Read Zeme Naga PAURUAPEU 5 Bible Online

PAURUAPEU 5 - Zeme Naga bible

PAURUAPEU 5

¹Nang Heraki tat dezai ning pikiâm ramme reî’mmi le lau; kemieme gu herâtewbe gum ze peipat ra sua â ’ngking ra wangka’nnabe â yibi lei; penui tâ-kesiabe tew lei be penui â chî mak daseu.

²Ning mui ’nrup se lau, zai Hera masuage keluakkelat ze pau gai ra ning lung ge peize ’nning se lau, Hera â Tinggîm ge bam zai nang â kedeirei ge bam daseu. Chidaze ning sam ze peize gechâmne runne sa lau.

³Misongga ze tâka’nchuakbe ramme gene mi mang’mmi ra chang, zai samsaka’ngkiebe gene kemiebe kuâ pat pat daseu.

⁴Hera dage nang samhat dezai, chize tewpui ra tezie se lau; pa â kemieme peireige pe suiyibe ga daseu. Nang hatkai’ndibe ze pei lau.

⁵Nang hatkai lu pei mak ta ra sua â nang hatkai-mak-luisuidibe â yibi lei.

⁶Ning mui ne ningchu peize hemui ge ngua gai se lau; zai Hera gu sam paukahelakpeu je tewmaube kau lei ze acheu se lau; ning sam ziegene Hera pe lumpum, zai ning batâ ramme tew’nsiarabe hangge ’ndaitew ze nang tew gai ra lau?

⁷Hemang ramme ’mmi ka’ngkiebe benai heladkiebe ge peruânggabe du misongga ze pat lei: kane Hera je nang hingchi ra lei.

⁸Heram lungge kelaksiame je chaîchimbe zai samramka’nzeibe benai mi ’nzei sarabe ramme peimakbe nang ngau dezai ningdaulak se lau; samrampeu pe tatew kehupeu peireige chi suadu kehupeu ne pe tatew ze pie la daseu, zai penui sua kehupeu lamui rei lei.

⁹Kane mâgetaleine ge, heguang ze du helu tâ tewbe kedei gene kegiebe ngau lei.

¹⁰Rangkâng je kehungbe kau â, pa rangkâng ngaube peireige pe lungwângchang ra mak lei; zai keheube je kehungbe kau du pa pelâp-pegîe ngaube ge pe lungwângchang ra mak lei. Aize du peruânggabe de lei.

¹¹Teurabe merua ngauka’ngkiebe ge, chize teurabe kau du pungpat lei; pe mik ne chiramme ngaugairabe runne zangno pa’mpaupeu hangge ’ndaikau kegiebe la lau?

¹²Penui teu’ngkie ra ngau mei nu teuka’ncham mei sede tâtewpeu â jeitemichai ze jei lei; kane lungyipeu gu misongga ngaube zene pechu jeizeûne jei ra pei mak lei.

¹³Tingnaimik kangge sia-kadesangbe I ngau lei: lungyibe merua ramme ze â pa’mpaupeu ne pechu tewhereu ra hangge bai gai de lei,

¹⁴zai chi keheube ramme ze penui pausiabe daube gene tew’ngga dai ’ndi tai lei; zai mige pe name bam sede mâ de kaidiak ra ga ze pe barua ze bam di lei.

¹⁵Pe pui lung gene pa zuapatbe luigum ze pe pumrua ze pa tat dai gu lei, zai pa ne tâtewhereugailube gu mâ-mâ pe ba gene teitat ra yibe ramme mâ de pa teitat ra mak lei.

¹⁶Aize du sia-kadesangbe kau de lei: Pa wangkeugaibe luigum ze pa tat dai gu lei; zai tingkai hangge pa tâtewhereugaibe,

¹⁷zai pa keringbe ting tâluî kemuîbe benai mi suisiabe ge, mi duânggabe benai ’nrâteuneube ge zai mi lungwângchangmakbe ge lung ze bambe gene pe hangge ’ndaikau kegiebe la lau?

¹⁸Pie le lau, mâ-keyibe benai kakezeibe hangge I ne ngaupatkaibe ze â teu ze sak ze tingnaimik kangge mi keringbe ting keduîne Hera ne peibeibe kakge mi tâtewhereugai’ndibe leine gene mi suiyi ra ngaulube ze de lei, aize pe dam hang ngaube kau daseu.

¹⁹Ziemmena leine lungyibe benai keheube zai chiramme gene temichai ze bamrabe hangge Hera ne rezie peibeibe kau, zai penui dam hang lu ra pei bei, zai penui tâtewgai’ndibe gene penui suiyi’nta bam ra peibeibe kau hangge du aize Hera gu kela de lei.

²⁰Pe lung suiyi’nta ze bam ra Hera ne peibeibe ziegene pe gu keringbe naimikpui ramme je misongga ze ’nning bam ra mak lei.