Read Zeme Naga PAURUAPEU 1 Bible Online

PAURUAPEU 1 - Zeme Naga bible

PAURUAPEU 1

¹Jerusalem ge heguang Dabidbe na, Pauruapeu gu sam ramme â aize de lei.

²Mâ-peruânggabe ruage du peruânggabe lei, ze Pauruapeu ne kacheu de lei, mâ-peruânggabe ruage du peruânggabe lei! Mâgetaleine peruânggabe de lei.

³Tingnaimik kangge ’nrî ze pa tâtewhereugai’ndibe leine gene ’ndaikau kegiebe ziemmena hangge ngaulube la lau?

⁴Rehei kat tat ti, rehei kat wang dai, kane kedeirei â betingbeta bam bam lei.

⁵Naimik pat zai naimik kêu dai, zai pa chube bâm ’mbe kelua ze zuawang kadai lei.

⁶Tingkai tingpî ’mbia gui gai, zai tingpeî ’mbia gui’ngguawang lei; gui’nruiguârua ze bam lei, zai pe gu ’mpuî luî ze pa guiwangbe ’mpuî ge gui zuawang gai kadai lei.

⁷’Nggeuki ramme leine sungkling ge lua gai lei, kane sungkling â mâdau de pui mak lei; ’nggeuki ramme luakeube bâm ’mbe zua dai ze chigene luakeudai’nsui ze bam lei.

⁸Mâgetaleine keleibe ne puigit ze bam lei; ziemmena ne sachanglaktibe de lei; hemik ne pa ngaube (piebe) ge mâdau de helungwângchang mak, zai mi kun ne du mâ-geseube ge mâdau de helungwângchang mak lei.

⁹Mâ-wangchangdibe ze wangchang dai ze bam gu lei, zai tewgai’ndibe ze tewdairabe ze de lei; zai tingnaimik kangge mâ de karchibe ga lei.

¹⁰“Pie le lau, aize â karchibe kau de lei,” ze acheu-gaiduibe mâge â la semei? chize du ’ndâge anui sua ’mbe tattibe rehei ramme ge bamdibe kau de lei.

¹¹Besua’ngka tattibe ramme ’nningdau ta kam da, mâ-wangchangdairabe ze du chipau chângge wangchangbe ruage ’nningdau bam dai ra mak lei.

¹²I Pauruapeu ne Israelram peireige Jerusalem ge heguang chang ze bam de lei.

¹³Zai tingnaimik kangge tewgai’ndibe ramme chî ra peu ra, zai kaningchingbe gene chiramme peupat le ra I a lung peipat kai de lei; Hera ne ziemmename name je mi lungwângchangmakbe tâ ge ’nchuak ze bam ra pei gai bei de lei.

¹⁴Tingnaimik kangge tewgaibe leine I ngau kam lu de lei; zai pie le lau, mâgetaleine peruânggabe kam lei, zai tingkai je guaka’nsabe gum lei.

¹⁵’Ngkuikedipriudibe â tew’nzeichi lak lei, zai mâ de ’nsangmakbe â periak du seidau lak lei.

¹⁶“A suage Jerusalem ge Bamraidime sua â I kaningchingbe â di’ngkeukia de lei; zai a lung ka’nningbe ge kaningchingbe chika’nchukbe benai mâ-gechîbe la lei,” ze a runne achu I kacheu de lei.

¹⁷Zai kaningchingbe chî le ra, zai kemiebe benai helungsuitudbe tak chî le ra a lung peipat kai de lei. Aize du tingkai je guaka’nsabe riâ gum de lei be I chipat te lei.

¹⁸Kaningchingbe misongga ze bambe ge ’nningkahereube du misongga ze pat lei, zai mi-mige du pa gechîbe tewpungpatkaibe kau â, pe suikahereube tewpungpat kai daseu.