi le lau; Hei kemieme bau gau, ’ngking’mmi le lau.

⁶’Ngking le lau, mâ-mâ-yilangbe ramme I salia gu lei, zai a mui gene mâ-mâ-ka’nzeibe pat ku lei;

⁷a mui gene samsang sapat ku lei; zai helungriaksiabe â a mui hangge mâ-katenetbe chang lei.

⁸A mui ge sam sapatbe ramme â peling kam lei; chige samkakedetbe benai ka’ngkuibe mâ de ga lei.

⁹Chika’mmibe kau hang â chiramme ze ’nzei kam lei, zai gechîbe ngaulube kau hangge â peling lei.

¹⁰Gepût kelei ge a gu geteiliabe sam lu le lau, zai gechâk yilangbe kelei ge mâ-gechîbe lu le lau;

¹¹kaningchingbe â teluichu ramme suadu yi’nteu lei, nang luneibe zat leine ne chi je teikedachi lak lei.

¹²I kaningchingbe ze â mâ’nningchibe lungtak ge bam lei, zai mâ-gechîbe benai mâ-siechibe peudau de lei.

¹³Tingwang je kehingbe â kesiabe je ngaugailak lei. Gechîrettewbe benai kahegiêbe, zai kesiabe ’mpuî benai katingchiambe samsabe ze I â ngaugailak lei.

¹⁴A dage ’ngngârabe sam benai kaningchingbe peling, chika’mmibe benai peranchibe la lei,

¹⁵A ziegene heguangme kaheguang lei, zai samramme ne hingde ka’nzeibe die gai diak lei;

¹⁶a ziegene heguangsinme samram ze bam, zai besuitewme ne kedeirei ze samram lei.

¹⁷Achu kehungme je I hung lei, zai lungsang ne achu peume ne achu peudau lei.

¹⁸Keheube benai pengêudibe a dage la lei, zai bam-bambe heu benai gepungbe du a dage la lei.

¹⁹A rachî ’nchipatbe â gechâk, gechâk ’nchichiakbe suadu yi’nteu lei, zai I gene patbe rachî du gepût yilangbe suadu yi’nteu lei.

²⁰I â katelingbe ’mpuî ge, zai samramka’nzeibe ’mpuî ge tat lei,

²¹achu kehungme â penui keheube hang pei gai bei ze penui heu kaikagekuabe bâm ramme ze I ne tewpui gai lei.

²²Tingwang ne ’ndamgairaîlangbe, pe gu tâtewchube ting gene achu ’ndam gai ’ndi de lei.

²³Railangbe ge kedeirei bammakbe suagene, ’ndâ rehei suagene, achu sum gai ’ndi de lei.

²⁴Hedui depin ramme hedui ne pui ze lua mak ’ngkage, hedui gechukbe ramme bam mak ’ngkage achu nguapat kai bei de lei.

²⁵Kedeiloa kedibe ramme ’ndam gai mak ’ngkage, zai peloapoine ramme bam mak ’ngkage achu nguapat kai bei de lei.

²⁶Kedei benai chige peningkâm ramme bambe, zai kedeirei ge timbuimoîne raîlangbe ’ndam gai makge achu tei’nsap kai bei de lei.

²⁷Tinggîm ramme ze pa ne tew gai ’ngkage zai gechukbe ge hedui ramme pa ne ritguâbe ting ge,

²⁸tingkehube ramme pa ne tewka’ntipbe luage, zai gechukbe ge hedui depin ramme pa ne tewbe luage,

²⁹sungkling ze pa’nrai-rai hang pa ne diegaibe luage, hedui ramme pe gu hede ’ngka mak ra hang kedei ze beichube pung ramme ze pa ne ’nchetkaibe luage zeu,

³⁰chipau ting ge mâ-chiamchipeu gum ze pe taihia ge I bam di de lei; nai’nsangne I pe suitew’mmi ra chang ze pehî’nsangne pe suage I a suiyika’nta de lei,

³¹pe gume lungbe kedeirei ge I a suiyi’nta ze bam, zai ziemmename peireige I a suiyi-desang ze bam lei.

³²Chunage a name nung gau, a kuâ ’ngking gai lau: a ’mpuî ramme teika’mmime penui helungtemi gu lei.

³³Rangliabe sam ze ’ngking lu ze ningching lau, zai chize lugailak se lau.

³⁴Ziemmena kuâ ze ka’ngkingbe kau, nai’nsangne a gu keriekemui ramme ge reîkuabe kau, a gu kemuiki ge bamkuabe kau ziemmena â helungtemi gu lei.

³⁵Achu peudaube kau â, keringbe peudau de lei, zai Tingwang dagene ngaukanggiabe pa ngau bam lei;

³⁶kane achu ngaudaumakbe kau ziemmena â, pe runne pechu tewhejam gai lei; achu ngaugailakbe kau ziemmena ramme â, kechaibe je hung lei,” ze kacheu de lei.