Read Zeme Naga SAMREKUM 9 Bible Online

SAMREKUM 9 - Zeme Naga bible

SAMREKUM 9

¹Kaningchingbe ne pe ki tew gai bei de lei, zai kaningchingbe ne kechia sena teichu gai bei de lei.

²Pe gu kaurui ramme tewchat lu, pe gu wain du pa ne kebut kai lu ze mâ-teurabe bâm hang pe gu mâ-kaira ze teleu gai de lei.

³Namdi ge pebâm hulangbe ramme gene acheu ze kû gai ra pe guâ ka’ngguapui ramme je pa ne lang gai bei de lei.

⁴“Ziemmena ’mpangpaibe kau je aige peize wang lau,” ze kacheu de lei, zai pe dage chika’mmibe gabe kau je pa ne acheu rang gai lei,

⁵“Wang lau, a gu tingku teu lau, zai I ne wain kebutlube sak lau.

⁶’Mpangpaibe luilung ze sâu nan ze lung lau, zai chika’mmibe ’mpuî ge tat lau,” acheu zeu.

⁷Teihenuitewchibe kau ziemmena je tew’nzei gai ra tewbe kau â, pe runne pe luî tewla lei, zai helungriaksiabe kau ziemmena je kiabe kau â, pe runne pechu tewhejam gai lei.

⁸Teikeliangchibe kau je kiâ se lau, makte ningchu pa ne ngaugailak ku lei; ziemmena kaningchingbe kau je kiâ gai be lau, zai pa â ningchu hung gu lei.

⁹Ziemmena kaningchingbe kau je mâ-chî ra getei gai be lau, pa â ningchingbi-bi tat tu lei; ziemmena katelingbe kau je mâ-geteilia be lau, dezai pa â chi’ngkiebi-bi tat tu lei.

¹⁰Tingwang je hingchibe ze â kaningchingbe pîbang de lei, zai Ka’nchipeu je gechîbe â mâ-chika’mmibe kau de lei.

¹¹A ziegene ning gu tingnaimikpui ramme tewpung gai sua gu, zai ning gu keringbe tingkum ramme du kaisuâ gai gu lei.

¹²Nang ne ningching dizai â, chize ning hang ningching gai de lei; nang ne teikeliang dizai â chipau ’nding hangge wangkadaibe ze nang ne pung gu lei.

¹³’Mpuimi kemiebe kau â, pe kuâkie lei; pa-’ngngamgabe kau dage mâ de ka’ngngambe chî mak lei.

¹⁴Pe ki kemuiki ge pa ’ntau, namdi gu pebâm kehube ramme ge pa ’ntau ze,

¹⁵penui ’mpuîma luî tatpatme je pa ne kû gai ze,

¹⁶“’Mpangpaibe kau mi-mige â peize aige gut lau,” ze kacheu de lei. Zai mige pe peîsuitewgesangmakbe kau je pa ne,

¹⁷“Hegalube hedui â kum lei, zai reine ze tingku ’mbaiteube ze teuyi lei,” ze kacheu de lei.

¹⁸Kane chipaupeu ze â chige kechaibe la lei be, zai pe ki ge rêume â, Kechaime ram gechukbe ge bam de lei be chî mak lei.