Read Zeme Naga PAURUAPEU 2 Bible Online

PAURUAPEU 2 - Zeme Naga bible

PAURUAPEU 2

¹“Kei lei, chunage a pum suigut I ’ndautâu gai ra de lei, ning lungwângchang gai le lau” ze a runne achu acheu gai de lei. Kane pie le lau, aize du peruânggabe chang laleu rei lei.

²Ka’nnuibe je, “Chize du kemiebe lei” I acheu zai mi pum suigut je, “Chize ’ndaikau tâu hang lau” ze I kacheu de lei.

³A lung ge kaningchingbe ne puigit kai lu ze wain gene a suî tew’ntaza gai be ra, zai kemieliangtewbe ’mpuî gene du ziemmename name hangge tingkehube kangge penui keringbe ting keduîne tingkak hangge yirabe I ngau le mak tâne hangge a lung peipat kai de lei.

⁴Tâ kedibe ramme I tew gai de lei; a ki ramme hangge I tew gai lu, zai grepchî merie ramme a hangge tew gai de lei;

⁵a hangge merie ramme benai sau’ntakkairabe bâm ramme hang I tew gai lu chige mâ-hêrachi bang zat ramme I tau gai de lei.

⁶’Nrêu ge hingbang ramme chîngpattibe ramme hedui zuâ ra hangge dekuaki ramme a hang I kui gai de lei.

⁷Kebangme ’mpeumi ramme benai ’mpuimi je I teiwang gai lu, zai kebangme a ki gene lungkeume ramme du lamui lei; a suage Jerusalem ge bamraidime gu suadu kie ze getum benai melidung ramme misongga ze a gu lamui lei.

⁸Gechâk benai gepût ramme, zai heguangme ramme benai heram ramme heu ramme misongga a hangge I kaigekua gai lu lamui lei; heleutewchime ’mpeumi benai ’mpuimi ramme a dage la, zai ’mpeumi ne ka’nchâbe luigum ze nausî ramme du misongga ze lamui lei.

⁹Chidaze I â ziemmena kedibe kau chang di, zai Jerusalem ge a suage bamraidime suadu di’ngkeu di de lei; zai I kaningchingbe du a dage bam bam di de lei.

¹⁰A mik ge I ngauka’nchiebe leine gene I ’mbia mak lei; mi suiguttewbe ramme gene a lung du teikebai mak lei, I tewhereugai’ndibe leine gene a lungsui tew’nta ra I ngau daseu, zai aize I tâtewhereugaibe rachî ramme de lei.

¹¹Chidadege a ba ne tâtewgai’ndibe ramme leine benai I tâtewhereugai’ndibe ramme ’nningdesibi gai de lei, zai pie le lau, mâgetaleine peruânggabe chang laleu lei, zai tingkai je guaka’nsabe chang di lei, zai tingnaimik kangge mâ de pelâp-pegîe ngaurabe ga lei.

¹²Chidadege kaningchingbe zai kemiebe benai deuzietewbe ze I ’nningdesibi gai kadai de lei; heguang hangkat je leîpeu ne ’ndaikau tewchiduibe la lau? Pa tewraipeu ne tewgai’ndibe luî tew kadai lei.

¹³Chidadege kemuîbe suadu kebabe â yi’ngkeu di gum ze kemiebe suadu kaningchingbe â yi’ngkeukia lei be I ngaupat te lei.

¹⁴Ziemmena kaningchingbe kau â, pe peî ge mâ-kaningbe bambe ziegene pa tatbe ’mpuî ngau lei, kane kemiebe kau â, kemuîbe ge tat lei; zai chize acheusede tatdausingrabe kat penui ’nteumena hangge wangchang gu lei be I chî de lei.

¹⁵Chidadege a runne acheu ze, “Kemiebe kau dage wangchangbe ze a dage du wangchang sing gu lei, acheuzaine ’ndaitew ze I ningching-kadesang gerei se lau?” kacheu de lei. Aize du mâ-peruânggabe rei de lei, ze I a runne achu kacheu de lei.

¹⁶Kemiebe kau je ningdau bam mak gum ze kaningchingbe kau je du ’nningdau bam dai ra mak lei, wangdairabe naimikpui ramme ge â ’nteumena je ’ngngaî kam ’ndu daseu. Kaningchingbe kau ’ndaigum ze kemiebe kau gum pa chai rei se lau!

¹⁷Chipauziegene mi keringbe je I ngaugailak te lei; tingnaimik kangge tâtewgaibe ramme zene achu tewkahereube changbe ziegeneu. Chiramme leine ze â peruânggabe zai tingkai je guaka’nsabe chang daseu.

¹⁸A tatew tingnaimik kangge tewgai’ndibe leine I ngaugailak ti de lei, chize a chaige lungleîrapeu hangge sâudiak kai sing gu lei be I ngaulube ziegeneu;

¹⁹zai chipaupeu ze ziemmena kaningchingbe kau mei nune kemiebe kau leu gu mei be châu ne chî lau? Acheusede tingnaimik kangge I tâtewhereugai’ndibe leine benai a gu kaningchingbe tatew leine peireige pa ne besuitewpeu chang himchang gu de lei. Aize du peruânggabe rei de lei.

²⁰Chidadege I a laîkai ze tingnaimik kangge tâtewhereugai’ndibe leine peireige a lungneu-kadesang de lei,

²¹luage dege â ziemmena pa kaningchingbe zai mâ-gechîbe zai pechîamchibe gene tâtewhereugai’ndibe ze tâtewhereu gai mak luisuipeu hangge pe tatew leine kai ra chang de lei. Aize du peruânggabe zai siaka’ndibe chang de lei.

²²Ziemmena pa tâtewhereu-leiseigai’ndibe gene pe hangge tingnaimik kangge ’ndaikau ngaulube la lau?

²³Pe gu keringbe tingnaimikpui ze â teuneu-kahereube ne pui, zai pe tatew ramme ze du tewkahereube chang daseu; kemuîbe ting ge ’nsangdu pe lung sautemi gai ra ngau mak lei. Aize du peruânggabe gerei de lei.

²⁴Ziemmena hangge yilangbe pa chîduibe ze â teu ze sak ze pa hiwanggailube gene pe suiyi’nta bambe ze de lei. Aipau ’nsangdu Hera ba gene patbe kau gerei lei be I ngau de lei;

²⁵achu sâu ze chauge teu ra ngau’ngkieduibe kau la lau, nune chauge pe suî’nta ra ngauchiduibe kau la lau?

²⁶Pa ’nningtewbe kau je â Hera ne kaningchingbe, mâ-gechîbe zai hesuiyibe pei lei; kane hemui kau je pa ne tâtewhereu ze hî ze teiwanggekuagairabe hang tâtew ra pei lei, Hera ’nning tewbe kau je pei gai be ra hangge zeu. Aize du peruânggabe zai tingkai je guaka’nsabe chang de lei.