Read Zeme Naga PAURUAPEU 4 Bible Online

PAURUAPEU 4 - Zeme Naga bible

PAURUAPEU 4

¹Tingnaimik kangge tewsabe tatew ramme leine I ngau kadai de lei. Zai pie le lau, tewsâbeime mikdui ramme, zai penui je mî de tum gai ra gabe pie gai ni lau! Penui je tewsâme lam’mbia â reziechibe bam de lei, kane penui je â mî de tumgairabe kau gabe I ngau lei.

²Dadege kechaime, chairaidime â keringme chuna riâ ringkua ze bamme suadu penui paurega lei ze I â ’nning gai de lei;

³zai chibe kena sua yi-ka’nteube â chuna riâ chang ze lungkeu mak, zai tingnaimik kangge tâ-kesiabe tewbe ramme ngau mak ze bambe kau ze de lei.

⁴Chidadege ’nrî ze tâtewbe ramme leine benai tâtewbe ge pezeuchibe ramme leine ze hangkat ne kêdapeu je hemimeube gene pat lei be I ngau di de lei. Aize du peruânggabe kau, zai tingkai je guaka’nsabe kau ze de lei.

⁵Kemiebe kau â, pe ba ’ntui lu pe runne ze pe ji teu lei.

⁶Temichai ze bambe bakuî kat â bakuî kena tâtewkahereube ne pui ze bambe zai tingkai je guaka’nsabe sua â yibi lei.

⁷Tingnaimik kangge peruânggabe I ngau kadai de lei:

⁸ziemmena hangkat pe runne gap kai lu, pe na du ga zai pe sikina du gabe kau bam lei; sede pa tâtewkahereube â sau mak luisui ze bam lei, zai pe mikpie â lungyibe ge pe lungwângchang mak luisui ze bam lei, zai chipauziegene pe lung ge, “I tâtewhereu gai zai I lungtemichai gai ra ngaumakbe ze châu hanggene lau?” ze acheu mak lei. Ai ze du peruânggabe de lei, zai mi suiyimakbe tatew de lei.

⁹Mihangkat sua hangna â yibi lei, penai tatew rachî keyibe penai ngaube ziegeneu.

¹⁰Penai hangna ruagene kau de lêuzai du, hangkat ne pe kangpeu je zuchu gai gu daseu; kane pe runne bambe kau pa kâukeube luage mî ne de pechu zuchugairagabe kau â, pe duângga-desang gu de lei.

¹¹Chipau peireige du ziemmena hangna jeiherua dizai â lumbup ze jei lu lei; kane hangkat runne ’ndaigum ze jeilumchi le ra lau?

¹²Zai pe runne bambepeu je kêdapeu ne duî le lêuzai du, penai hangna ne chipaupeu je duî dai duî lei; heria kechum kitlube â tapkelua mak lei.

¹³Kelaksia ze kaningchingbe rehang’mpeu â heguang chîng ze kemiebe kau pechu geteiliabe lutadibe kau sua â yibi lei;

¹⁴pa â kebangki gene pat ze heguang-bamrak hang chang, zai pa bambe heguangram ge kelaksia ze pechu lungkeugaibe chang sedu pa a yibi lei.

¹⁵Kedeirei ge kezitrua bamme keringme leine chi rehang’mpeu heguang je leîbepeu chai suibe I ngau de lei;

¹⁶pa ne kanguabe kangge ziemmename leine riak seichi kam lak bam de lei. Acheuleusedu pe chaige rehei patdairame ne pe peireige penui suiyi ra mak lei; aize du peruânggabe sing de lei, zai tingkai je guaka’nsabe ze de lei.