Read Zeme Naga PAURUAPEU 12 Bible Online

PAURUAPEU 12 - Zeme Naga bible

PAURUAPEU 12

¹Naimikpui kesiabe wangrabe ge, zai “Chiramme ge a lungwângchang ta de lei,” ze nang acheurabe tingkum ramme wang’nnamakbe ge, ning riting ramme ge ningchu Ka’ndampeu je du chî le lau;

²chize ning hangge naimik, kebabe, hekêu zai hegi ramme muîkeu gai makge, zai tingruilube chângge kemâu sungpat dai makge zeu;

³chipau mai dezai â heki reîme kedun gu zai peranchime ’ngkuaikeu du, zai penui bau riak chamdibe ziegene chêuniakme penui tâtew ta du zai kemuiki cheibe ramme gene piebe kau ramme mâ-ngaudesi ta du,

⁴zai puidi ’mbia kemuiki ramme kainam ’ndu lei; chidezai â, chêuniakbe kuâ du seudesi ta du, zai ’nruine kuâ ’nsang ne du tew’nrakhak kai gu, zai heleutewchibe name heleume leine je tei’nnakeu gai ’ndu lei;

⁵kehube ramme je hing du, zai ’mpuîki ge du tat’ngngim ze bam du de lei; tingchabang pe pâ pa du, tîngkaupui pe runne pechu zukereulia bam du, zai ka’nchiebe leine ga kam du de lei; ziemmena â pe gu heki betunmakbe ge tat ku daseu, zai kechai puîhapme puidi ge tat’ngguakpang ze bam gu lei;

⁶gepûtria ze tap tu, gechâkkuak pâng du, zai dekuaki ge heria zukamelapbe timrianggua pâng du,

⁷dezai kedeiniamoîne ze ’ndâ pa patbe bâm kedei ’mbe helatwang dai du, zai chi herui ze â peibepeu Hera lam helatwang dai du lei.

⁸Peruânggabe ramme ruage du peruânggabe lei ze Pauruapeu ne kacheu de lei; mâgetaleine peruânggabe lei.

⁹Kaningchingbe kau pa changlube peireige du, Pauruapeu ne ziemmename je kaningchingbe geteilia gai lei, ’ndeu’ndak ze pie zun lu zai ’ntîngteî ze samrekum ramme teleu’ntiazun lu zeu.

¹⁰Pauruapeu ne sam peluiyibe ramme peu de lei, zai ’nzeitunbe gene samsang ramme raw gai de lei.

¹¹Kaningchingme gu sam ramme ze â hetumui ramme gum lei, zai penui gu samrekum tei’nduigaibe Melireîpeu hangkat ne peibe ze â hegeîkeriak (perek) gia’ntipripkai’ndibe gum lei.

¹²A na gau, airamme peireige kêdabe ramme je ’ntîng le lau. Leisikuak misongga tewpatbe ze betun-gairabe ga lei, zai chî ra peuran dizai du mi pum ran tewka’nggabe kau lei.

¹³Pelane seu kam lu de lei; aipau tedeu ge sahekap kai de lei. Hera je hingchi lau, zai pe gu samde ramme reî’mmi lau; aize ziemmena gu pe tâ pe ngeu sing daseu.

¹⁴Hera ne anui tatew leine peireige ’ngkim ne tâtewgai’ndibe, zai keyibe tâ mei nune kesiabe tâ mei ze tewgai’ndibe leine peireige samram gai gu daseu.