Read Zeme Naga PAURUAPEU 10 Bible Online

PAURUAPEU 10 - Zeme Naga bible

PAURUAPEU 10

¹Temaine ramme chaigaibe gene taudui perîmyibe tewpeu gu tauduibung ge perîmsiabe pat ra tew gai lei; chigum ze kecheîne kemiebe gene misongga ze kaningchingbe benai pengêudibe tewka’ngga lei.

²Kaningchingpeu lung zene pechu hezat’mbia ngua gai bei de lei; kane kemiepeu lung zene heku’mbia ngua gai lei.

³Kemiepeu â pa puidi ge tat-bambe lua du mâ-’nningchibe cham lei, pa â kemiebe kau lei be ’nteumena suage pa ne rang de lei.

⁴Ning gu besuitewpeu ne ning peireige pe râta bam lêuzai â, ning bâm ze sâu gai se lau, ning kuâneu mak bam dizai â, ning mâu kedibe ’nsangdu lun gai le dui lei.

⁵Samrampeu dagene kemaube patbe gum ze kedeirei ge kesiabe I ngau de lei.

⁶Kemiebe zene rezieteibe kehube samrambe bâm ge bam di, zai lungyime zene bâm kenabe ge ka’ntau de lei.

⁷Kebangme ne hekunching ge chua, zai heguangme â, kebangme gum ze penui pî ne tatbe I ngau de lei.

⁸Hûmkui sube kau â, pa ne chige keu gai gu lei; kerie tewpânggutbe kau je â pechu henêu ne ’nsâu gu lei.

⁹Tingchu kakelatbe tâtewbe kau ze â chiramme zene pa hejam-jam lei; zai heching ka’nsâupeu ze â, chipau tâtewbe ramme gene hingrabe la lei.

¹⁰Mige pe gu ’nrei sia di, kereu mak ze bam dizai â, pe laîkai ze kereu dai ra ka’nnang lei; kane kaningchingbe ne ziemmena je keduîbe pei lei.

¹¹Kiâ gai raî mak ze henêu ne ’nsâu gai raî ’ndizai â, henêu teipeu ze mâ de betâu ga lei.

¹²Kaningchingbe kau samsa ramme zene pechu hengêutewbe teiwang gai lei; kane kemiebe kau mui â perunne pechu tewka’nsia lei.

¹³Kemiebe samsa gene pa sachu ze pe sam sabetun gai dege â, pe miê ’nchichiak ti de lei.

¹⁴Mî de ’ndaikau chang gu mei be chî mak sede kemiebe kau â sam tewpung lei, zai châu ne bechâng dezai ’ndaikau chang gu mei be pechu rangliachi dui lau?

¹⁵Kemiebe kau â pe tatew ne pechu tewlei’nteu nan ze, namdi ’mbe wangrabe ’mpuîki pa â chita di de lei.

¹⁶Hei heram gau, napoine ne ning gu heguang chang, zai heguangsinme hechuasûn ze luube-bâm tewchu dizai â ning duângga gu lei!

¹⁷Hei heram gau, lungzeunetewme na ne ning gu heguang chang, zai ning gu heguangsinme pehî-hî gene luu ze bam, zai meneurabe hanggene mak ze mi ranchi hanggene teu ze sak zai â ning suiyi’nta gu lei.

¹⁸Kahengabe ziegene heki’mpûm bakêu zai heki tingzau lei.

¹⁹Hesuiyi’ntarabe hangge tingku ze â tew gai lei, zai wain ne mi lungsui tewka’ngngup lei, zai rangkâng zene mâgetaleine hangge chang bei lei.

²⁰Nang ka’nningbe gene du heguang je deset kai se lau, ning jeî kisîam gene du lungyime je deset kai se lau; liamruabe ’nruine ne ning kuâ ze pungtat ze zai chi pe kan pungbe kau zene penui je pau gai bei ta ra chang gu lei.