Read Zeme Naga PAURUAPEU 3 Bible Online

PAURUAPEU 3 - Zeme Naga bible

PAURUAPEU 3

¹Tingkehube kangge mâgetaleine hang beting-ting la kam lei, zai mâ-leine deu hangge beting-pehî la kam lei:

²Lungkeugairabe ting, zai chairabe ting, taugairabe ting, zai taugailube kelatpatdairabe ting lamui lei;

³tewchatrabe ting, zai tew’mmirabe ting lamui lei; rakeurabe ting, zai ’nrangchurabe ting lamui lei;

⁴Haprabe ting, zai ’nnuirabe ting lamui lei; desuirabe ting, zai limrabe ting lamui lei;

⁵tingchu tuapatrabe ting, zai teiwang’nduirabe ting lamui lei; tuirabe ting la, zai tui mak ze ’mpatkairabe ting lamui lei; keputrabe ting, zai keput mak ze bamrabe ting lamui lei;

⁶peurabe ting, zai tew’nggarabe ting lamui lei; mi dage kairabe ting, zai tuârabe ting lamui lei;

⁷hitrirabe ting, zai heruirabe ting lamui lei; mi kuâneu-makrabe ting, zai samsarabe ting lamui lei;

⁸hungrabe ting, zai ’nrierabe ting lamui lei; hereirabe ting, zai desieyirabe ting lamui lei.

⁹Pa tâtewhereugaibe gene tâtewpeu hangge ’ndaikau kegiebe la lau?

¹⁰Ziemmename name tâtew’nchuak ze bam ra Hera ne peigai’ndibe tâ ze I â ngau lu de lei.

¹¹Mâgetaleine panehî-hî ge peluiyi ze bam ra pa ne tew gai de lei; zai betunmakbe ze du ziemmena lung ge pa ne kai bei de lei; acheuleusedu mige du bepîbang gene betun riâ chang ze Hera ne tewgai’ndibe ze peupatchi lak bam ra hangge kai bei de lei.

¹²Penui ring ze bam tânege ziemmena hangge mi suiyi ze penui suiyi’nta ze bambe luilung peirei keyibe mâ de ga lei be I chî lei;

¹³chipau peireige du ziemmena teu se sak zai pe tatew leine gene pe suiyi bam sing ra de lei, chize Hera gu kela daseu.

¹⁴Hera ne tewgaibe leine â, betingbeta bam bam lei be I chî lei; chige mâ de kaisuâchi lak, zai mâ de lutuadaichi lak lei; chize Hera ne tew gai lei, chidezai ziemmename ne pechu hingchi ze bam ra hangge zeu.

¹⁵’Ndaikau wangchang ze la mei be ze â wangchangraidibe kau de lei; ’ndaikau wangchang dai ra mei be ze wangchang di la de lei; zai Hera ne tattibe je peu lei.

¹⁶Chipau peireige du samram ka’nzeibe bamrabe bâm ge tâ-kesiabe bam di, zai tâkapelingbe tewrabe kelei ge du tâ-kesiabe tewbe bam di de lei be tingnaimik kangge I ngau de lei.

¹⁷Tingwang ne ziemmena kapelingme benai ziemmena kesiame je samram gu lei, pa ne mâgetaleine tedeu hangge benai tâtewgai’ndibe leine hangge pehî teleu gai ’ndi daseu, ze I a lung gene kacheu de lei.

¹⁸Ziemmena name deu ge a lung ge I â acheu ’nning gai ze, penui ze du hekaune kam lei be teilia ra hangge Hera ne penui je kedak ku lei, ze I kacheu de lei.

¹⁹Ziemmename dagene wangchangrabe zai hekaune dagene wangchangrabe ze â ka’nzuâ daseu; hangkat chaibe gum ze miramme kêdame du chai lei. Penui ’nteumena penui chuilube zat kat kam lei, zai hekaune ramme peireige ziemmena ne yi’ngkeukiabe ga lei; mâgetaleine peruânggabe chang daseu.

²⁰Penui bâm kat ge tat kai kam gu lei; penui kedei gene patbe kam lei, zai kedei mi gai dai kam gu lei.

²¹Ziemmena gu herui â kehu ’mbe chu di, zai hekaune gu herui â kedei ’mbe wangkeu di mei be châu chî lau?

²²Chidaze ziemmena pe tatew ramme peireige ze pe suiyi’nta ze bamrabe peireige â, chi suadu yi-ka’ngkeube mâ de ga de lei be I ngau di de lei, chize pe dam hang ngaube kau daseu; châuge ne pa chaidibe châng gene daurabe ze pechu teilia’ntuaduibe kau la lau?